San Mateo 5
5
Jo³-sˀin² nca³ qui³nchja⁴ya³ Jesús ya⁴ ni³nto³
(Lc. 6:20-23)
1Cˀia⁴ nca³ tsa³ve³tsˀi³ cho⁴ta⁴, qui³mi³ ya⁴ ni³nto³. Ya⁴ tsa³cˀe²jna³, cˀia⁴ ji³cho²con³-le⁴ cho⁴ta⁴-le⁴.
2Cˀia⁴ tsa³cˀe¹tsˀia⁴ nca³ qui³nchja⁴, tsa³ca³co¹ya³-le⁴, cˀoi⁴qui³tso²: 3Jo¹ to⁴nta³-le⁴ je² xi³ yo⁴ma⁴ cjia³ya³con³, nca⁴ tsˀe⁴ ni¹ cjoa⁴te¹xo³ma³-le⁴ ncˀa³jmi³. 4Jo¹ to⁴nta³-le⁴ je² xi³ cji³ˀntia¹, nca⁴ je² xi³ coan⁴je³con³. 5Jo¹ to⁴nta³-le⁴ je² xi³ i³nta³jin³, nca⁴ je² xi³ scoe¹cjoa⁴tjao² je² son³ˀnte³-vi⁴. 6Jo¹ to⁴nta³-le⁴ je² xi³ vao³-le⁴, cˀoa⁴ xi³ fa³ti²-le⁴ cjoa⁴ xi³ cjoa⁴qui²xi⁴, nca⁴ coan⁴squi³. 7Jo¹ to⁴nta³-le⁴ je² xi³ ma³ma⁴con³, nca⁴ je² xi³ sˀe⁴-le⁴ cjoa⁴ma⁴ta³con². 8Jo¹ to⁴nta³-le⁴ je² xi³ tsje³ ni⁴ma⁴-le⁴, nca⁴ je² xi³ scoe⁴ Ni³na¹. 9Jo¹ to⁴nta³-le⁴ je² xi³ si¹qui³njen³nchˀan¹, nca⁴ je² xi³ ˀnti¹-le⁴ Ni³na¹ cˀoin¹-le⁴. 10Jo¹ to⁴nta³-le⁴ je² xi³ cjoa⁴ñˀain³ fa³ˀa¹ xi³ tˀa³tsˀe⁴ cjoa⁴qui²xi⁴, nca⁴ je² xi³ cjoa⁴te¹xo³ma³-le⁴ ncˀa³jmi³ tjin¹-le⁴. 11Jo¹ to⁴nta³-no³ cˀia⁴ nca³ no²cjoa⁴ˀaon³-no³, cˀia⁴ nca³ fi²tjen⁴nqui³ co²ntran⁴-no³, cˀoa⁴ nca³ coi⁴tso⁴-no³ nca³yi³je³ xi³ chˀao³ tjin¹ xi³ tˀa³tsˀan⁴, nca³ en¹nti³so³ nchja⁴. 12Tˀe²tsjoao³-ta³con²³, cˀoa⁴ tˀe²jnco³-ta³con²³, nca⁴ je² chji¹-no³ nˀion¹ tse³ coan⁴ ya⁴ ncˀa³jmi³. Cˀoa⁴-sˀin² qui³tjen⁴nqui³co²ntran⁴-le⁴ je² xi³ qui³nchja⁴ya³ tˀa³tsˀe⁴ Ni³na¹, xi³ ti¹tjon² tjio¹-no³.
