Popular Bible Verses from 1 Yauhas 4

Share

Hauv txojkev hlub tsis muaj txojkev ntshai. Tiamsis txojkev hlub uas muaj puv npo lawm yuav ntiab txojkev ntshai tawm mus, vim txojkev ntshai ntsig txog txojkev txiav txim xwb. Tus uas ntshai yeej tsis tau muaj txojkev hlub uas tiav kiag.

Cov menyuam yaus 'e, nej yog Vajtswv li, thiab kov yeej lawv lawm, rau qhov tus uas nyob hauv nej loj dua tus uas nyob hauv ntiajteb.

Peb hlub vim Vajtswv xub hlub peb ua ntej.

Nej cov uas kuv hlub, cia peb ib leeg hlub ib leeg, rau qhov txojkev hlub yog los ntawm Vajtswv los, thiab txhua tus uas muaj kev hlub kuj yug ntawm Vajtswv los thiab paub Vajtswv.

Tus uas tsis muaj kev hlub kuj tsis paub Vajtswv vim Vajtswv yog txojkev hlub.

Txojkev hlub yog li no, tsis yog peb hlub Vajtswv tiamsis Vajtswv hlub peb thiab txib nws tus Tub los ua yam uas xyeem ntxuav peb lub txim.

Cov uas kuv hlub, yog Vajtswv hlub peb li no, tsim nyog peb sib hlub ib yam li ntawd.

Vajtswv txojkev hlub kuj tshwm rau peb pom li no, yog Vajtswv txib nws tib tug Tub los rau hauv lub ntiajteb kom peb thiaj muaj txojsia nyob ntawm tus Tub ntawd.

Yog leejtwg hais tias, “Kuv hlub Vajtswv,” tiamsis nws tseem ntxub nws kwv nws tij, nws kuj hais dag xwb, vim tus uas tsis hlub nws kwv nws tij uas qhov muag pom, nws yuav hlub tsis tau Vajtswv uas qhov muag tsis pom.

Leejtwg lees tias Yexus yog Vajtswv tus Tub, Vajtswv nyob hauv tus ntawd thiab tus ntawd nyob ruaj hauv Vajtswv.

Tej lus nkaw no peb tau ntawm Vajtswv los hais tias tus uas hlub Vajtswv nws yuav tsum hlub nws kwv nws tij thiab.

Cov uas kuv hlub, tsis txhob ntseeg txhua tus ntsuj plig, tiamsis yuav tsum tshuaj saib tej ntsuj plig ntawd yog los ntawm Vajtswv los tsis yog, vim tias muaj cov cuav xibhwb cev lus coob coob tawm mus rau hauv lub ntiajteb. Nej yuav paub Vajtswv tus Ntsuj Plig yog qhov no. Txhua tus ntsuj plig uas lees hais tias Yexus Khetos tau los yug ua neeg, thiaj yog los ntawm Vajtswv los.

Txhua tus ntsuj plig uas tsis lees paub Yexus yeej tsis yog los ntawm Vajtswv los. Tus ntsuj plig ntawd yog Khetos tus yeeb ncuab uas nej yeej hnov hais tias yuav los thiab nimno kuj nyob hauv lub ntiajteb lawm.