यहून्ना 8
8
गलत काम कन्नै बारी बईयर कै माफी
1और ईसु जैतून पहाड़ के ऊपर चले गओ। 2और सुबे होतेई बौ फिर मन्दर मै गओ। सबई आदमी बाके धौंरे आए। और ईसु बहाँ बैठकै उनकै उपदेस दैनै लगो। 3तब फरीसी और सास्तरी लोग एक बईयर कै लाए जो गलत काम करते भए पकड़ी गई ही और बाकै आदमिऔ के सामने खड़ो करकै। 4ईसु सै कैई, “हे गुरू, जौ बईयर गलत काम करते भए पकड़ी गई है। 5मूसा के नियम हमकै जौ आगियाँ देवै हैं कै ऐंसी बईयरौं कै पत्थर सै मारनो चँईऐ। अब बता तेरो का कैनो हैं?” 6बे ईसु कै परखनै के ताँई ऐंसो कैरए हे, जिस्सै कै उनकै बामै दोस लगानै के ताँई कोई मौको मिल सकै। पर ईसु झुक्कै अपनी उंगरिआ से धरती मै लिखल लगो। 7पर जब बे बेरमबेरा बासै पूँछते रए, तौ बानै सीदो खड़ो होकै आदमिऔ सै कैई, “तुम्मै सै जिसनै पाप ना करो है बौई सबसै पैले इस बईयर कै पत्थर मारै।” 8और बौ फिर झुक्कै धरती मै लिखल लगो। 9जब उनौनै जौ सुनो तौ सबसै पैले बुड्ढे आदमी और फिर बड़े सै लेकै छोटे तक एक-एक करकै बहाँ सै जाल लगे, और ईसु इकलो रैह गओ, और बौ बईयर बहीं सामने खड़ी ही। 10तब ईसु नै सीदे खड़े होकै बासै कैई, “हे नारी, बे कहाँ गए? का किसी नै बी तेरे ऊपर दोस ना लगाओ?” 11बौ बोली, “किसी नै बी ना परभु।” तब ईसु नै कैई, “मैं बी तेरे ऊपर दोस ना लगाबौ हौं। जा, अब सै फिर कबी बी पाप मत करिए।”
ईसु दुनिया को उज्जेरो
12 #
मत्ती 5:14; यहून 9:5 ईसु नै फिर आदमिऔ सै कैई, “दुनिया को उज्जेरो मैं हौं। जो मेरे पीछे हो लंगे, बे इन्धेरे मै ना चलंगे, पर जिन्दगी को उज्जेरो उनकै मिलैगो।”
13 #
यहून 5:31
फरीसिऔं नै बासै कैई, “तू अपनी गभाई खुद देरओ है, तेरी गभाई सच्ची ना है।”
14ईसु नै जबाब देते भए उनसै कैई, “अगर अपनी गभाई मैं खुद देवौ हौं, तौ फिर बी मेरी गभाई सच्ची है, कैसेकै मैं जानौ हौं कै मैं कहाँ सै आऔ हौं और कहाँ जा रओ हौं। पर तुम ना जानौ हौ कै मैं कहाँ सै आओ हौं और कहाँ जा रओ हौं। 15तुम आदमी के सरीर के अनुसार नियाय करौ हौ, पर मैं किसी को नियाय ना करौ हौं। 16अगर मैं नियाय बी करौं, तौ मेरो नियाय सच्चो है, कैसेकै मैं इकलो ना हौं पर अब्बा जिसनै मैं भेजो हौं बौ और मैं मिलकै नियाय करै हैं। 17तुमरे नियम मै बी लिखो है कै दो आदमिऔ की गभाई सच्ची होवै है। 18एक मैं हौं जो अपनी गभाई खुद देवौ हौं, और दूसरो अब्बा है जिसनै मैं भेजो और मेरे बारे मै गभाई देवै है।”
