Popular Bible Verses from Efexus 4

Share

Nej yuav tsum ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm.

Nej yuav tsum txo hwjchim, ua siab dawb siab zoo thiab ua siab ntev. Nej ib tug yuav tsum pab ib tug, sawvdaws thiaj paub hais tias nej sib hlub tiag.

Nej tsis txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog.

Nej yuav tsum muab nej lub siab phem, lub siab ua nruj ua tsiv thiab lub siab heev tso povtseg. Tsis txhob sib cav sib ceg, tsis txhob thuam lwm tus thiab tsis txhob xav ib yam phem hlo li.

Yog thaum twg nej chim, nej tsis txhob pub qhov uas nej chim ntawd ua rau nej ua txhaum thiab tsis txhob chim tas hnub. Tsis txhob cia dab Ntxwgnyoog tau kev ntxias nej.

Yog li ntawd, nej yuav tsum muab nej lub siab qub uas nej ibtxwm coj tso povtseg; lub siab qub uas niaj hnub ntxias kom nej ua kev phem kev qias ntawd tabtom yuav puastsuaj mus. Nej yuav tsum hloov dua siab tshiab. Nej yuav tsum muab lub siab tshiab los coj. Lub siab tshiab ntawd Vajtswv tsim zoo li Vajtswv tus yam ntxwv, sawvdaws thiaj pom hais tias nej ua nej lub neej ncaj ncees thiab dawbhuv.

Vajtswv tus Ntsujplig twb ua rau nej sib raug zoo lawm, thiab qhov uas nej sib raug zoo ntawd, twb rub nej los nyob ua ke sib haum lawm. Yog li ntawd, nej tsis txhob cia ib yam dabtsi ua rau nej nyob tsis taus ua ke.

Nws yog tus uas pub koob hmoov rau neeg, nws tsa qee leej ua timthawj, qee leej ua cov cev Vajtswv lus, qee leej ua xibhwb qhia Txojmoo Zoo, qee leej ua cov xibhwb qhia thiab qee leej ua cov saib cov ntseeg. Nws ua li ntawd twb yog nws qhia kom cov ntseeg paub ua Vajtswv tes haujlwm; cov ntseeg uas yog Yexus Khetos lub cev thiaj li yuav txawj loj hlob zuj zus mus txog thaum peb sawvdaws ua tau ib lub siab, ntseeg ib yam nkaus, paub tseeb Vajtswv tus Tub, thiab ua tau lub neej zoo ib yam li Yexus Khetos.

Thaum ntawd peb yuav tsis ua li tej menyuam yaus uas mloog cov neeg dag tej lus, thiab raws luag qab rau ub rau no. Cov neeg dag ntawd txhob txwm dag kom sawvdaws yuam kev xwb. Peb tsis txhob ua li lawv, peb yuav tsum muaj txojkev hlub thiab hais lus tseeb, peb thiaj yuav ua tau lub neej zoo rau txhua fab li Yexus Khetos uas yog lub taubhau.