Popular Bible Verses from ALA IROM 4

Share

Ẹhị ọrịrịị-rịrị nya Ebiraham á pyị giri hi ọ-họ jịra nya ọnụ ọmyịmyị nya Ohe Oluhye ọọwa bwula ọmyịmyị ọlala ka lẹ ka. Ma, ọkọkọ nya ọọwa lẹ, ọmyịmyị ọlala nya Ebiraham la ọngịrị kịlahị-ịlahị, jaabwọ kọ juwa gwogbo ha Ohe Oluhye u-uhye nya ọọwa ịnyịnyịịnyị. Chajị, Ebiraham ayịdang dahịhile Ohe Oluhye wuu lẹpwụ-lẹpwụ yẹkẹẹ, jaabwọ ká Ohe Oluhye nyị myị ọnụ myị ha ọwa lẹ, Ohe Oluhye nyị la ọngịrị ka họ ọnụ ọmyịmyị ọọwa jịra ha ọwa ịnyị myị́ pyii lẹ.

Chajị, Ohe Oluhye ya ẹla rụ́ Ebiraham ụ-Ụpwụ Ịgọgọ ẹgẹlẹ yẹkẹẹ, “Am Ohe Oluhye hung adịda nya epwoja lụmẹ-lụmẹ lẹ.” Ọnụ ọmyịmyị ọwẹ ká Ohe Oluhye myị ha Ebiraham ịnyị lẹ, ọ juwa pyịyọọ ịnyịlẹhị, chajị Ọwa-à ri Ohe Oluhye ọlẹ ká Ebiraham myị la lẹ. Ohe Oluhye ọọwa a tị ri Ọngọlẹ kọ kaa wule angị gbugbu eji bwula igu, kaka la ọhịhị myịmyị lẹ. Ọwa tị myịmyị ri Ohe Oluhye Ọngọ kaa họ ká ang ịlẹ kị jiji ene ka, kaa ji myị́ ịnyịnyị lẹlẹ.

Chajị, Ohe Oluhye hu iJisọsị du warị kaka gbu wọnụ nya ịhọbịrị ịhọhọ nyahị wuu ju bala owule ịKịrayịsị eji bwula igu, chajị kọ ka bwula ịKịrayịsị ọọwa wahị lala alabwẹla ọnyịịla ị-ịlahị nya ịlọmwụ.

Chajị, ụka ọlẹ ká Ohe Oluhye byi Ebiraham yẹkẹẹ, “A ka ri adịda nya epwoja lụmẹ-lụmẹ.” Ma, Ebiraham á tị kpa ugbẹhị nyamwụ yẹ ịngịngịhyẹ ọlẹ kọ ka kpa dahịhile kpangga, ene kọọ kpa ọmyịmyị ọlala nyamwụ la ẹhị ọrịrịị-rịrị gbe ọ-họ jịra nya ọnụ ọmyịmyị ọọwa ugbeene kpong-kpong ka.

Ịnyị a du ká ọ-họ jịra nya ọnụ ọmyịmyị nya Ohe Oluhye ọọwa oyeye, do pịlẹ u-uhye nya ọmyịmyị ọlala kem lẹlẹ. Ọlịnyị, chajị kọ ka la gbadaa yẹkẹẹ, ọnụ ọmyịmyị ọọwa nyị ri ang ọgahị ododu ọlẹ ká Ohe Oluhye nyị hunọ ha anyị nya Ebiraham wuu. Ọlịnyị, chajị ká ọ-họ jịra nya ọnụ ọmyịmyị nya Ohe Oluhye ọọwa á ka ri ang omeme la angị juwa ju ihi nya ehile nya Ohe Oluhye kem kaka. Ma, chajị ká angịlẹ wuu kị juwa kpa ọkịlẹtụ nyaa wuu myị la Ohe Oluhye lala Ebiraham ka jẹ́-ẹ ye ọ-họ jịra nya ọnụ ọmyịmyị ọọwa lẹ. Chajị, Ebiraham a ri adịda nyahị ahị, angị myị la Ohe Oluhye wuu tụchawụlẹ lẹ!

“Ahị ọwawa juwa ha angịlẹ wuu ká Ohe Oluhye hịnyọhi ang inyibyi ịhọhọ nyaa wuu haa lẹ, bala angịlẹ ká Ohe Oluhye á kpa ahyẹẹrwẹrwa nyamwụ chị ang ke ibyi nya ịhọbịrị ịlẹ kị họ wuu ịnyịnyị lẹ. Ahị ọwawa ka juwa ha ọng myị́ ọng ọlẹ ká Ọngọlahị á juwa da ọhọbịrị ọhọhọ nya ọngọọwa ju nọ gbe ẹnụtụrụ nya eje ohyẹẹkpẹ kaka, ịnyịnyị.”

Chajị, ị da kpehe ụ-Ụpwụ Ịgọgọ yẹkẹẹ, “Ebiraham kpa ọkịlẹtụ nyamwụ wuu myị la Ohe Oluhye lẹ, Ohe Oluhye tịtị wọọ nya ọlabwẹla ọnyịịla ị-ịlahị nya ịlọmwụ ọ-ọlọọwa.”