19तब बे बासै कैललगे, “तेरो अब्बा कहाँ है?” ईसु नै जबाब देओ, “तुम ना तौ मैंकै जानौ हौ और ना मेरे अब्बा कै, अगर तुम मैंकै जानते तौ मेरे अब्बा कै बी जानते।” 20जे बात ईसु नै मन्दर मै भन्डार के धौंरे उपदेस देते भए कैंई, और किसी नै बौ ना पकड़ो कैसेकै बाको टैम अबी ना आओ हो।
अबिसवासी यहूदिऔं कै चितौनी
21ईसु नै उनसै एक बार फिर कैई, “मैं चलो जांगो और तुम मैंकै ढूंड़ौगे। पर तुम अपनेई पापौं मै मर जाऔगे। जहाँ मैं जा रओ हौं बहाँ तुम ना आ सकौ हौ।”
22तबई यहूदी नेता आपस मै कैललगे, “कहीं जौ आत्महत्तिया तौ कन्नै बारो ना है? कैसेकै बानै कैई है, तुम बहाँ ना आ सकौ हौ जहाँ मैं जा रओ हौं।” 23तब ईसु नै उनसै कैई, “तुम नीचे के हौ, मैं ऊपर को हौं। तुम जा दुनिया के हौ, मैं जा दुनिया को ना हौं। 24मैंनै इसताँई कैई ही कै तुम अपने पापौं मै मरौगे, कैसेकै अगर तुम बिसवास ना करौ कै मैं बौई हौं, तौ अपने पापौं मै मरौगे।”
25फिर उनौनै ईसु सै पूँछी, “तू कौन है?”
ईसु नै उनसै कैई, “मैं बौई हौं जो तुमसै सुरू सैई कैतो भओ आ रओ हौं। 26मैं तुमकै भौत सी बातौं मै दोसी ठैरा सकौ हौं। पर सच्चो बौई है जिसनै मैंकै भेजो है। जो मैं बासै सुनौ हौं बौई बात मैं दुनिया कै कैबौ हौं।” 27बे जौ ना जान पाए कै ईसु उनकै अब्बा के बारे मै बता रओ हो। 28फिर ईसु नै उनसै कैई, “जब तुम आदमी के लौंड़ा कै ऊँचे मै चढ़ाऔगे तौ तुम जानौगे कै बौ मैं हौं। मैं अपनी ओर सै कुछ ना करौ हौं, पर मैं जो कुछ कैरओ हौं, बैसेई कैबौ हौं जैसे मैंकै अब्बा नै सिकाओ है। 29और बौ जिसनै मैं भेजो हौं, मेरे संग है। बानै मैं कबी इकलो ना छोड़ो कैसेकै मैं हमेसा बौई करौ हौं जो बाकै अच्छो लगै है।” 30ईसु जब जे बात कैई रओ हो, तौ भौस्से आदमिऔ नै बाके ऊपर बिसवास करो।
सच्ची आजादी
31तब ईसु उन यहूदिऔं सै जिनौनै बाके ऊपर बिसवास करो हो कैललगो, “अगर तुम मेरे बचन मै बने रौहगे, तौ सचमुच मेरे चेला बनौगे, 32और तुम सच्चाई कै जानौगे और बौ सच्चाई तुमकै आजाद करैगी।”
33 #
मत्ती 3:9; लूका 3:8 उनौनै ईसु कै जबाब देओ, “हम इब्राहिम के बंस के हैं और अब तक किसी के गुलाम ना भए, तौ फिर तू कैसे कैबै है, कै तुम आजाद हो जाऔगे?”
