Popular Bible Verses from HEBREO 13

Share

Ti panagbiagyo mayadayu coma iti kinaagum iti pirac; a mapneccayo coma iti adda cadacayo: ta isu met laeng kinunana; Saancanto a panawan, ket dicanto baybay-an.

Ni Jesu-Cristo isu met laeng idi calman, ken ita, ken iti agnanayon.

Iti casta mabalintayo a sao-en a sitatalged: Ti Apo ti tumulong caniac, diacto agbuteng: Ania ti mabalin nga aramiden ti tao caniac?

Ngem dicay lipatan ti panagaramid iti naimbag, ken iti panagririnnaman; ta ti Dios pagay-ayatanna unay dagiti cacastoy a daton.

Iti casta gapu kencuana idatontayo a cancanayon iti Dios, ti daton ti panangdaydayaw, cayatna a saoen, ti agaon cadagiti bibbibig a mangipaduyacyac iti naganna.

Ti panagasawa nadayaw coma cadagiti isu-amin, ket ti pagiddaan awan coma ti tulawna; ta ti Dios ocomennanto dagiti mannakiabig ken dagiti mannakicamalala.

Dicay lipatan ti panangiparangyo iti ayat cadagiti gangannaet; ta gapu itoy dagiti dadduma pinadagusda dagiti angel, nga dida nadlawan.

Ket ti Dios ti talna, a nangisubli manipud cadagiti natay iti dackel a pastor dagiti carnero, ni Apotayo a Jesus, gapu iti dara ti agnanayon a tulag, Aramidennacayo coma a naananay cadagiti isu-amin a banbanag, tapno aramidenyo coma ti pagayatanna, nga aramidenna coma cadatayo ti macaay-ayo iti imatangna, gapu ken Jesu-Cristo. Isu a madaydayaw coma iti agnanayon nga awan inggana. Amen.