Лого на YouVersion
Иконка за търсене

Jenɛɛsë 19

19
Nyɔsʋa 'pʋɔa' Lɔɔtë
1‑Gbiajrʋ mia' nɩ, 'aanjë 'sɔɔlë nya 'tɔ Sodɔɔmë. Lɔɔtë kʋ bätäa palafawʋ. 'Ɔ 'jäa' 'üün nɩ, 'ɔnya sɔwʋ 'ɔnya mi 'üa 'klʋɩ 'kä ‑gblaara 'ɔnya 'pala 'ɔa 'klʋɩ kotifli, 2'ɔ ‑nëma: «'Na 'pläkänyüü, 'n bibie 'amɩ, 'ba ji 'ana 'jrʋpafɛnyɔɔa ‑nyüköli 'amä 'lɩ 'prere, ‑bɛ 'amä 'ana bökli ‑gba su. 'Ama tɛkä ‑srɩkägblawla ‑bɛ 'amä ‑si.» 'Iibäa' 'üün nɩ: «‑Woo, anya ‑saplɛ 'lɩ 'prerea.» 3‑Maa Lɔɔtë ‑mɛ 'üün 'klɩ, ü 'tɔ 'ɔa ‑nyɛɛ. 'Ünya pa 'ɔa nyüköli. 'Ɔnya pi 'üa jijri, 'ɔ pi bɩa 'flɔɔlʋ kä 'mlɩ 'nyɩa' levurë bä, 'ünya jidɛɛ.
4'Ü ‑kaaŋlʋ 'pi ‑bɛ Sodɔɔmëbätäa nyüü trara nyukulu 'klɩ; 'bala sëgbëë ‑gälɩ ‑a jrä tagbü ‑gälɩ, 'üa 'fɩɔa ji. 5'Ünya nyrara Lɔɔtë 'wli, 'ü ‑nëma: «‑A 'jää nyüülü jia' ‑na ‑nyɛɛ ‑gbiajrʋ 'lɩ le? 'Cie 'üün amä 'üün jre!» 6Lɔɔtë nya 'jrara 'üün 'klɩ nyukua palafawʋ, 'ɔnya 'pala nyüülü tatu dɛrɩ. 7'Ɔ ‑nëma: «'Na ‑wlajü 'amɩ, 'n bibie 'amɩ, 'anyɩ nʋ 'ia 'samaa bʋbɔgbili! 8'N kä 'ŋlëkaplü 'sɔɔ; 'mä 'üün 'cie ‑bɛ wiili 'a 'bataa' 'amä 'iin nʋ. ‑Maa 'anyɩ ‑fɛ ‑taa nyüülü ‑gba, 'be 'na nyüköli 'ü ji ‑fʋflʋ 'pala.» 9'Iibäa' Sodɔɔmëbätäa nyüü nɩ: «Sɔ ‑plɩɩ ‑a 'jä!» 'Ü ‑nëma 'sɔɔwʋ: «‑Mɔ ‑taa nyɔtugbanyɔɔlɔ kʋa' ‑pɩ, ‑mɔ 'bata ‑mä ana ‑gä ‑tʋ! 'I 'na ɔ! ‑Mɩlɩ a nëmäa' ‑mɩ ‑gba nʋ, 'inya 'üa ni 'wʋ ‑sia!» 'Ünya fala Lɔɔtë ‑jiji 'wʋ, 'ümä tatulu wa. 10‑Maa nyüülü bä ɩa' nyukulua ‑wälɩ nya 'sa tatu 'ünya 'kʋɛɛrɛ Lɔɔtë nyüköli, 'ünya 'pa tatulu. 11Nyüülü kä 'fɩɔ bä ɩa' nyukulua palafa 'wʋ nɩ, 'palɩ 'jüplö ‑a 'paalɩ tagbü, nyüülü nya 'nɔrɔ 'ümɩ. 'Ü ‑kanyɩ 'lɩ ‑a bɩa ü 'jä tatu 'wʋ.
12‑Jää nyüü 'sɔɔlü 'bete Lɔɔtë: «‑Na nyüü 'plɛɛ bä ‑tɛ le: ‑na 'jüa dʋɔɩɩ, ‑na nyɩbɛjü nyra ‑na 'ŋlëkayerü? 'Cie ü kä 'fɩɔ bäa' ‑na nyüü bätäläa 'mlɩ, 13'be bätälä a nëmä ‑gblooo! 'Äa 'mlɩa nyüüa 'dugu 'si Yawea 'nyakli 'lɩ, 'ɔɔ blɔ amɩ amä 'ään ‑gblooo.» 14Lɔɔtë nya mi nyüülü 'böa' 'ɔa 'ŋlëkayerü nyɩberü ‑gälɩ 'jäkalɩ. 'Ɔ ‑nëma: «'Ba sɔwʋ! 'Ba sɔ ‑tɛklɩ! Yawe nëmä bätälä ‑gblooo!» ‑Maa 'ɔa 'jüa dʋɔɩɩa 'pa 'iin sawʋ.
