Popular Bible Verses from ALA IROM 8

Share

Ahị jẹ́ yẹkẹẹ, ang myị́ ang wuu kaa họ ụkụrwọ tụchawụlẹ nya ohiigu ha bwula ọngịrị nya Ohe Oluhye ẹ-ẹga nya angịlẹ wuu ká Ohe Oluhye ayịdang há, kị ri angịlẹ ká Ohe Oluhye be ẹkọ wụrụ kị ka ri angịnyị nya ịlọmwụ, jaabwọ ká obyi omeme nyamwụ la.

Chajị, m jẹ́ myịmyị nya ịlẹhị-ịlẹhị yẹkẹẹ, ó-ri igu ogbugbu riri lee ọhịhị lee alegu-ẹrụ ilepwoohe lee ịngịrị ịtụka-ịtụka lee ang ilijata lee ang ịlịlahị ịlẹ kị juwa ka warị lee ọngịrị nya eji ogbegbe nya ịdịrịhụ wuu, lee, ang iluhye-ọgba ipyiipyii lee ang ikpori-kpori ilekpeleji nya ịpyị lee ịngịngịhyẹ ọkịla ọlẹ wuu ká Ohe Oluhye họhọ, á ka jẹ́-ẹ la ọngịrị chịhị ebwo hi ọháha ọlẹ kahị la ẹ-ẹga nya Ohe Oluhye bwula ịKịrayịsị iJisọsị Ọngọlahị kpá myị́ ẹnẹnẹhẹ kaka.

La ụgbẹyị ọọwa ọọwa, Olegu Ịgọgọ ayịdang a kaa dahị ụbwọ ẹ-ẹpwụ nya ọdẹwụ-dẹwụ nya ugbinyịrọ nyahị lẹ! Chajị, ahị ayịdang á jẹ́ jaabwọ kahị kaa bwu raabwọ ha Ohe Oluhye la ọgụ ọlẹ kọ chịla ka. Ma, Olegu Ịgọgọ la ịlọmwụ a kaa bịlẹ wọnụ nyahị ju ị-ịlahị nya Ohe Oluhye la eru ọchịchị ọlẹ kahị ka jẹ́-ẹ da wụlẹ bwu ọnụ nyahị la ẹla oyaya myị́ kpong-kpong kaka lẹlẹ.

Chajị nya ọọwa lẹ, anyị, ahị tị́ ka ya u-uhye nya ang ịlẹ wuu mẹ? Jaabwọ ká Ohe Oluhye ji oye nyahị ịnyị wẹ lẹlẹ, o-owo, a tị́ tụtụm ka kụrụụhị myị wẹẹ?

Chajị nya ọọwa lẹ, eje owuwu nya Ohe Oluhye ọhẹ-lọhẹ á juwa ha angịlẹ wuu kị juwa ẹ-ẹpwụ nya ịKịrayịsị iJisọsị lẹẹlẹẹ kaka. [Chajị, ịwa ayịdang á kaa ba imyi nya ịnyịrọ nyaa jẹ kaka. Kẹnẹ-kẹnẹ, irya nya Olegu Ịgọgọ ọlẹpwụ nyaa ụbwọọmwụ kem mẹ ịnyị!]

Irya nya ang nya imyi nya ugbinyịrọ ịlịnyị kem omeme kaa kpa igu ogbugbu kịla ọngịnyị ehe! Ma, apyobwuna nya ọ-ba irya nya Olegu Ịgọgọ jẹ kem, tị ri ọhịhị onyeewe bala okpunyi ọlala.

Ọ tị lịnyị kpá odu ịnyị! Ahị ri angị kụrụ kụrụ ma kụrụ ị-ịlahị nya ang ịwẹ wuu bwula ọngịrị nya ịKịrayịsị Ọngọlẹ kahị há lụmẹ.

M jẹ́ myịmyị yẹkẹẹ, akama ịlẹ kahị lẹẹ yẹ lẹẹlẹẹ lẹ, ị́ la gbuu kpụ, ị ka jẹ́-ẹ chwaa kaka pwoku ụma nya ẹbyẹbyị nya ịKịrayịsị ọlẹ kọ ka ya chị ehe hahị ị-ịlahị myị́ kpong-kpong ka.

Ee lẹ, ó ri ịnyị lẹ, o-owo a tị́ tụtụm myịmyị ka jẹ́-ẹ chịhị ebwo hi ọháha nya Ohe Oluhye ọlẹ kahị la ẹ-ẹpwụ nya ịKịrayịsị myị́ wẹẹ? Akama, a ka chịhị ebwo ọọwa myị́ lẹ? Lee, ang ọjụjụ tị́? Lee, ọ-tụ pyịpyị tị́? Lee, imyi ọ-nwụhị nwụ tị́? Lee, o-ji lọhị-lọhị ye ang duru ka tị́? Lee, ang ọjụjụ ọ-tụụhị beji kpalị-kpalị tị́? Lee, ẹma nya ẹwụ tị́?

