Popular Bible Verses from 1 Petus 5

Share

Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.

Tiamsis thaum nej raug kev tsimtxom ib nyuag ntu dhau lawm, tom qab ntawd Vajtswv tus uas muaj koob hmoov nplua mias yuav pab kom nej ua tau neeg zoo kawg nkaus, thiab kom nej muab siab rau ntseeg Vajtswv heev ntxiv. Nws yuav txhawb nej lub zog kom nej nyob ruaj nrees. Nws yog tus uas muaj lub siab hlub nej kawg nkaus li. Nws yuav pub nws lub tshwjchim ci ntsa iab uas nyob mus ibtxhis rau nej cov uas twb nrog Yexus Khetos koom ib txojsia lawm.

Nej yuav tsum ceevfaj zov zoo tsis txhob nkees, rau qhov dab Ntxwgnyoog tus uas yog nej tus yeebncuab, nws mus mus los los ib yam li tus tsov ntxhuav uas quaj nrhiav tom tsiaj noj. Nej yuav tsum muab siab rau ntseeg thiab tawmtsam dab Ntxwgnyoog, rau qhov nej twb paub lawm hais tias cov kwvtij ntseeg uas nyob thoob plaws hauv qab ntuj no, lawv tabtom raug kev tsimtxom ib yam li nej raug thiab.

Yog li ntawd, nej yuav tsum txo nej lub hwjchim thiab cia Vajtswv tus uas muaj hwjchim kav nej. Yog nej ua li ntawd thaum txog hnub uas Vajtswv teem cia lawm, nej yuav tau ntsejmuag.

Ib yam nkaus li ntawd, nej cov uas yog tub hluas, nej yuav tsum mloog cov yawg laus tej lus. Nej txhua tus yuav tsum txo nej lub hwjchim thiab ib tug pab ib tug; rau qhov Vajtswv txojlus hais tias, “Vajtswv tawmtsam tus uas khavtheeb, tiamsis Vajtswv pub koob hmoov rau tus uas txo hwjchim.”