Popular Bible Verses from 1 Tímuthiyus 2

Share

Kyúṉki Ḳhudá ek hai, aur Ḳhudá aur insánoṉ ke bích meṉ darmiyání bhí ek, yaʻní Masíh Yisúʻ jo insán hai; jis ne apne áp ko sab ke fidye meṉ diyá, ki munásib waqtoṉ par is kí gawáhí dí jáe.

Pas maiṉ sab se pahle yih nasíhat kartá húṉ, ki munájáteṉ, aur duʻáeṉ, aur iltijáeṉ, aur shukrguzáríáṉ sab ádmíoṉ ke liye kí jáeṉ; bádsháhoṉ aur sab baṛe martabawáloṉ ke wáste is liye, ki ham kamál díndárí aur sanjídagí se amn o árám ke sáth zindagí guzáreṉ.

Pas maiṉ cháhtá húṉ, ki mard har jagah, bagair gusse aur takrár ke, pák háthoṉ ko uṭhákar duʻá máṉgá kareṉ. Isí tarah ʻaurateṉ hayádár libás se sharm aur parhezgárí ke sáth apne áp ko saṉwáreṉ, na bál gúṉdhne aur sone aur motiyoṉ aur qímatí poshák se; balki nek kámoṉ se, jaisá ḳhudáparastí ká iqrár karnewálí ʻauratoṉ ko munásib hai.