Popular Bible Verses from ROMANOS 13

Share

Ukatsipana, jumanakax Jesucristo Tatitump isthapisipxam, janirak janchin munañanakapar jaysapxamti.

Jan khitirus manüpxamti, jan ukasti, jumanak pura munasiñanaki manüpxam; jaqi masipar munasirix, kuntix kamachix siski uk niyaw phuqxi.

Taqiniw marka apnaqir jilïr jaqinakarux jaysapxañama. Jilïr kankañax Diosat juti, utjkis ukanakasti jupan uchatawa.

Ch'amak arumax niyaw tukusiski, uru qhanaw niy jak'achasisinki; ch'amakan luräwinakap apanukupxañäni, ukatsti qhanamp isthapisipxañäni, kamisatix mä soldadox nuwasiñ yänakapampi isthapiski ukhama.

Munasiñax janiw khitirus kuna jan walsa lurkiti; mayninakar munasasti, kamachirjamaw phuqhasktan.

Taqinirus wakisitaparjam churapxam: Qullqi churañächi ukasti, churapxam; impuestonak churañächi ukasti, churapxam; yäqañ wakischi ukasti, yäqapxam, jach'añchañ wakischi ukasti, jach'añchapxam.