Popular Bible Verses from Maku 13

Share

Pirujẽ yvy pewarà kõ napenesata'ãi erewarà mõ. Eremĩgwai kõ tè pejẽ rewarà mõ, pemomorijauvaytà penereko kupa. Ajamã'ẽ a'evo penereko kupa remẽ, pejimokasi jẽ ikõ ere pejipykãtã nẽ, a'e pejẽ. Ãmẽ sõsi peiko karuarutà erena pè epyri ãmẽ, e'i Jesu ijupe kõ.

Ajawyi tapetekokuwa pemãrãmoa'u peiko! a'e pejẽ. Napekuwa amãtejẽ'ãi manyvo remẽ avãe tarà mijẽ mã'ẽ, e'i Jesu.

E'i jẽ Jesu: – Aje ojikõ'õ mãe kõ pepyytà peneraa tekoua kuwaparà kõ rovake penereko. Tapejimonyi e'ã ikõ a'evo penereko kupa remẽ peiko nẽ, a'e pejẽ. “Moma'e a'età põkõ a'evo remẽ?” tapejẽ e'ã pejimopirai rõmõ. Janejare'e 'Ãg tẽ tesõ omojikuwatà peayvu rã pejẽ tapemojenu ãmẽ. Ajawyi pevote rõwã pejẽtà. Aje Janejare'e 'Ãg ayvu rupi tè peporegetatà ijupe kõ ãmẽ, e'i Jesu ijupe kõ.

Ãmẽ si yva opatà ky'y. Yvy opa tary ve. Eayvukwerà ãmẽ nopa'ãi, e'i Jesu wemimo'ekwerà kõ pè.

E'i jẽ Jesu: – Ava nokuwa amãtejẽ'ãi evãea 'arà rã. Nojikuwa'ãi manyvo remẽ. Mape kwaray remẽ. Mã jay remẽ. Nojikuwa'ãi wete si! Janejare'e remĩgwai yvapewarà kõ ve nokuwa amãtejẽ'ãi. Ije ipe, Janejare'e Ra'yry rõmõ teipe aiko. Ajamã'ẽ nakuwaive evãe tarà 'arà. Papa rõmõ'ĩte a'evoa okuwapa amãtejẽ.

Ajaire kee jaa ojenu jenutà pejẽ: “Ojiapisi kupa upa”, ejaa. Ãmõ, “Ojiapisità ojee maevo kupa”, ejaa ojenutà. A'evo ipe remẽ tapejimonyi e'ã ikõ aepo jaa renu nẽ. A'evo 'evotà rã'ĩ evãea renone. Navãe'ãive a'evo remẽ ajamã'ẽ, e'i Jesu.

Ãwĩvo ve napekuwa'ãi evãea 'arà, e'i. Ma'e remẽ karumẽ tè ajotà. Ma'e remẽ pyaikatu. Ma'e remẽ masakara je'ẽ remẽ. Ma'e remẽ ji'ive. Ajawyi tapemoa'u katu jẽ ikõ evãea nẽ, a'e pejẽ. Tapetekokuwavay ikõ peiko nẽ! Ãmẽ tè oke mã'ẽ vo 'ejẽ rõwãtà poroesatà avãe, py'awarà mõ avãe remẽ. Ajawyi tapemãrãmoa'u jẽ ikõ peiko nẽ! a'e pejẽ. Ãwitõ aepo a'e pejẽ, ãwĩvo ve pirujẽ ekoty rewarà kõ pè aepo a'e teve, e'i Jesu wemimo'ekwerà kõ pè.

Ãmõ yvy pewarà kõ opõ'ãtà ãmõ ate'y kõ rè. Ojiapisità ojeeve kupa, e'i. Ojimomojy tètà ãmẽ kupa, e'i. Ãmõ, yvy tena tena rupi yvy otytytà. Ãmõ, tena tena rupi tyavorusu okwatà rã'ĩ. [Ãmẽ tè pekuwatà ke'ĩ evãea 'arà.] Ãwitõ ipuru'au mã'ẽ okuwa omemy tarà remẽ ayay tè rã'ĩ iko, ãwĩvo ve pekuwatà ke'ĩ avãerĩ mã'ẽ 'arà, e'i.

Pirujẽ yvy yvy wãnà kõ pè Janejare'e ayvu e'eay erewarà tojenu rã'ĩ, ajo mijẽ e'ãve, e'i. Yvy popy kyty ekoty rewarà kõ omojenu jenutà, tokuwa kupa. A'evo paire tè ajo tarà mijẽ, e'i Jesu wemimo'ekwerà kõ pè.

Ma'e, “Janejare'e Remimuu rõmõ tè ije ajo”, e'ità pejẽ mãe kõ pè. Ijatyray mirà kõ aepo e'ità owari rõmõ. Poromoripeaytà aepo jaa rè kupa. “Aje” tapejẽ ywe'e tite e'ã aepo jaa pè ajamã'ẽ nẽ, e'i Jesu.

E'i jẽ Jesu ijupe kõ: – Tapemãrãmoa'u jẽ ikõ peiko nẽ, a'e pejẽ. Penõvajãrà kõ pepyytà jõvijãgwerà kõ atyry rovake peneraa. Nivoi mã'ẽ omo'y teywetetà ovake kõ pene kupa. Penõpã nõpãokatà teve kupa. Janejare'e ayvu rè jimo'ea retã kõ pè penõpã nõpãtà kupa. Ekoty rewarà rõmõ peiko rewarà mõ ojimoãpãtà pene kupa. Ajawyi peneraatà jõvijã wasu kõ gyty tapemomorijauoka kupa. A'e kõ rovake pe'ãtà eayvu mojenu ijupe kõ ãmẽ, e'i.

Kee e'i mãe kõ oiko tevetà, pe'ĩrõwã: “Janejare'e Remimuurerà tè ije”, e'i rã'ãgatà mãe kõ. Ãmõ, “Janejare'e ayvu mojenuarà tè ije”, e'i rã'ãgatà mãe kõ. [Iwarità tè kupa.] A'e kõ mãrãnà jikuwa e'ã iteetejẽ mã'ẽ oinõtà jane kõ rovake kupa, poromoripea rõmõ. “Janejare'e remipyteporo kõ tẽ tesõ tamoripe”, e'ità oupe kupa.

E'i jẽ Jesu ijupe kõ: – Ãmẽ jimomorijaua paire, nipuku ywe'e'ãi ky'y remẽ, keetà. Ãmẽ si kwaray omytà. Ãmõ, naeny'ãi jay teve ky'y. Ãmõ, jaytata kõ yva pe wyi okukuità teve. Yvag onãrarãmatà ky'y, ipupewarà kõ revejẽ.