Popular Bible Verses from Genesis 27

Share

Mananu na sanang dinan na ka ning Dios king ambun ning banua, at gabun a mataba, at labis-labis a pupul ampon alak. Suyuan da ka sana ding tau, at dukuan da ka sa ring bansa. Panginuan da ka ring kapatad mu, at dukuan da ka ring anak nang ima mu. Misumpa la sana ring maniumpa keka, at mibendisyunan la ring magbendisyun keka.

Nganang Esau, Jacob ya pin ing lagyu na, uling mekatadua na na ku pirait. Ing minuna, kinua ne ing katuliran ku bilang pangane at ngeni kinua ne pa ing bendisyun mu a mangaintulid kanaku. Kanita nganang kinutang, Ala na kayu waring mitagan pang bendisyun para kanaku?

Bandang tauli migsalita ya i Isaac at ngana kang Esau, Alang matabang gabun para keka, ala munamang ambun a ibat banua. Mie ka kapamilatan ning kekang pataram, at suyuan ing kapatad mu; potang lumaban ka milako ka king pamaniuyu king kapatad mu.

Oneng sindu nang Esau ing pamakisabi nang mayap kang tata na. Ngana, Metung kayu wari bendisyun, tatang? Bendisyunan yu ku naman sana! Menangis yang masikan i Esau.