Na⁴xa⁴-le⁴ son³ˀnte³. Lˀi¹-le⁴ son³ˀnte³
(Mr. 9:49-50; Lc. 14:34-35)
13Jon² nio¹³ na⁴xa⁴-le⁴ son³ˀnte³, cˀoa⁴ tsa² je² na⁴xa⁴ cha⁴jta³, jo¹-sˀin² coan⁴ nqui²ntia³-ni³ cˀoai⁴-le⁴ jta⁴. A³li² ti⁴jme³-ni³ chji¹-le⁴, to⁴sa³ si⁴cˀa³tjen⁴, ca²ti³ncha³ne² cho⁴ta⁴. 14Jon² nio¹³ lˀi¹-le⁴ son³ˀnte³. Jnco³ na⁴xi⁴na³nta¹ xi³ ti¹jna³son² ni³nto³ li²coi³ coan⁴ sˀe⁴ˀma³. 15Ni⁴ca³nti²-jin² sˀe³tˀa³ˀi¹, ni⁴ya⁴-jin² sˀe³jna³nqui³-le⁴ jnco³ ca²xa⁴choa⁴, to⁴nca³ ya⁴² sˀe³jna³son² jña³ sa³tio²son² ca³nti², cˀoa⁴ si⁴²ˀi³sen³-le⁴ nca³tsˀi³ xi³ tjio¹ ya⁴ ntˀia³. 16Cˀoa⁴-sˀin² ca²ta³ma³ˀi³sen³-le⁴ lˀi¹-no³ nqui³xcon⁴ cho⁴ta⁴, jme¹-ni³ nca³ scoe⁴-si¹ni³ xa¹nta³-no³, cˀoa⁴ cˀoa⁴sje³je³ya³-si¹ni³ Nˀai³-no³ xi³ ti¹jna³ ncˀa³jmi³.
Jesús ja³ˀai³ si¹jnco³ cjoa⁴te¹xo³ma³
17A³li² ni²cja³ˀai³tsjen³-jion²³ tsa² cjoa⁴te¹xo³ma³ je²ˀe⁴ si³qui³xo²ya³, ni⁴je²-jin² xi³ qui³nchja⁴ya³ tˀa³tsˀe⁴ Ni³na¹. Li²coi³ je²ˀe⁴-nia³ nca³ si³qui³xo²ya³, to⁴nca³ je²ˀe⁴ si³jnco³-nia¹³ cjoa⁴te¹xo³ma³. 18Xi³ cjoa⁴qui²xi⁴ xi³ xin³-no³, jo³ sa³ˀnta³ nca³ cjoe⁴tˀa³ ncˀa³jmi³ cao⁴ son³ˀnte³, ni⁴jnco³-jin² letra, ni⁴jnco³-jin² choa⁴ xi³ cha⁴ xi³ tsˀe⁴ cjoa⁴te¹xo³ma³-vi⁴, sa³ˀnta³ nca³ coan⁴jnco³ cjoa⁴te¹xo³ma³-vi⁴ nca³yi³je³. 19To⁴ˀya³-ni³ve⁴ xi³ cˀoa⁴sje³nqui³ jnco³ cjoa⁴te¹xo³ma³-vi⁴, nta³ tsa² to⁴choa³ na⁴cji³-sa³, cˀoa⁴-ti⁴sˀin² coa⁴co²ya³-le⁴ cho⁴ta⁴, cjai¹nca³ to⁴ˀnti¹ cˀoin¹-le⁴ ya⁴ cjoa⁴te¹xo³ma³-le⁴ ncˀa³jmi³. To⁴nca³ to⁴ˀya³-ni³ve⁴ xi³ cˀoa⁴sˀin⁴² xi³ cˀoa⁴ti⁴-sˀin² coa⁴co²ya³, je²-vi⁴ xi³ ncˀa³ cˀoin¹-le⁴ ya⁴ cjoa⁴te¹xo³ma³-le⁴ ncˀa³jmi³. 20Nca⁴ cˀoa⁴²xin³-no³, tsa² je² cjoa⁴qui²xi⁴-no³ xi³ tsi² tsa² nqui²sa⁴ tse³ coan⁴ cao⁴-ni³ tsa² xi³ tsˀe⁴ cho⁴ta⁴ scribano cao⁴ cho⁴ta⁴ fariseos, ni⁴cˀia⁴-jin² coi⁴tja¹sˀaon³ ya⁴ cjoa⁴te¹xo³ma³-le⁴ ncˀa³jmi³.
