Popular Bible Verses from San Lucas 10

Share

Ra yuꞌu kuvi ra taxi ndie̱e̱ ndaꞌa ndo, ña kuañu ndo koo xiꞌin tisuꞌma; ra sa tiaa tu ndo nuu ña ndivaꞌa va. Ra ndia nii ña ndöꞌo ndo.

Ra saa ndakuiin Jesús, kachi ra saa xiꞌin ña: ―Marta, Marta, ña ndixa ke ndiee ni ndiꞌi ini va kun, chi iyoo ni chiñu nuu kun ña sandiꞌi yoꞌo. Ndi su iyoo va iin chiñu ña xiniñuꞌu vaꞌa ka, ra ña María ra chiñu vaꞌa va ke ndikaxin ña, chi nduꞌu ña xini soꞌo ña. Ra ndia nii na kindiäa ña yoꞌo ndaꞌa ña ―kachi ra xiꞌin ña Marta.

Ra saa ndakuiin ra maestro kan kachi ra saa: ―Suꞌva va ke kachi ña: “Na kuꞌvi ini yo kuni yo Ndioxi xiꞌin ndinuni nima yo, xiꞌin takundiꞌi ña tiaku yo, xiꞌin takundiꞌi ndie̱e̱ yo, xiꞌin takundiꞌi ña xini tuni yo; ra ta kuꞌva kuꞌvi ini yo xini yo mii yo, saa na kuꞌvi tu ini yo kuni yo inka na taꞌan va yo”, kachi ña ―kachi ra xiꞌin Jesús.

Ra saa ndikaꞌan ra xiꞌin ndia, kachi ra saa: ―Ña ndixa ke iyoo kuaꞌa ni va yuvi kumani kuni soꞌo tuꞌun Ndioxi. Ra ta kuꞌva iyoo itu ña xa vaꞌa sakee va yo, ke iyoo na, chi xa iyoo nduvi va na. Ña kan ke xiniñuꞌu ni va kaꞌan ndo xiꞌin Ndioxi ña na tiꞌvi ka ra, na chindiee taꞌan xiꞌin ndo, chi loꞌo ni va kuvi ndoꞌo na kaꞌan ndoso tuꞌun ra.

Saa nindakatuꞌun Jesús ra maestro xini ndiayu Ndioxi, kachi ra saa: ―¿Ndia iin ndia uni kan kuvi ndia kuu taꞌan tiaa ra takueꞌe xa ndia kuiꞌna kan tuvi yoꞌo? ―kachi ra xiꞌin ra. Saa ndakuiin ra maestro xini ndiayu Ndioxi kan kachi ra saa: ―Ra kundaꞌvi ini xini ñaꞌa kuvi ra, tuvi yuꞌu ―kachi ra. Ra saa ndikaꞌan Jesús xiꞌin ra kachi ra saa: ―Vaꞌa ni va ndakuiin kun. Kuaꞌan, ra saa ke na sa tu yoꞌo va ―kachi Jesús xiꞌin ra.

Ra vichin kuaꞌan ndo sanduvi ndo ña ndikaꞌan yu xiꞌin ndo. Ra kuenda ni na koo ndo, chi ta iyoo ndikachi vali ri kuaꞌan tiañu ndivaꞌyu va ke iyoo ndo.