लूका 18
18
राँड़ बईयर और अधरमी जज की दासतान
1फिर ईसु नै उनकै जौ बतानै के ताँई कै बे लगातार पिराथना करते रैंह और हिम्मत ना हारैं, जौ दासतान सुनाई: 2ईसु बोलो “किसी सैहर मै एक जज रैहए करै हो। बौ ना तौ परमेसर सै डरै हो और नाई किसी आदमी की परवा करै हो। 3उसई सैहर मै एक राँड़ बी रैहए करै ही। और बौ उसके धौंरे बेरमबेर आकै कैबै ही, मेरो नियाय कर। 4पर लम्बे टैम तक तौ बौ जज आनाकानी करतो रैहओ पर आखरी मै उसनै अपने मन मै सोचो, ‘ना तौ मैं परमेसर सै डरौ हौं और ना लोगौं की परवा करौं हौं।’ 5तौबी जौ राँड़ मैंकै सताती रैहबै है, इसताँई मैं इसको फैसला करंगो कहीं ऐंसो ना हो कै जौ बेरमबेर आकै मेरे नाख मै दम ना कर दे।”
6परभु ईसु नै कैई, “सुनौ, कै बौ अधरमी जज का कैबै है? 7इसताँई का परमेसर अपने चुने भओ को फैसला ना करैगो, जो रात-दिन उसकी दुहाई देते रैहबैं हैं? का बौ उनके बारे मै देर करैगो? 8मैं तुमसै कैरओ हौं; परमेसर तुरन्त उनको फैसला करैगो; तौबी जब आदमी को लौंड़ा बापस आगो, तौ का धरती के ऊपर भौत लोगौ कै बिसवास करते देखैगो?”
फरीसी और लगान लैनै बारे की दासतान
9फिर ईसु नै उन लोगौ के ताँई बी जो अपने आपकै धरमी समजै हे, और किसी कै कुछ ना समजै हे, जौ दासतान सुनाई। 10“एक दिन दो आदमी मन्दर मै पिराथना कन्नै के ताँई गए; एक फरीसी#18:10 यहूदी धरम को एक दल, बे मूसा और उनके पुरखौं के नियम कै माननै बारे और खुद कै भौत धरमी समजनै बारे हे। हो और दूसरो सब तरै की लगान लैनै बारो हो। 11बौ फरीसी अगल खड़ो होकै जौ पिराथना करल लगो, ‘हे परमेसर, मैं तेरो धन्नबाद करौं हौं कै मैं दूसरे लोगौं जैसो लालची, ठग और दूसरी बईयरौं सै गलत काम कन्नै बारो बी ना हौं, और ना इस लगान लैनै बारे के जैसो हौं। 12मैं हप्ता मै दो फेरी बरत रक्खौं हौं; और मैं अपनी सब कमाई को दसमो हिस्सा बी देवौ हौं।’
13 “पर लगान लैनै बारे नै दूर खड़े होकै, हिंया तक कै सुरग की ओर अपनी आँख तक ना उठांई, और अपनी छाती पीटते भए बोलो, ‘हे परमेसर, मैं पापी हौं मेरे ऊपर दया कर और मैंकै माफ कर दे।’”
14 #
मत्ती 23:12; लूका 14:11 फिर ईसु नै उनसै कैई, “जौई आदमी परमेसर की नजर मै धरमी होकै अपने घर लौहटो। ना कै बौ फरीसी कैसेकै जो कोई आदमी अपने आपकै बड़ो बनागो, बौ छोटो करो जागो; और जो अपने आपकै छोटो बनागो, बौ बड़ो करो जागो।”
छोटे बालकौ के जैसे नमर बनौ
(मत्ती 19:13–15; मरकुस 10:13–16)
15फिर लोग अपने छोटे बालकौ कै बी उसके धौंरे लाललगे, कै बौ उनके ऊपर हात रक्खै; और चेलौ नै जौ देखकै उनकै डाँट लगाई। 16ईसु नै बालकौ कै अपने धौंरे बुलाकै कैई, “बालकौ कै मेरे धौंरे आन दो, और उनकै मनैह मत करौ: कैसेकै जो लोग ऐंसे छोटे बालकौ जैसे अपने आपकै नमर बनांगे बेई परमेसर के राज के भागीदार बन सकंगे। 17मैं तुमसै सच कैरओ हौं, कै जो कोई परमेसर के राज कै बालकौ के हाँई गिरैहन ना करैगो बौ उसमै कबी जा ना पागो।”
एक सेट कै ईसु सै सबाल
(मत्ती 19:16–30; मरकुस 10:17–31)