15‑Srɩkägbalawlaa 'aanjëɩɩ nya 'patä 'ünya ‑gbala Lɔɔtë: «Sɔwʋ, 'kä dɔrɔ ‑na 'ŋlʋʋ nyra ‑na 'ŋlëkayörü 'sɔɔlü bäa' ‑na ‑nyɛɛ 'wʋ. 'Anyra ‑taa ‑balʋbätälä ‑pɩ ‑pɩɔ 'doowʋ ‑gblooro!» 16‑Bɛ Lɔɔtë ‑pʋalaa' nɩ, 'ünya 'kpla 'ɔa 'darʋ, 'ɔa 'ŋlʋʋa 'darʋ nyra 'ɔa 'ŋlëkayerü 'sɔɔa 'dari 'ünya fa 'üün bätäa 'kɔtʋmlɩ, 'be Yawe kä 'ɔa nyatɛplɛ#19.16 2 Piɛɛrë 2.7.. 17'Ü 'ciea' bätä nɩ, 'doo ‑nëma: «Fɔ ‑mä 'lɩ ‑na 'klä mlɩba! ‑Nyɩ tɛ dɛrɩ! ‑Nyɩ 'nyüglö ‑plɩɩlɩ ‑tʋtʋ 'mäa' ‑pauu. Fɔlɔ dëgbëa 'mlɩ ‑nyɩ ‑pɩ bʋblɔ.» 18'Iibäa' Lɔɔtë nɩ: «‑Yaa! Bibie 'n bibie ‑mɩ 'pläkänyɔɔ! 19'Mɔɔ bäa' ‑na 'jrʋpafɛnyɔɔ, ‑na nyatɛplɛ bä 'mɩ ‑gälɩ ‑bɛ ‑na ‑gbinanakʋlʋ 'bʋaa' 'ia ‑gʋ ‑pʋɔ 'mɩ. ‑Maa nɩ, 'taɩn 'plɛɛ 'lɩ 'mä ka 'dëgbëa ‑tɔrʋpɩɔ 'tɔ, ‑bɛ bätäa bʋblɔkʋ ‑nëmä ka 'mɩ ‑gälɩ jrä ‑bɛ 'nëmä bʋblɔ le? 20'N bibie ‑mɩ, 'cɛrɛ 'mɩ ‑wälɩ ‑a fɔlɔ bätä jɔlɔ kʋa' ‑nyɛɛ ɔ 'nyɩa' 'lɩdɛrɩtʋŋlɔa 'mlɩ. 'Ä bä dɛɛjɔ ‑tɛɛ, ‑maa sɔ 'mɩ ‑gba ‑a pala 'lɩ 'na 'klä 'mä 'lɩmlɩwʋ.» 21'Aanjëlɔ ‑nëma: «‑Woo, ‑na ‑gʋ 'nyaa 'ämɩ 'iin cɛrɛa; 'nëmä bätälä ‑daaa' ‑a bɔblɔ. 22'Sosowʋ! 'Kökle ‑a mi 'lɩ! 'Be ‑kaaŋlʋa' 'äa 'mlɩ 'tʋ 'nëmä dɛɛ ‑a nʋ.» 'A 'ia ‑gʋ 'ü 'dara 'saarɩ bätälä Soarë#19.22 Soarë: Ebrööwii 'lɩ 'ia ‑gbaa bä: Jɔ..
23'Jrʋfla ‑gölö dotro ‑bɛ Lɔɔtë 'tɔ Soarë. 24Yawe nya 'cɛrɛ 'täkëkapu nyra kaprajruu ‑wälɩ 'unya dara Sodɔɔmë nyra Gomɔɔrë ‑beere 'nʋŋlʋ. Cɛlɩ 'i sɔ, Yawe nʋ 'iin. 25'Ɔnya ‑gblooo 'ia bätëlëa 'fɩɔ, 'palɩ 'ia 'käblatʋtʋa 'fɩɔ, 'ia nyüüa 'fɩɔ nyra 'ia ‑tʋtʋa 'sipia 'fɩɔ#19.24-25 Matiö 10.15; 11.23-24; Lukë 10.12; 17.29; 2 Piɛɛrë 2.6; Judë 7.. 26‑Maa Lɔɔtëa 'ŋlʋʋ nya ‑siekälɩ 'ɔnya tɛ dɛrɩ, 'ɔnya nʋ taŋlʋa ‑gɔmʋʋ#19.26 Lukë 17.32..
