Popular Bible Verses from ROMANOS 12

Share

Janiy jumanakax jichha pacha saräwinakarjam jakxapxamti; jan ukasti, amtañanakam mayjt'ayapxam, ukhamat jumanakan jakäwiman sumäxañapataki, ukat Diosan munañap yatiñataki, kunatix askïki, kunatix munkañäki, kunatix chiqäki ukanaka.

Ukhamasti munat jilatanaka, Diosan khuyapayasiñap laykuw achikt'apxsma, jumanak pachpay jakkir waxt'äwjam luqtasipxam, qullana, ukhamarak Diosar kusisiykir luqtjama. Uka luqtäwiwa chiqpach yupaychäwixa.

Suyt'añamansti kusisitak jakasipxam; t'aqhisiñanaksti llamp'u chuymampi mutupxam; janipun Diosat mayisiñ armasipxamti.

Janiy ñanqhampix atipjayasimti, jan ukasti, askimpiy ñanqharux atipjam.

Maynit maynikamax jilapurjam munasipxam, purapat yäqasisa.

Maynit maynikamax chiqpach chuymampi munasipxam, ñanqha lurañ apanukupxam, ukatsti aski lurañar katuyasipxam.

Kawkhakamatix wakiski ukkhakamax taqinimpis suman jakasiñatak ch'amachasipxam.

Munat jilatanaka, jumanak purax jan ukhamat ukham lurjasipxamti, jan ukasti Diosar jaytapxam, jupaw mutuyaskani. Qillqatax siwa: “Nayaruw chiqapar uñjañax wakt'itu; nayaw mutuyaskä, siw Tatituxa” sasa.

Luräwinakansti jan jayrasipxamti, Diosatakix taqi chuyma lurapxam.

Diosax munasiñapan iwxa arunak nayar churatap laykuw taqi jumanakar sapxsma, jan maynis jumanak pachpax jilankatam amuyasipxamti, jan ukasti, kunatix wakiski ukhamak amuyasipxam, kuntix Diosax waxt'äwinak iyawsañamp chika churki ukarjama.

Janiy khitirus ñanqhat ñanqha kutt'ayapxamti; jaqinak nayraqatansti aski lurañatak ch'amachasipxam.

Jumanak taypin mä amtanik jakasipxam. Jan jach'a jach'a tukupxamti, jan ukasti, llamp'u chuymaninakjamäpxam. Janirak wali yatiñanjamas tukupxamti.

Juk'amp saskakiwa: “Uñisirimatix manq'at awtjatächi ukaxa, manq'añ churam, umat pharjatächi ukasti, um churarakim; ajanupasti p'inqapat wilaruw tukuni” sasa.

Uñisirinakamarux askimpiy uñjapxam. Ask lurapxam, janirak ñanqhachapxamti. Kusisitanakampix kusisipxam, jachirinakampisti jachapxarakim.

Diosan markap taypin pist'ayasirinakar yanapt'apxam. Qurpachasiñ thaqhirinakar sum katuqapxam.

Kamisatix mä sapa janchin walja chiqanak utjistuxa, janiw uka chiqanakax mä lurañak phuqhapkiti, ukhamarakiw jiwasanakax waljanïkasas Criston mä sapa janchirukiw tukxtan, ukatsti maynit maynikamax pachpa janchin mayar tukt'atäxtanwa.