Popular Bible Verses from I SAMUEL 17

Share

Idin kinuna ni David idi Filisteo, Sica umayca caniac a sicacampilan ken agraman maysa a pica, ken maysa a gayang: ngem siac umayac kenca iti nagan ni Jehova dagiti buybuyot, ti Dios dagiti buybuyot ti Israel, a sica kinaritmo.

Ket isu-amin daytoy a gimong ammoenna coma a ni Jehova saan a mangisalacan a maaramat ti campilan ken ti pica: ta ti gubat cucua ni Jehova, ket yawatnacayto iti imami.

Ket ni David kinunana, Ni Jehova a nangisalacan caniac iti cammauna ti leon, ken iti cammauna ti oso, isu isalacannacto iti ima daytoy a Filisteo. Ket ni Saul kinunana ken David, Inca, ket ni Jehova addanto kenca.

Ita nga aldaw ni Jehova yawatnacanto iti imac: ket cabilencanto, ket putolecto dayta olom; ket itedconto dagiti bangcay a natay ti buyot dagiti Filisteos ita nga aldaw cadagiti tumatayab dagiti langlangit, ken cadagiti atap nga an-animal ti daga; tapno isu-amin a daga ammoenna coma nga adda ti Dios iti Israel

Ket isu innalana nga iniggaman daydi sarucodna, ket nangpili iti lima a batbato a nalinis a naggapu iti waig, ket incabilna ida idi supot ti agpaspastor nga adda kencuana, a iti met laeng supotna; ket daydi pallatibongna adda idi iti imana: ket immasideg idi Filisteo.

Ket ni David kinunana ken Saul, Saan coma nga agcullayaw ti puso ti lalaki a gapu kencuana; ti adipenmo mapanto ken makicabilto itoy a Filisteo.