Popular Bible Verses from Jon 15

Share

“Ke̱e̱ni̱ anna keet, e̱e̱ggi̱nnu̱ niga alawo. Ming karumena anna ki e̱e̱t ko̱do̱ye̱wa̱, a̱bbi̱rna̱ e̱e̱ti̱ neci o̱ya̱u̱ cik meelek ju̱rru̱m. A̱zze̱ wo̱ye̱ gi̱i̱ ci ogonnu niga do̱ to ming iróng karumze ko̱do̱ye̱.

Ka̱vvu̱t ki annit nga̱to̱de̱ ko̱do̱ye̱ kiwagon keet ki alawo. Iróng wo̱ye̱ alawoci a̱bbi̱rna̱ o̱ya̱u̱ enne do̱ ming iróng arumze ki keet ele kodowe. Iróng wo̱ye̱ niga do̱ ogonnu gi̱i̱ imma ming iróng karumze ki annita.

Ming karume ko̱do̱ye̱ kar zin niga u̱zu̱tte̱ zoz cinanni, i̱jji̱nne̱t gi̱i̱ ci ette orongnyu niga kar Ta̱mu̱ta̱dde̱n ka̱a̱nyu̱ng.

Iróng zin een i̱ge̱t cik ahalanang annita, annit abarik ci kahalannung i̱ge̱ta̱ kar zin ka̱a̱nyu̱ng li̱ngli̱ngo̱n ci ovvo a̱bbi̱rnu̱ kiwagon o̱ya̱u̱ cik ovvo abak udut. Kar zin Baba ka̱a̱nyu̱ng kaal cik wo̱ye̱ a̱jji̱nnu̱ niga zare cigannik.

I̱llo̱i̱ rezinet ci ommog wa a̱da̱kne̱ e̱e̱ti̱ imma ngati gonogginnu.

Aizek enne alawo wak iróng a̱a̱ri̱ o̱ya̱u̱ tu̱, imma alawo wak a̱a̱ri̱, a̱vi̱l kar ki̱bbi̱re̱to̱ ju̱rru̱m.

Zoz zin cinanni ki̱lo̱tu̱ng icu: Irezto e̱le̱tti̱ ki baling kirezzung anna i̱ge̱t ke̱.

Abunna ming ogonnu ki alawo cik a̱bbi̱rna̱ o̱ya̱u̱ cik meelek, kar izet nuyak cigannik, kar zara cik Baba ki̱di̱ngdi̱nga̱nte̱.

“Kogonni anna ki keet wa een de̱de̱, kar Baba kize manyi keet.

Ming iróng e̱e̱ti̱ imma arumonika annit, ogon enne ki alawoci ci u̱ju̱ko̱zi̱k tu̱ kar zin kodok. Idimttai alawo ne̱ko̱, u̱lu̱to̱zi̱k kar zin kutuzze gwo̱o̱ya̱.

Ku̱du̱wa̱u̱ng ri̱t ba̱li̱ye̱ anna i̱ge̱t zoz cu kar talninet cinanni ka̱vvu̱ ngatinno̱ng, kar talninet cinno̱ng ki̱ddi̱ki̱r.

Ming azunnu niga lo̱ti̱nno̱k cigannik, odokta niga bu̱k rezinte cinanni, ki i̱yo̱ko̱ ming kazunne anna lo̱ti̱nno̱k wak Baba kar zin kodowa rezinte wainne ko̱.

Ki̱lo̱ti̱kku̱ng zin i̱yo̱ko̱ zoz ci ka̱nne̱kku̱ng ne, irezto e̱le̱tti̱.

Ming e̱e̱ggi̱nnu̱ niga ol cik lo̱o̱tu̱, irezung ol cik lo̱o̱tu̱ kiwagon ming irez ol wagge̱k lo̱o̱tu̱ ogon kaal cik gerzek. Iróng niga e̱e̱ggi̱nnu̱ olli lo̱o̱tu̱, katahalaung zin anna i̱ge̱t kar u̱tu̱gu̱z kaal cik ogon ol cik Ta̱mu̱ta̱dde̱no̱ iróng bo̱do̱k ngen ogonnu kaal cik gerzek ogon ol wak lo̱o̱tu̱. Zoz zin ci amarinnung ol cik lo̱o̱tu̱ ko̱ nenen necu.