Popular Bible Verses from ISAIAS 40

Share

Siya'y nagbibigay ng lakas sa mahina; at sa kanya na walang kapangyarihan ay dinadagdagan niya ang kalakasan.

Maging ang mga kabataan ay manghihina at mapapagod, at ang mga binata ay lubos na mabubuwal; ngunit silang naghihintay sa PANGINOON ay magpapanibagong lakas, sila'y paiilanglang na may mga pakpak na parang mga agila, sila'y tatakbo at hindi mapapagod, sila'y lalakad, at hindi manghihina.

Hindi mo ba nalaman? Hindi mo ba narinig? Ang PANGINOON ang walang hanggang Diyos, ang Lumikha ng mga dulo ng lupa. Hindi siya nanghihina, o napapagod man; walang makatatarok ng kanyang kaunawaan.

Ang tinig ng isang sumisigaw: “Ihanda ninyo sa ilang ang daan ng PANGINOON, tuwirin ninyo sa ilang ang lansangan para sa ating Diyos.

Ang damo ay natutuyo, ang bulaklak ay nalalanta; ngunit ang salita ng ating Diyos ay mamamalagi magpakailanman.

At ang kaluwalhatian ng PANGINOON ay mahahayag, at sama-samang makikita ng lahat ng laman, sapagkat sinalita ng bibig ng PANGINOON.”

Bawat libis ay matataas, at bawat bundok at burol ay mabababa; ang mga baku-bako ay matutuwid, at ang mga hindi pantay na dako ay mapapatag.

Kanyang pakakainin ang kanyang kawan na gaya ng pastol, kanyang titipunin ang mga kordero sa kanyang bisig, at dadalhin sila sa kanyang kandungan, at maingat na papatnubayan iyong may mga anak.

Itingin ninyo ang inyong mga mata sa itaas, at tingnan ninyo kung sinong lumikha ng mga ito? Siya na naglalabas ng kanilang hukbo ayon sa bilang; tinatawag niya sila ayon sa pangalan; sa pamamagitan ng kadakilaan ng kanyang kapangyarihan, at dahil sa siya'y malakas sa kapangyarihan ay walang nagkukulang.

Siya ang nakaupo sa balantok ng lupa, at ang mga naninirahan doon ay parang mga balang; siyang naglaladlad ng langit na parang tabing, at inilaladlad ang mga iyon na parang tolda upang tirahan

Magsalita kayo nang sa puso sa Jerusalem, at sabihin ninyo sa kanya, na ang kanyang pakikipagdigma ay tapos na, na ang kanyang kasamaan ay pinatawad, sapagkat siya'y tumanggap sa kamay ng PANGINOON ng ibayong bahagi para sa lahat niyang kasalanan.

Sinasabi ng isang tinig, “Ikaw ay dumaing!” At sinabi ko, “Ano ang aking idadaing?” Lahat ng laman ay damo, at lahat niyang kagandahan ay parang bulaklak ng parang. Ang damo ay natutuyo, at ang bulaklak ay nalalanta, kapag ang hininga ng PANGINOON ay humihihip doon; tunay na ang mga tao ay damo.

Narito, ang Panginoong DIYOS ay darating na may kapangyarihan, at ang kanyang kamay ay mamumuno para sa kanya; narito, ang kanyang gantimpala ay dala niya, at ang kanyang ganti ay nasa harapan niya.

Inyong aliwin, inyong aliwin ang aking bayan, sabi ng inyong Diyos.

Sino ang tumakal ng tubig sa palad ng kanyang kamay, at sumukat sa langit ng sa pamamagitan ng dangkal, at nagsilid ng alabok ng lupa sa isang takal, at tumimbang ng mga bundok sa mga timbangan, at ng mga burol sa timbangan? Sinong pumatnubay sa Espiritu ng PANGINOON, o bilang kanyang tagapayo ay nagturo sa kanya? Kanino siya humingi ng payo upang maliwanagan, at nagturo sa kanya sa landas ng katarungan, at nagturo sa kanya ng kaalaman, at nagpakilala sa kanya ng daan ng pagkaunawa?