Popular Bible Verses from Juan 17

Share

Se kedita te sakop ta, ibeg ko inangen no dan otaw ontò egpenimanem pineokit te kebenalan lekat kamno, so benal se kedakel te kagi nikaw.

Seini se otaw doen kaling pedowan wedad temanan, se otaw netaga-taga kamno, sebad no se ontò benal Timanem, aw netaga-taga heman kanak, si Jesu Cristo insogò no dini te keneyonan.

“Kenà olò sakop ta seini se intawal-tawal ko den diyà kamno, meneng kedita heman te doma otaw memenal kwani kanak pineokit te itoladà dan kandan. Ibeg ko megsebad dan te pedowan, iling te pegsebad te pedowan ta seini, so sikona Amà, diyà ka kanak, aw diyà a heman kamno. Iling heman kenyan, ibeg ko diyà dan kenita, amon memenal se kedita te otaw dini te keneyonan te insogò a nikaw.

Memoyò a den kamno kenà amon ebaten no dan lekat te otaw egtaking te medaet dini te keneyonan, meneng ibeg ko meg-ipat ka kandan amon eked dan keekali i Satanas.

Imbegay ko den kandan se kelangkaw imbegay no kanak, amon megsebad dan te pedowan iling te pegsebad te pedowan ta, so diyà a kandan aw diyà ka kanak. Ibeg ko, ontò dan megsebad te pedowan amon ketegahan te kedita te otaw dini te keneyonan te sikona se simogò kanak, aw dakel se pedowan no kandan iling te kedakel te pedowan no kanak.