Chajị, Ohe Oluhye ayịdang Ọngọlẹ kọ kaa jẹ́ irya ọlọkịlẹtụ nyahị ahị angịnyị ehe wuu hweng-hweng lẹ, ọ jẹ́ irya nya Olegu Ịgọgọ ịnyịnyị. Chajị Olegu Ịgọgọ a kaa juwa bịlẹ ang wọnụ nyahị ahị angị ịgọgọ ju jaabwọ kọ ka pwoku irya nya Ohe Oluhye kpangga lẹ!

Chajị, angịlẹ wuu kị myị juwa ba irya nya Olegu nya Ohe Oluhye ọlẹpwụ nyaa jẹ ẹ-ẹpwụ nya ọhịhị nyaa wuu kem, a ri anyị nya Ohe Oluhye ịlẹ kị ri angịgbahị ẹ-ẹpwụ nya ẹla nyamwụ wẹẹ lẹ.

Chajị, angịlẹ wuu kị juwa hịhị ba irya nya imyi nya ugbinyịrọ ọlẹpwụ nyaa jẹ kem lẹ, imahị nya ang nya imyi nya ịnyịrọ ịịwa kem, ị kaa me lẹlẹ. Ma, angịlẹ kị tị juwa họ ang ọlẹ ká Olegu nya Ohe Oluhye ọlẹpwụ nyaa ya kem lẹ, imahị nya irya ọlẹ kọ pwoku ịnya Olegu Ịgọgọ kem, ị kaa me ịnyịnyị lẹlẹ.

Ọwa Ohe Oluhye ọlẹ ká Ọnyẹwẹ nyamwụ lẹpwụ-lẹpwụ á kọọ ẹhị la o-hu ha ka, du kọ tụụbwọ hyoo warị kaka gbu wọnụ nyahị ahị angịnyị ehe wuu ju lẹ, anyanyị, ọ tị́ ka jẹ́-ẹ lọọ ujwo nyọka hu ang myị́ ang ịkịla wuu ba ọọwa u-uhye hahị myị́ tụtụm wẹẹ?

Chajị, Olegu nya Ohe Oluhye ayịdang a kaa ri ibeenu nya olegu ọlẹpwụ nyahị ahị angị myịmyị yẹkẹẹ, ahị nyị ri anyị nya Ohe Oluhye ịnyịlẹhị lẹ! Jaabwọ kahị ri anyị nya Ohe Oluhye lẹlẹ, ahị ri angị ka la ang ugu nya Ohe Oluhye lẹ. Ahị ri angị ka bá ang ugu nya Ohe Oluhye bá la ta ịKịrayịsị lẹ. Jaabwọ kaahị ayịdang jam bá akama nyamwụ bá yẹ tọọ lẹlẹ, ahị tịtị ka bá ẹbyẹbyị nya ịKịrayịsị ọọwa bá la tọọ lụka ohyẹẹkpẹ ịnyịnyị lẹ.

Chajị, irya omeme u-uhye nya ang nya imyi nya ugbinyịrọ kem, a kaa họ ká ọngịnyị kaa ri oluji nya Ohe Oluhye lẹ! Chajị, ọngịnyị ọlịnyị á kaa myị-ị kpa ịlọmwụ keji ha ehile nya Ohe Oluhye ka. Nya ịlẹhị ịnyị, ọngọ ọlịnyị á ka jẹ́-ẹ ju ihi nya ehile nya Ohe Oluhye myị́ kpong-kpong kaka.

Chajị, ang myị́ ang ịlẹ wuu ká Ohe Oluhye họ ẹ-ẹpwụ nya odehe ọlẹ jam charịnya la ẹhị ọrịrịị-rịrị gbe ụka ọlẹ ká Ohe Oluhye ka chịhị, ahị angịlẹ kahị ri anyị nyamwụ ịlam-ịlam wuu ehe lụka ohyẹẹkpẹ.

Chajị, ahị jẹ́ yẹkẹẹ, ang-abwọ ịlẹ wuu ká Ohe Oluhye họhọ odehe ọlẹ, ị jam ya ọnụ da awụlẹ ẹ-ẹpwụ nya eru ọchịchị nya ang ọjụjụ ọ-lala ịnya ang nya ọnyị ọmama ọlẹ kị juwa ẹ-ẹpwụ nyamwụ ịnyịnyịịnyị pyịyọọ daalẹ ọlẹ.