27Abraamë nya sɔwʋ ‑suwla ‑ŋʋɩsɩɩ 'ɔnya mi ‑plɩɩlɩ 'ɔ 'nyüglö ɩa' Yawea 'klɩ. 28Abraamë nya ‑pʋpɔ Sodɔɔmë nyra Gomɔɔrë ‑gälɩ, 'ɔnya ‑pʋpɔ 'käblatʋtʋa 'fɩɔ ‑gälɩ, ‑bɛ 'ɔ 'jää nyrʋgbɔlʋ 'u 'jraa ‑beere nyɔɔ srara kapu ‑gbogbo.
29'Taɩnlɩ kä 'mlɩ Nyɔsʋa 'mäa' 'käblatʋtʋ ‑gälɩa bätëa 'fɩɔ ‑gbloo nɩ, 'ɔ 'pa Abraamë plɛ. 'Ɔnya 'ba Lɔɔtë ‑gbogblookʋa 'mlɩ, 'taɩn 'lɩ 'ɔ ‑gbloooa' bätëlë kä 'mlɩ Lɔɔtë ma kʋa'.
Lɔɔtë nyra 'ɔa 'ŋlëkayörü
30'Ii ‑sia' nɩ, ŋalɛ 'bla Lɔɔtë 'ɔmä Soarë kʋ. 'Ii känyrɩ, 'ɔ nyra 'ɔa 'ŋlëkayörü nya 'cie Soarë 'ünya mi 'dʋgbaa flää ‑susugbeea 'mlɩ kʋkalɩ. 31‑Jrüü 'doo 'lɩ nɩ, ‑jää Lɔɔtëa 'ŋlëkayria kpaköa nɔ ‑gbala 'ɔa blaadɩɔ: «Ana tʋ bɩaklɩ, ‑bɛ nyɩbɛrʋ 'nyɩ ‑taa 'pläläa 'mlɩ ‑a bä 'ɔmä amɩ kä, 'sɩrɩ 'i nröröa' ‑pɩɔa 'fɩɔ. 32Ji, amä 'ɔɔn duvɛɛn 'blara ‑bɛ anyra 'ɔɔn 'mä 'pi 'ɔmä amɩ 'jü ‑nyɩ ana ‑glügbö ‑pɩ saka.» 33'Ünya 'blara 'kasa 'üa tʋ duvɛɛn ‑gbiajrʋ 'lɩ; kpaköa nʋ nya pa 'ɔɔ ‑bɛ 'ɔa tʋ nya jejre. ‑Maa 'ɔa tʋ 'nyɩ 'taɩnlɩ kä 'mlɩ 'ɔa 'ŋlëkayria 'pia', 'taɩnlɩ kä 'mlɩ 'ɔ sɔa' 'wʋ; 'ɔnyɩ 'iin jre ‑a jre. 34'Ia ‑srɩgbaakä nɩ, kpaköa nʋ nya ‑gbala blaadɩɔ: «Tɛlɩ, 'nyraa 'na tʋ jejre braasrɩɩa ‑gbiara; a 'mlala 'sɔɔwʋ 'ɔɔn ‑duvɛɛn ‑bɛ ‑nyra 'ɔɔn 'mä jejre 'ɔmä amɩ 'jü ‑nyɩ ana ‑glügbö ‑pɩ saka!» 35'Ii känyrɩ, 'ia ‑gbiara, 'ünya 'blara 'üa tʋ ‑duvɛɛn blaadɩɔ nyra 'ɔɔn nya jejre. ‑Maa 'ɔnyɩ 'taɩnlɩ kä 'mlɩ 'ɔ 'pia' ‑bɛ 'ɔ sɔa' 'wʋ; 'ɔnyɩ jre ‑a jre. 36'Asɩ 'i nʋ Lɔɔtëa 'ŋlëkayerü 'sɔɔlü nya bä nʋgbla 'lɩ. 37Kpaköa nʋ nya ‑gu nyɩbɛjʋ. 'Ɔnya ‑nyɩ 'ɔɔn Moabë#19.37 Moabë: Ebrööwii 'lɩ 'ii bä: Moabë 'sɩrɩ nyɔɔ 'daaa' Dɛɛlɛ sɔa' tʋa fugba 'lɩ. 'nyrɩ. 'Ɔ bä Moabënyüüa tʋ 'saarɩ. 38Blaadɩɔa 'mʋgbɛ nya ‑gu nyɩbɛjʋ. 'Ɔnya ‑nyɩ 'ɔɔn Bɛnë Ami#19.38 Bɛnë Ami: 'Ia ‑gbaa bä: 'Na nyɔɔa 'jʋ. 'nyrɩ. 'Ɔ bä Amɔɔnyüüa tʋ 'saarɩ.

Избрани в момента:

Jenɛɛsë 19: Bakwé

Маркирай стих

Споделяне

Копиране

None

Искате ли вашите акценти да бъдат запазени на всички ваши устройства? Регистрирайте се или влезте