Jo³ tso² Jesús xi³ tˀa³tsˀe⁴ cjoa⁴jti³
(Lc. 12:57-59)
21Qui³no²ˀya²-nio¹³ jo³ tsa³cˀin²-le⁴ nˀai³jcha¹cjin³: A³li² ni²cˀen³-jin²³. Tsa² ˀya³ xi³ si⁴²cˀen³, cji³ne²-le⁴ cjoa⁴ñˀain³. 22To⁴nca³ an³ xin³-no³, tsa² jnco³ xi³ coan⁴jti³-le⁴ cao⁴ ntsˀe⁴, cji³ne²-le⁴ cjoa⁴ñˀain³. To⁴ˀya³-ni³ve⁴ xi³ chˀao³ coi⁴tso⁴-le⁴ ntsˀe⁴ en¹tsˀen⁴, cji³ne²-le⁴ cjoa⁴ñˀain³ nqui³xcon⁴ cjoa⁴te¹xo³ma³. To⁴ˀya³-ni³ve⁴ xi³ sca¹-li² coi⁴tso⁴-le⁴ ntsˀe⁴, cji³ne²-le⁴ cjoa⁴ñˀain³ ˀnte³ jña³ nca³ ti¹ti² lˀi¹. 23To⁴coi³, tsa² cjoa²ˀai⁴coai⁴ cjoa⁴tjao²-li⁴ ya⁴ son²xta², cˀoa⁴ tsa² ya⁴ cjoa⁴ˀai¹tsjen³-li² nca³ ntsˀai⁴ tjin¹ˀi⁴tse¹-le⁴ cjoa⁴co²ntran⁴ tˀa³tsi⁴, 24tˀe²jnai³ cjoa⁴tjao²-li⁴ ya⁴tˀa³ son²xta², cˀoa⁴ tˀin³ ti¹tjon²-cjoan²la² ti⁴mi²yo⁴ nqui²jnco³cˀai²³ ntsˀai⁴, cˀoa⁴ cˀia⁴ nčhoai¹³, cˀoa⁴ tˀai²tˀai³ cjoa⁴tjao²-li⁴ˀni³. 25Nti⁴ton⁴ cho⁴va²nta³-nio³ cao⁴ xi³ jti³que³-li², to⁴tjen⁴ nca³ ti³ˀmi³coai⁴ ya⁴ ntia⁴², jme¹-ni³ nca³ je² xi³ jti³que³-li² li²coi³ tsjoa¹tˀa³-si¹ni³li² xca²le⁴, cˀoa⁴ je² xca²le⁴ sca⁴ni²tˀa³-li² policía, cˀoa⁴ sca⁴ni²sˀen³-li² nto⁴ya¹. 26Xi³ cjoa⁴qui²xi⁴ xi³ xin³-le²³, nca³ li²coi³ ti⁴coan⁴ coi²tjo⁴-ni³ ya⁴-ve⁴ sa³ˀnta³ nca³ cˀoe¹chji¹ntjai² yao³-li⁴ nca³yi³je³ jo³ tjin¹ xi³ cji³ne²-li⁴.
Jo³ tso² Jesús xi³ tˀa³tsˀe⁴ cjoa⁴cha³jnqui³
27Qui³no²ˀya²-nio¹³ nca³ cˀoi⁴qui³tso² cjoa⁴: A³li² ni²cha³jnqui³-jin²³. 28To⁴nca³ an³ xin³-no³: To⁴ˀya³-ni³ve⁴ xi³ co³tsen³-le⁴ jnco³ chjon⁴² nca³ ma³xcai⁴²-le⁴, je³qui³si³cha³jnqui³ ja⁴jin³ ni⁴ma⁴-le⁴ cao⁴ je². 29To⁴coi³ tsa² xcoin³ nca³qui²xi⁴ si¹cji³tson¹-li², chˀa⁴sjai³, ti⁴cˀe¹jna³ tˀa³xin²-lai⁴ yao³-li⁴. Nqui²sa⁴ nta³-ni³ nca³ cha⁴ jnco³ ya²-le⁴ yao³-li⁴, jme¹-ni³ nca³ tsi² tsa² nca³yi³je³ yao³-li⁴ tsao⁴jin³-si¹ni³ jña³ nca³ ti¹ti² lˀi¹. 30Tsa² ntsai⁴ nca³qui²xi⁴ si¹cji³tson¹-li², ti⁴cha¹tˀai³, ti⁴-cˀe¹jna³ tˀa³xin²-lai⁴ yao³-li⁴. Nqui²sa⁴ nta³-ni³ nca³ cha⁴ jnco³ ya²-le⁴ yao³-li⁴, jme¹-ni³ nca³ tsi² tsa² nca³yi³je³ yao³-li⁴ tsao⁴jin³-si¹ni³ jña³ nca³ ti¹ti² lˀi¹.
