Popular Bible Verses from ဆာလံကျမ်း 103

Share

အို ငါ့​စိတ်ဝိညာဉ်​၊ ထာဝရဘုရား​ကို ကောင်းချီးထောမနာ​ပြု​လော့​။ ကိုယ်တော်​၏​ကျေးဇူး​တော်​အပေါင်း​ကို မ​မေ့လျော့​နှင့်​။

ကိုယ်တော်​သည် သင်​၏​အပြစ်​အလုံးစုံ​တို့​ကို ခွင့်လွှတ်​၍ သင်​၏​အနာရောဂါ​ရှိသမျှ​တို့​ကို ပျောက်ကင်း​စေ​တော်မူ​၏​။ သင်​၏​အသက်​ကို သေတွင်း​ထဲမှ​ရွေးနုတ်​၍ သင့်​ကို မေတ္တာကရုဏာ​နှင့်​သနားစုံမက်​ခြင်း​သရဖူ ဆောင်း​ပေး​တော်မူ​၏​။ သင်​၏​ဘဝ​ကို ကောင်းမြတ်​သော​အရာ​ဖြင့် ပြည့်စုံကြွယ်ဝ​စေ​တော်မူ​သဖြင့် သင်​၏​ပျိုရွယ်မှု​သည် လင်းယုန်​ကဲ့သို့ အသစ်ပြုပြင်​ခြင်း​ကို​ခံရ​၏​။

အို ငါ​၏​စိတ်ဝိညာဉ်​၊ ထာဝရဘုရား​ကို ကောင်းချီးထောမနာ​ပြု​လော့​။ ငါ​၏​အထဲ​၌ ရှိသမျှ​တို့​၊ ကိုယ်တော်​၏​သန့်ရှင်း​သော​နာမ​တော်​ကို ကောင်းချီးထောမနာ​ပြု​ကြ​လော့​။

ဖခင်​သည် မိမိ​၏​သားသမီး​များ​ကို သနားစုံမက်​သကဲ့သို့ ထာဝရဘုရား​သည် မိမိ​အား​ကြောက်ရွံ့​သော​သူ​တို့​ကို သနားစုံမက်​တော်မူ​၏​။

အရှေ့​အရပ်​သည် အနောက်​အရပ်​နှင့်​ဝေးကွာ​သည့်​အတိုင်း ကိုယ်တော်​သည် ငါ​တို့​ကျူးလွန်​သော​အပြစ်​များ​ကို ငါ​တို့​နှင့်​ဝေးကွာ​စေ​တော်မူ​၏​။

ထာဝရဘုရား​သည် သနားစုံမက်​တတ်​သော​သဘော​၊ ကျေးဇူးပြု​တတ်​သော​သဘော​၊ စိတ်ရှည်​သော​သဘော​၊ မေတ္တာကရုဏာ​ကြွယ်ဝ​သော​သဘော​ရှိ​တော်မူ​၏​။

ငါ​တို့​၏​အပြစ်​နှင့်အညီ ငါ​တို့​အား ပြု​တော်​မ​မူ​။ ငါ​တို့​၏​ဒုစရိုက်​နှင့်အညီ ငါ​တို့​အား တုံ့ပြန်​တော်​မ​မူ​။ အကြောင်းမူကား မြေကြီး​အပေါ်​၌ ကောင်းကင်​သည် မြင့်မား​လှ​သည့်​အတိုင်း ကိုယ်တော်​ကို ကြောက်ရွံ့​သော​သူ​တို့​အပေါ်​၌ မေတ္တာကရုဏာ​တော်​သည် ကြီးမား​လှ​ပေ​၏​။

ထာဝရဘုရား​သည် မိမိ​၏​ပလ္လင်​ကို ကောင်းကင်ဘုံ​၌ တည်​တော်မူ​၏​။ ကိုယ်တော်​၏​နိုင်ငံ​တော်​သည်​လည်း အရာခပ်သိမ်း​တို့​ကို အုပ်စိုး​တော်မူ​၏​။