Popular Bible Verses from Apokalupo 12

Share

Vi atura ra aia ia ratou i te toto o te Punua-mamoe, e i te tuatua ta ratou i akakite ra; kare oki ratou i inangaro i to ratou uaorai ora, kua akakoromaki ra e tae ua atu ki te mate.

E akarongo atura au i tetai reo maata i runga i te rangi, i te na ko anga e, Teia mai nei te ora, e te maroiroi, e te basileia, o to tatou Atua, e te mana o tana Mesia: kua uriia oki te akaapa i to tatou au taeake ki raro, ko tei akaapa ia ratou ki mua i te aroaro o to tatou Atua i te po e te ao.

Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao.

E teianei, kia rekareka, e te au rangi e, e ko kotou katoa oki ko tei noo i reira. E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.

E e tamaki tei runga i te rangi: ko Mikaela e tana au angela, tamaki atura i te taae; e kua tamaki maira te taae e tana au angela

Riri rava akera te taae i taua vaine ra, aere atura e tamaki atu i te toenga a tona uanga, ko tei akono i te au akauenga a te Atua ra, i tei mou marie i te tuatua-akakite a Iesu Mesia ra.

E AKAIRO maata oki tei kitea i runga i te rangi ra; e vaine kua kakau i te rā, e tei raro ake te marama i tona vaevae, e tei runga i tona upoko tetai korona etu raungauru ma rua: E kua nui aia, e kua aue iora i te mamae anau, aue atura oki kia anau vave.

Kua anau maira tana e tamaroa, tei iaia te tutara ki runga i te pa enua katoa ma te sepeta auri ra; e opukia maira tana tamaiti e apaiia atura ki runga i te Atua ra, i tona terono. Oro atura taua vaine ra ki te medebara, i te ngai i akonoia e te Atua nona, kia utuutuia aia i reira, e kia okotai tausani, e rua anere, e ono ngauru i te rā.

E kua kitea maira oki tetai akairo i runga i te rangi; e i na, e taae maata muramura, e itu mimiti, raungauru oki tara, e itu oki korona tei runga i taua au mimiti nona ra. E tōia maira te toru o te tuanga o te au etu o te rangi e te iku o taua taae ra, e tiria maira ki raro i te enua nei: kua tu iora taua taae ra ki mua i te aroaro o te vaine i vaitata i te anau ra, kia pou te tamaiti iaia kia anau ra.

E e puke peau e rua no tetai aeto maata tei o maiia no taua vaine ra, kia rere aia ki te medebara, i tona ngai e angaiiaʼi aia, e kia ope tetai tuatau, e nga tuatau, e te vaenga o tetai tuatau, kia ngaro atu ïa i te mata o te ovi ra. Kua akapuaki atura te ovi i te vai no roto i tona vaa, mei te vai puke ra, na murio i taua vaine ra, kia mānu ke aia i taua vai puke ra. Kua tauturu ra te enua nei i taua vaine ra, kua akaamama akera te enua i tona vaa, e kua inu pou rava i taua vai puke ra ta te taae i akapuaki atu no roto i tona vaa.