Popular Bible Verses from Yaxayas 53

Share

Twb yog vim peb tej kev txhaum nws thiaj raug ntaus nqaij ntuag ntshav nrog, twb yog vim tej kev phem uas peb ua, nws thiaj raug nplawm. Qhov uas nws raug txim txomnyem ntsuav, yog pab kom peb tau nyob kaj siab lug, nws raug nplawm twb yog kho kom peb tej kev mob kev nkeeg zoo.

Peb txhua tus zoo li tej yaj uas yuam kev lawm; peb sawvdaws nyias mus nyias ib txojkev raws li nyias lub siab nyiam, tiamsis tus TSWV muab peb lub txim uas tsimnyog peb raug tso rau nws ris.

“Tiamsis nws ris peb tej kev txomnyem thiab ris peb tej kev mob kev nkeeg, txawm yog nws pab peb npaum li ntawd los peb tseem hais tias qhov uas nws raug kev txomnyem twb yog Vajtswv rau txim rau nws.

Peb saib tsis taus nws thiab muab nws tso povtseg, nws raug kev txomnyem thiab nyiaj rawv txojkev mob; tsis muaj leejtwg yuav tig saib nws. Peb tsis quavntsej nws ib yam li nws tsis tsimtxiaj dabtsi.

“Nws raug tsimtxom thiab nws ntxhov siab kawg, tiamsis nws muaj lub siab mos siab muag, nws tsis hais ib los li. Nws zoo ib yam li tus yaj uas luag cab mus tua, thiab zoo ib yam li tus yaj uas luag tabtom muab txiav plaub los nws twb tsis quaj ib suab li.

Tus TSWV hais tias, “Kuv yeej pom zoo cia nws raug kev txomnyem. Nws tuag thiaj theej tau neeg lub txhoj thiab zam tau neeg lub txim. Yog li ntawd nws yuav pom nws tej xeebntxwv; nws yuav muaj sia nyob ntev, thiab nws yuav ua kom kuv tes haujlwm tiav.

Twb yog tus TSWV pom zoo kom nws tus tubtxib loj hlob ib yam li tsob ntoo uas nrhau cag tuaj ntawm thaj av qhuav. Nws lub cev ntaj ntsug tsis zoo nraug, peb thiaj tsis nyiam nws; nws tsis muaj ib qho zoo txaus nyiam, peb thiaj tsis ntshaw nws.

Yog li ntawd, kuv yuav pub koob meej rau nws; nws yuav tau nrog cov neeg uas ua tus loj thiab muaj hwjchim nyob; nws txaus siab tso nws txojsia tseg, nws los nrog cov neeg txhaum nyob; nws ris sawvdaws lub txim thiab thov tus Tswv zam lawv lub txim.”

Tom qab uas nws raug kev txomnyem dhau lawm, nws yuav rov muaj kev zoo siab dua ntxiv; nws yuav paub hais tias txojkev txomnyem uas nws raug tsis nkim nws lub zog. Kuv tus tubtxib ncaj ncees uas kuv txaus siab, yuav ris coob leej ntau tus lub txim, vim tej uas nws ua ntawd, kuv thiaj zam lawv lub txim.

Nws raug ntes, raug tsimtxom thiab raug coj mus tua povtseg los tsis muaj leejtwg quavntsej nws li. Twb yog vim peb sawvdaws lub txim, nws thiaj raug tua tuag.

Txawm yog nws yeej tsis tau ua ib qho txhaum thiab nws lub qhovncauj yeej tsis tau hais ib lo lus dag li los lawv cia li muab nws coj mus faus nrog cov neeg txhaum thiab faus rau hauv tus txivneej uas npluanuj lub qhov ntxa.”