Popular Bible Verses from MATHI 6

Share

Isala atuwa sa Anyiza kadiyyi nu ma ketsatanwa tsü bha yalo, isathu pala hathu ha tsüdi pi nthu cüaben.

Tsalina dhitsü ghena leben ketizen nsa la; kepaghenanye dhitsü wi tsü ghanan ghena leben ketizen saben. Ghanan kesü wi tsü ghanan ghena ketan leben ketizen saya.

“Tsalina hi nthu kizaden, nthu kahang ghena mangwa dsa nu jjü, nyelela nthu gwo ghena athsümeni mangwa mphi nu kesa leben ketizen nsa lalo. Tsüdi miwi la kahangli na kedsakejjü miwi ma men benki nu agwo na athsümeni miwi ma men benki nsa kwe?

Isala nthu tsü kekhie kesa wi ajjen khenten pvü nu nkemu wi kebenwa nthu Ba wi kekhie salo. Isathu nthu Ba na nthu kekuthi wina tsüti sa keben tsü mu nu nthu kutimen sa cüben.

Tsalina nthu na hati kekhie kesa-u le: ‘Ithu Ba tang wi kebenwa: N-nyan ya kemethawa sayalo. No kadiyyi ya keghowa salo; Tang wi ti ayyi ha miwi no kesasa sayalo.

Nansü ghena nsenthu keyishü kedsakejjü pi ithu cülo.

Ithu na nyu kesami teshi pi kecü tsüti, ithu kesami teshi pi ithu cülo.

Ithu pi kemechu wi ndu thsü la, Isala Nkemehaiwa wina ithu noncca yalo.’

“Keujüla nthu na nyu kesami teshi pi cü lethu, nthu Ba tang wi kebenwa la nthu kesami teshi pi nthu cüben.

Awathu tsü ghang chilo: mathu na mangla pi yang nten, nu saghu pi asabe wi chi nten; isala nthu Ba tang wi kebenwa na mathu noncca ben ten le! Nthu na awathu miwi ma men nbenki kwe?

“He ayyi wi amaqhha na pvü, avüjjü na dsa, nu kaghanfüthu na yasa nu ghanfüya kesa pen wi ha nthu keben saghu nben lalo. Tsüti kesawa nye, tang wi amaqhha na pvü, avüjjü na dsa, nu kaghanfüthu na yasa nu ghanfüya nkeben pen wi tsü nthu keben saghu pi tsanqai yalo. Kepaghenanye nthu leben na keshüthangla nthu keben wi tsü benden.

“Anyi thola apvüwa keni nssümagha saya nben; ma kesü nanmeghü nu kepawa tizenben; ma kesü jühya nu kepawa nkhichi saben. Nthu na khiela Anyiza nu keben manyi qho kekuli saya nben.

Anyiza na agheja wi aghangthu nansü benla nu dhitsü wi pi annibhon wi mecang ketenthu tsi tsü sa cü. Ma tsüthu miwi nthu tsi sa cü nben kwe? Nthu kenondi khatila zeng nu!

Isala nthu na kehhatu nyi kiqa lethu pi nthu pvüshang ntsawa lela nchü thsüla sa tenlo. Isanu kekuli tsüna kekuthi wina salo. Isathu nthu Ba na nthu kekuthi wina kuli keben tsü muya nu nthu kutimen sa cüben.

“Anyithu yala nthu na mangwa saben khe chüya thsüle kesalina mathu tuwi ketan nthu keccüna kekulithu tsü nsa la metsilo. Keujüla nthu na anyithu tuwi ketan hathu ha saten lethu nthu na nthu Ba tang wi kebenwa tuwi akutimen mangla muya nben.

“Nthu na kezi wi nkenyeghe kesathu na sa keten ti ahathanathi nsa lalo. Nyu yala mathu zi benle kesa chüya thsüle kesalina mathu na atsi nsala benden. Hi nthu kizaden, mathu na akutimen tsüdi muyadha. Nthu na zi wa lethu, nthu mmi miya nu nthu li la hheyalo, isathu nthu Ba nkemu wi kebenwa ketan chükeben khe thola nthu na zi benle kesa chüya nben. Isathu nthu Ba na nthu kekuthi wina tsüti sa keben tsü mu nu nthu kutimen sa cüben.