Popular Bible Verses from Lúqá 3

Share

Jab sab logoṉ ne baptisma liyá, aur Yisúʻ bhí baptisma pákar duʻá máṉg rahá thá, to aisá húá ki ásmán khul gayá, aur Rúhuʼl Quds jismání súrat meṉ kabútar kí mánind us par utrá, aur ásmán se áwáz áí, ki Tú merá piyárá Beṭá hai; tujh se maiṉ ḳhush húṉ.

to Yúhanná ne un sab se jawáb meṉ kahá; Maiṉ to tumheṉ pání se baptisma detá húṉ, magar jo mujh se zoráwar hai, wuh ánewálá hai; maiṉ us kí jútí ká tasma kholne ke láiq nahíṉ; wuh tumheṉ Rúhuʼl Quds aur ág se baptisma degá.

Pas tauba ke muwáfiq phal láo, aur apne diloṉ meṉ yih kahná shurúʻ na karo, ki Ibráhím hamárá báp hai; kyúṉki maiṉ tum se kahtá húṉ, ki Ḳhudá in pattharoṉ se Ibráhím ke liye aulád paidá kar saktá hai.

Aur ab to daraḳhtoṉ kí jaṛ par kulháṛá rakkhá húá hai; pas jo daraḳht achchhá phal nahíṉ látá, wuh káṭá aur ág meṉ ḍálá játá hai.

jaisá Yashaʻyáh nabí ke kalám kí kitáb meṉ likhá hai, ki Biyábán meṉ pukárnewále kí áwáz átí hai, ki Ḳhudáwand kí ráh taiyár karo, Us ke ráste sídhe banáo. Har ek gháṭí bhar dí jáegí, Aur har ek paháṛ aur ṭíla níchá kiyá jáegá; Aur jo ṭeṛhá hai sídhá, Aur jo úṉchá níchá hai hamwár rásta banegá; Aur har bashar Ḳhudá kí naját dekhegá.