Jo³ tso² Jesús xi³ tˀa³tsˀe⁴ je² xi³ tsjion³ chjon⁴²-le⁴
31Cˀoa⁴-ti⁴ qui³tso²: To⁴ˀya³-ni³ve⁴ xi³ tsjion³ chjon⁴²-le⁴, tˀai²-lai⁴ xon⁴ xi³ tsjion³-ni³ xi¹ncjin¹ cho⁴ta⁴. 32To⁴nca³ an³ xin³-no³, nca³ je² xi³ tsjion³ chjon⁴²-le⁴, tsa² tsi² xi³ to⁴tˀa³tsˀe⁴ cjoa⁴cha³jnqui³, je² cho⁴ta⁴ cˀoa⁴sˀin¹ nca³ si¹cha³jnqui³ chjon⁴²-le⁴. Cˀoa⁴ je² xˀin⁴ xi³ coi⁴xan³cao⁴ chjon⁴² xi³ qui³njion³-ve⁴, si¹cha³jnqui³tˀa³-le⁴.
A³li² en¹nti³so³-jin² vˀe¹
33Cˀoa⁴²-ti⁴ je³qui³no²ˀyao²³ nca³ cˀoa⁴ tsa³cˀin²-le⁴ nˀai³jcha¹cjin³: A³li² en¹nti³so³-jin² vˀai²³. Je² Nai³-na¹ cˀoe¹chji¹-lai⁴ je² cjoa⁴ xi³ en¹-li⁴ vˀai²³. 34To⁴nca³ an³ xin³-no³: Ni⁴to⁴jme³-jin² xi³ tˀa³tsˀe⁴ vˀai²³ en¹-li⁴, ni⁴tˀa³tsˀe⁴ ncˀa³jmi³-jin², nca⁴ coi³ xi³ ya¹xi²le⁴-le⁴ Ni³na¹. 35Ni⁴tˀa³tsˀe⁴-jin² son³ˀnte³, nca⁴ coi³ jña³ vi³ncha¹ne² ntso⁴co⁴ Ni³na¹. Ni⁴tˀa³tsˀe⁴-jin² Jerusalén, nca⁴ coi³ xi³ na⁴xi⁴na³nta¹ xi³ tsˀe⁴ je² cho⁴ta⁴ti¹tjon² xi³ nˀion¹ ncˀa³. 36Ni⁴tˀa³tsˀe⁴ jco⁴-jin² vˀai²³ en¹-li⁴, nca⁴ li²coi³ coan⁴-li² si⁴čhoai³ ni⁴si⁴jmai²³ jnco³ ntsja⁴. 37To⁴nca³ ca²ta³jaon³-li² tsa² jaon³-li², cˀoa⁴ tsa² mai³ mai³-li². Je² xi³ fa³ˀa³to³-sa³ je²-vi⁴, ya⁴² nčhoa¹-ni³ xi³ chˀao³ tjin¹.
