Popular Bible Verses from Zĩi 1

Share

Ŋánûa, kà su-kɔɔ̂ŋ sii támaa sɔlɔ ƃô, ka lii-nɛ̃ɛ kula, kpɛ́ni fêi, ka gɔlɔŋ a gɛɛ kálaa-lai su kɔɔ̂ŋɔɔ a ká kɛ̀ ka fɔlɔ-fɔlɔ.

À kɛ̀ táre à wàla kɛ́ káyêei, ka Ɣâla marê kɛ́, nyíi a sɛŋ tɛ̂ɛ núu kélee pɔ́ kpɛ́ni-kpɛni va maa-lôno kɛ̀ mài, gɛ̀ ní a pâi dɛɛ̂i kápɔ.

Nyíŋi é lɛ́ɛ kákili ŋá, ŋáwɛli-kɛ-maa-ƃelai. Tɔɔ núu kélee é m̀ɛnii mɛ́ni a maa félaa, é ǹóno-woo maa kpɛ́ɛ, ǹíi fé ŋwãna a maa félaa.

Ka tɔɔ fɔlɔ-fɔlɔ é dɔɔ̂i káa kákponôi kpɔ́ a gbanaŋɔɔ a gɛɛ ká kɛ́ a maa-waa-ƃela ká láa é fɛ́ɛ, sɛŋ da kélee ƃalâŋ fé kɛ̀ kâa.

Kɛ́lɛ, ka kɛ́ a ŋ̀óoi ŋɔtíi-kɛ-ƃela. Káfe kɛ̀ nɔ́ a mɛ̀ni-ƃêla, kákɛ kákpîŋ pɛ̀lɛ.

Lûwa káa ǹúui ma a ǹíi kpèle su-kɔɔ̂ŋ yêei, kpɛ́ni fêi, à tɔ̀ɔ zu-kɔɔ̂ŋ tí su, gɛ̀ ní a pâi fulu-laa ŋɔkâloŋ-ƃɔrɔi sɔlɔ ƃôi, nyíi Ɣâla a góno tée la diai yêei dí ŋ̀wɛli nii.

Sama-sɛŋ lɛ́lɛɛ kélee da sama-sɛŋ maa waa kélee da kûla kúmɛi-pere, nyíi-ŋai da pâ kúpɔ dí kúla Ɣâla yêei, nyíi gáa a gwaa-ponoɔɔ-ŋai kélee Dínâŋ. Maa fa fâleŋ. Ŋɔkwaa-ponoɔi ninîŋ fé ma.

Kpɛ́ni fêi, à kɛ̀ núu da káa nɔ́ a ŋ̀óoi-mɛni-nuu vé a maa-tii kɛ́-nuu, gɛ̀ ní, gáa nɔ́ yɛ̂ɛ ǹúui a gbɔɔ̂i-ŋɛi káa mɛ̃lɛ-mɛ̃lɛ sui. Kpɛ́ni fêi, a gbîŋ kàa nɔ́, é síɣe naa, é nia a maa félaa berei ma è kɛ̀ lai.

Ɣâla mɛni kɛ́ɛ nyíi maa waai, maa fé kara ni Ɣâla Nàŋ-nuui ŋɛ́i-tuɛi, ǹyaa ká ŋí, a gɛɛ núu é tee-lonii naa káa da pɔɔ-nɛyaa a tãi da kɛ̂ la mɛni-kpɔ̂lu sui, a gɛɛ ŋɔ́nɔ é gbîŋ kɛ́ a ǹúui nyíi zɔŋ fé kɛ̀ m̀a ŋ̀éniɛi su.

Su-kɔɔ̂ŋ à pà núu da kélee pɔ́, vé mò, nyɛɛ, “Ɣâla ƃe ńzu kɔ̀ɔŋ.” Kpɛ́ni fêi, núu fa Ɣâla su kɔ̀ɔŋ a mɛni nyɔ́mɔɔ, ǹyaŋ Ɣâla ǹyaa kpîŋ fa núu su kɔ̀ɔŋ. Kɛ́lɛ, su-kɔɔ̂ŋ a pâ núu kélee pɔ́ tãi gbîŋ tua-pere nyɔŋ-wɛliɛi a ziɣe la bere sã́ai mai.

Lii-nɛ̃ɛ é kɛ́ kúƃarâŋ-nuui ma nyíi Ɣâla a maa tɛ́ ŋɔkôlo-laai sui.