Popular Bible Verses from JOHANESE 15

Share

“Morara ke nna, makala ke lena. Yo a dulago e le o tee le nna, le nna ke le o tee le yena, o enywa dikenywa tše dintši, gobane ka ntle le nna le ka se kgone selo.

Dulang le le ba tee le nna, gomme le nna ke tla dula ke le o tee le lena. Lekala ga le kgone go enywa ka bolona, le kgona fela ge le kopane le morara. Ka wona mokgwa woo le lena le ka se kgone go enywa dikenywa ge le sa dule le le ba tee le nna.

Ge le dula le le ba tee le nna gomme le theeletša tše ke le boditšego tšona, le ka kgopela se le se nyakago, mme le tla se fiwa.

Ga se lena le nkgethilego, ke nna ke kgethilego lena ka le dira gore le enywe dikenywa tša go swarelela, gore se le kago se kgopela Tate ka ge le le ba ka, a le fe sona.

Lerato la go feta la ge motho a ka hwela bagwera ba gagwe ga le gona.

Lekala le lengwe le le lengwe le le lego mo go nna le sa enywe o a le rema, le lengwe le le lengwe le le enywago o a le kgotha, gore le hlweke le tle le enywe le go feta.

Molao wa ka ke wa gore le rataneng bjalo ka ge le nna ke le rata.

Se se tumišago Tate ke ge le enywa dikenywa tše dintši ebile le le barutiwa ba ka.”

“Ke nna morara wa mmakgonthe, gomme Tate ke molemi.

Yo a sa dulego e le o tee le nna o a lahlwa a omelela go etša lekala ge le lahlilwe la omelela; gomme makala a a omeletšego a a topša a lahlelwa mollong, a swa.

“Ditaba tše ke le boditše tšona gore le be le lethabo le ke nago le lona, le gona lethabo la lena e be le le feletšego.

Ge le phetha melao ya ka ke tla dula ke le rata, go swana le nna ge ke phethile melao ya Tate, gomme a dula a nthata.

Bjale ge, se ke le laelago sona ke gore le rataneng.”

Ge le ka be le le ba lefase, batho ba lefase ba ka be ba le rata, ba le tšea le le ba gabobona. Eupša ba le hloile ka ge ke le kgetholotše go bona gomme le se sa le ba gabobona.