Si⁴cjain¹-le⁴² xi³ tsˀen⁴
(Lc. 6:27-30)
38Qui³no²ˀya²-nio¹³ nca³ cˀoa⁴tsa³cˀin²-le⁴ nˀai³jcha¹cjin³: Xi³ xcon⁴ ca²ta³si¹nca³jao³-ni³ xcon⁴, cˀoa⁴ xi³ ni⁴ˀño⁴ ca²ta³si¹nca³jao³-ni³ ni⁴ˀño⁴. 39To⁴nca³ an³ xin³-no³: Ti⁴cjain¹-lao⁴³ xi³ tsˀen⁴. To⁴sa³ tsa² jnco³ xi³ si⁴²qui²ˀaon³ ncjain³ nca³qui²xi⁴-li⁴, ti⁴cˀo¹fa³ya³-lai⁴ xi³ncoa³-ni³. 40Tsa² jnco³ xi³ coa⁴jnqui³ya³tˀain³-li², cˀoa⁴ tsa² scoe¹ na³jño³-li⁴, cˀoa⁴-ti⁴ ti⁴cˀe¹jna³nqui³-lai⁴ tso⁴nca⁴-li⁴. 41Cˀoa⁴ to⁴ˀya³-ni³ve⁴ xi³ cjoa⁴nˀion¹ sˀin⁴²-li² nca³ cjin³ cˀoin¹coai⁴, jao² ya³ cˀoa⁴cji³ tˀin³coai⁴. 42Tsa² jnco³ xi³ si⁴²je¹-li², tˀai²-lai⁴, cˀoa⁴ tsa² jnco³ xi³ me³-le⁴ scoin³ya³tˀa³-li², a³li² mai³-jin² ˀmi²-lai⁴.
Ca²ta³ma³tsjoa³cha³² xi³ jti³que³-na¹
(Lc. 6:32-36)
43Qui³no²ˀya²-nio¹³ nca³ cˀoa⁴qui³tso²: Ca²ta³ma³tsjoa³chai³ xi²nqui⁴, cˀoa⁴ ca²ta³ma³jti³chai³ xi³ jti³que³-li². 44To⁴nca³ an³ xin³-no³: Ca²ta³ma³tsjoa³chao³ xi³ jti³que³-no³, ti⁴chi³con³tˀaon³ xi³ nchja⁴ˀaon³-no³, nta³ ti⁴cao⁴³ xi³ chˀao³ ve³con³-no³, tˀe²tsˀoa³ntjao²³ xi³ chˀao³ si¹cao⁴-no³, cˀoa⁴ xi³ fi²tjen⁴nqui³ co²ntran⁴-no³, 45jme¹-ni³ nca³ coan⁴-si¹nio³ ˀnti¹-le⁴ Nˀai³-no³ xi³ ti¹jna³ ncˀa³jmi³. Nca⁴ je² xi³ si¹cji³tjo³son² tsˀoi¹-le⁴ xi³ tˀa³tsˀe⁴ xi³ tsˀen⁴ cˀoa⁴ xi³ tˀa³tsˀe⁴ xi³ nta³. Vˀa³ne²-le⁴ jtsi¹ ja⁴son²-le⁴ je² xi³ qui²xi⁴ cˀoa⁴ xi³ tsi² qui²xi⁴ tjio¹ma³. 46Tsa² tsjoa³chao³ xi³ ma³tsjoa³que³-no³, jme¹-ni³ chji¹-no³. A³ tsi² cˀoa⁴-ti⁴ nˀiaon²³ jo³ sˀin¹ xi³ vˀe¹ña³ taon⁴va³sen³. 47Cˀoa⁴ tsa² to⁴je² ntsˀao³ ni²ti²ˀntao³, jme¹ xi³ nqui²sa⁴ tse³ nˀiaon²³. A³ tsi² cˀoa⁴-ti⁴ nˀiaon²³ jo³ sˀin¹ cho⁴ta⁴ xi³ li² judío-jin². 48Ña³qui³ cjoa⁴qui²xi⁴ ca²ta³mao³ nca³ jon², jo³-ni³ tsa² Nˀai³-no³ xi³ ti¹jna³ ncˀa³jmi³ xi³ ña³qui³ qui²xi⁴-ni¹.
Избрани в момента:
San Mateo 5: mauDBL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 1960, Wycliffe Bible Translators, Inc. All rights reserved.