18फिर किसी यहूदी नेता नै ईसु सै पूँछी, “ओ अच्छे गुरू, हमेसा की जिन्दगी पानै के ताँई मैंकै का कन्नो चँईऐ?” 19ईसु नै उस्सै कैई, “तू मैंकै अच्छो काए कैबै है? सिरप परमेसर कै छोड़कै और कोई बी अच्छो ना है। 20तू परमेसर के हुकमौ कै तौ जानै है, कै बईयरौं के संग गलत काम मत कर, खून ना कर, चोरी मत कर, झूँटी गभाई मत दे, और अपने अब्बा और अईया को आदर कर।” 21बौ यहूदी नेता बोलो, “मैं इन सब बातौं कै तौ बालक सैई करतो आँऔं हौं।” 22जौ सुन ईसु नै उस्सै कैई, “तैमै अबी बी एक बात की कमी है, अपनो सब कुछ बेचकै बौ पैसा गरीबौ मै बाँट दे; इस्सै तेकै सुरग मै धन मिलैगो।” 23जब उस यहूदी नेता नै जौ सुनी तौ बौ भौत दुखी भओ, कैसेकै बौ भौत सेट हो।
24ईसु नै जब जौ देखो कै बौ भौत दुखी है तौ उस्सै कैई, “जो आदमी अपने धन-दौलत के ऊपर भरोसो रक्खै है, बाको परमेसर के राज मै भीतर जानो कितनो मुसकल है। 25हाँ, किसी ऊँट के ताँई सूंई के छेद मै सै लिकन्नो तौ सरल है पर किसी सेट को परमेसर के राज मै भीतर जानो भौत मुसकल है।”
किसकै मुक्ति मिलैगी
26और सुन्नै बारौं नै कैई, “तौ फिर कौन बच सकै है?” 27ईसु नै कैई, “जो आदमी सै ना हो सकै है, बौ परमेसर सै हो सकै है।”
28फिर पतरस नै कैई, “देख, हम तौ घर-बार छोड़कै तेरे पीछे चल पड़े हैं।”
29तब ईसु उनसै बोलो, “मैं तुमसै सच कैरओ हौं, जिसनै परमेसर के राज के ताँई घर-बार या बईयर या भईया और बहन या अईया-अब्बा या बाल-बच्चे छोड़ दए हौं। 30और इसई टैम मै भौत कुछ मिलैगो और आनै बारे युग मै, उसकै सुरग मै हमेसा की जिन्दगी बी मिलैगी।”
ईसु मर कै जी उठैगो
(मत्ती 20:17–19; मरकुस 10:32–34)
31फिर ईसु उन बारैह चेलौ कै संग ले जाकै उनसै बोलो; देखौ, “हम ऐरूसलेम सैहर कै जा रए हैं, और जितनी बात मेरे बारे मै परमेसर की भबिसबानी कन्नै बारौं के दुआरा लिखी गई हैं बे सब पूरी हौंगी। 32कैसेकै बौ गैर यहूदिऔं के हातौ मै सौंपो जागो, और बे उसकी मजाक उड़ांगे; और उसकी बेजती करंगे, और उसके ऊपर थूकंगे। 33और उसकै कोड़ा मारंगे, और मार डारंगे, लेकन बौ तीसरे दिन जिन्दो उठ जागो।” 34और चेलौ नै इन बातौं मै सै कोई बात ना समजी और जौ बात उनमै छिपी रैहई, और जो कैओ गओ हो बौ उनकी समज मै ना आओ।
अन्धे भिकारी को देखनो
(मत्ती 20:29–34; मरकुस 10:46–52)
35जब ईसु यरीहो सैहर के धौंरे पौंचो, तौ एक अन्धो आदमी सड़क के किनारे बैठो भओ भीक माँग रओ हो। 36जब अन्धे नै अपने धौंरे सै भीड़ की चलनै की अबाज सुनी तौ उसनै पूँछी, “जौ का हो रओ है?” 37लोगौं नै उसकै बताई, “नासरत सैहर को ईसु जा रओ है।” 38तब उसनै चिल्लाकै कैई, “हे ईसु, दाऊद के बंस, मेरे ऊपर दया कर।” 39बे जो अग्गे चल रए हे, उसकै डाँटल लगे कै चुप रैह; पर बौ और बी जोर सै चिल्लाल लगो, “हे दाऊद की औलाद, मेरे ऊपर दया कर।”
40तब ईसु रुक गओ उसनै हुकम दओ कै, “उस अन्धे कै मेरे धौंरे लाओ जाय।” और जब बौ उसके धौंरे आओ, तौ ईसु नै उस्सै जौ पूँछो, 41“तू का चाँहै है, कै मैं तेरे ताँई करौं?” उसनै कैई, “हे परभु, मैं फिर सै देखनो चाँहौ हौं।” 42ईसु नै कैई, “देखल लग, तैनै मेरे ऊपर बिसवास करो है, इसताँई तू ठीक हो गओ है।” 43और बौ तुरन्त देखल लगो, और परमेसर की बड़ाई करतो भओ उसके पीछे हो लओ, और सब लोगौ नै देखकै परमेसर की बड़ाई करी।
Избрани в момента:
लूका 18: TKB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
New Life Compute Institute [NLCI] - CC BY-NC-ND 4.0