Popular Bible Verses from Math 6

Share

Kankï ciɛɛŋ de Nhialic aa kɔɔr, kekë piath ë yenpiɔ̈u, ku kakë kedhie abï ke ya juak nyïïn tëde week.

Yen duö wek ë diɛɛr në këde miäk, miäk abï diɛɛr ë ka ke yenguöp. Kööl tök abï kuɛth ë jam rɛɛcde yetök.

Yen a yɔ̈ɔ̈k ɛn week an, Duökï ë diɛɛr ë wëikun në ke bäk aa cam, ku në ka bäk aa dek, ku duökï ë diɛɛr ë wegup, në ke bäk aa cieŋ, wëi cïkï piɛth awärkï këcam, ku raan guöp cïï piɛth awär lupɔ?

Ku yïn, të lɛ̈ŋ yïn, ke yï lɔ ɣönduön ee yïn lɔ̈ŋ thïn, ku të cï yïn ɣöt thiöök, ke yï läŋ wuöördun raan ë kë cï thiaan tïŋ, ka bï yï cuööt ë kɔc nïïm.

Yen aa wek lɔ̈ŋ wäklë: Wääda nu paannhial, Tɔ rinku riëëuwë. Tɔ ciɛɛŋdu bɔ̈, Tɔ këdu piɔ̈ndu ee looi ë piny nɔm, Acït man ë ye looi paannhial.

Miɔc wook ëköölë në këcam kɔɔrku

Ku ye wook päl käny cath ë wook, Acït man pɛ̈l wok kɔc cath ë känykuɔ.

Ku du wook ë lɛɛr ë themic, Ye wo luök në kërac, Ciɛɛŋ ee këdu, riɛl ee këdu, Dhuëëŋ ee këdu, aɣet athɛɛr. Amiin.

Ku na yak kɔc päl ka cïk wööc, ke wuöörduön nu paannhial abï week aa pɔ̈l aya.

Wɔikï diɛt nhial, acïkï ee com, ku acïkï ee tem, ku acïkï rap ee kuöt ë adhɛn yiic, ku wuöörduön nu paannhial yen aye keek tɔ cäm. Ku week, cäkï ŋuän ë keek arëët?

“Duökï röt ë kuɛ̈t wëukun ë piny nɔm, të ye kɔ̈m keek riɔ̈ɔ̈k ku yek keth, ku të ye cuɛ̈ɛ̈r ɣöt pil kɔ̈u ku kuëlkï. Yak röt kuɛ̈t wëukun paannhial, të cïn kɔ̈m bï ke riɔ̈ɔ̈k ku cïkï ye keth, ku të cïn cuɛ̈ɛ̈r bï ɣöt pil kɔ̈u ku kuëlkï, të nu wëukun, yen abï piɔ̈ndun nu thïn aya.

Acïn raan duëër rɔt tɔ ye lïm de bäny kaarou, ka bï tök maan, ku nhiaar tök, ku abï tök dɔm ku tɔ tök cïn naamde. Wek cïï röt duëër tɔ ye lïïm ke Nhialic ku lïïm ke wëu ayadäŋ.

Ku na ye Nhialic wɛ̈ɛ̈l roor piɔ̈th ale, wɛ̈ɛ̈l nu ëköölë, ku miäk ke cuɛtë mɛɛc, cïï we bï piɔ̈th ë piöth wär piöthden arëët, wek kɔc dɛk ë gam?

Ku yïn, të miɔɔc yïn kɔc ë dhuëëŋdu, du ciin camdu ee tɔ ŋic këduön ë looi ë ciin cuënydu, ago dhuëëŋduön ee yïn kɔc miɔɔc ago ya këcïmoony, na miäk, ke Wuöördun, raan ee këcïmoony tïŋ, ka bï yïn cuööt ë kɔc nïïm.

“Yak röt tiit, duökï luɔiduön piɛth ë looi ë kɔc nïïm, ke bï tïŋ, na luɔikï wäklë, ke we cïn nïïm ariöpdun tëde wuöörduön nu paannhial.

“Ku cöök däŋ, të ya wek cäm rɛɛc, duökï wenyïïn ë kuaany cït man ë kɔc deyiic aguk, ayek kenyïïn tɔ rac, ë luɔi bï kek aa tïc ë kɔc nïïm nɔn ee kek kɔc reec cäm. Wek yɔ̈ɔ̈k ëyic an, “Acïk ariöpden guɔ yök. Ku yïn, të ee yïn cäm rɛɛc, ke yï tɔc yïnɔm ë miök, ku piny yïnyin, ke yïn cïï bï aa tïc ë kɔc nïïm nɔn ee yïn raan reec cäm, yïn bï tïc ë wuöördun nɔm tei, wuöördun raan ee kë cï thiaan tïŋ, abï yïn cuööt ë kɔc nïïm.