34ईसु नै उनकै जबाब दओ, “मैं तुमसै सच-सच कैबौ हौं, जो कोई पाप करै है बौ पाप को गुलाम है। 35गुलाम हमेसा घर मै ना रैहबै है, पर लौंड़ा हमेसा रैहबै है। 36अगर लौंड़ा तुमकै आजाद करैगो तौ तुम सचमुच आजाद हो जाऔगे। 37मैं जानौ हौं कै तुम इब्राहिम के बंस सै हौ फिर बी मैंकै मार डान्नो चाँहौ हौ, कैसेकै मेरे बचन के ताँई तुमरे दिल मै कोई जघै ना है। 38मैं बौई बात कैबौ हौं, जो मैंकै मेरे अब्बा नै दिखाईं हैं, और तुम बौई करते रैहबौ हौ जो तुमनै अपने अब्बा सै सुनो है।”
39उनौनै जबाब देते भए ईसु सै कैई, “हमरो. अब्बा तौ इब्राहिम है।”
ईसु नै उनसै कैई, “अगर तुम इब्राहिम की औलाद होते तौ इब्राहिम के जैसे काम करते। 40पर तुम तौ अब मैंकै मार डान्नो चाँहौ हौ, जो तुमकै बा सच्चाई कै बताबै है जिसकै मैंनै परमेसर सै सुनो है और इब्राहिम नै तौ ऐंसो ना करो। 41पर तुम अपने अब्बा के हाँई कामौ कै करौ हौ।”
फिर उनौनै बासै कैई, “हम नाजायज रिस्ता सै ना जलमे हैं। हमरो एकई अब्बा है यानी परमेसर।”
42ईसु नै उनसै कैई, “अगर परमेसर तुमरो अब्बा होतो, तौ तुम मैंसै पियार करते, कैसेकै मैं परमेसर सै लिकरकै आओ हौं और अब मैं हिंया हौं। मैं अपनी मरजी सै ना आओ, पर बाई नै मैंकै भेजो है। 43जो मैं कैरओ हौं बाकै तुम काए ना समजौ हौ? इसकी बजै जौई है कै तुम मेरो बचन ना सुनौ हौ। 44तुम अपने अब्बा सैतान की औलाद हौ। और तुम अपने अब्बा की इच्छा मै चलनो चाँहौ हौ। बौ सुरू सैई हत्तियारो हो। और बौ सच्चाई मै कबी कायम ना रैहबै है। कैसेकै बामै सच्चाई हैई ना। जब बौ झूँट बोलै है तौ अपने सौभाब सै बोलै है, कैसेकै बौ झूँटो है और झूँट को अब्बा है।
45 “पर मैं सच बोलौ हौं, और तुम मेरो बिसवास ना करो हौ। 46तुम्मै सै कौन मेरे ऊपर पाप को दोस लगाबै है? अगर मैं सच बोलौ हौं, तौ तुम मेरो बिसवास काए ना करौ हौ? 47बौ जो परमेसर को है, परमेसर की बात मानै है, तुम लोग परमेसर की ओर सै ना हौ इसई बजै सै तुम बाकी ना सुनौ हौ।”
अपने और इब्राहिम के बारे मै ईसु की बात
48यहूदिऔं नै जबाब देते भए ईसु सै कैई, “का हम ठीक ना कैबै हैं कै तू सामरी है और तैमै दुसट आत्मा है?”
49ईसु नै जबाब देते भए कैई, “मैं मै दुसट आत्मा ना है, पर मैं अपने अब्बा की इज्जत करौ हौं, और तुम मेरी बेजती करौ हौ। 50मैं अपनी इज्जत ना चाँहौ हौं, पर एक ऐंसो है जो मेरी इज्जत चाँहै है और बौ नियाय बी करै है। 51मैं तुमसै सच-सच कैबौ हौं कै अगर जो कोई मेरी सिक्छा कै मानै है तौ बौ कबी बी मौत कै ना देखैगो।”
52यहूदिऔं नै ईसु सै कैई, “अब हम जान गए हैं कै तैमै दुसट आत्मा है। इब्राहिम मर गओ और नबी बी, और तू कैबै है कै अगर कोई मेरी सिक्छा कै मानैगो बौ कबी मौत को सबाद ना चखैगो। 53हमकै पतो है कै तू हमरे अब्बा इब्राहिम सै बड़ो ना है जो मर गओ और नबी बी मर गए, तू खुद कै का समजै है?”
54ईसु नै जबाब दओ, “अगर मैं अपनी इज्जत करौं तौ बौ इज्जत मेरी कुछ बी ना है। जो मैंकै इज्जत देवै है बौ मेरो अब्बा है जिसके बारे मै तुम कैबौ हौ कै ‘बौ हमरो परमेसर है।’ 55तुम तौ बाकै ना जानौ हौ, पर मैं बाकै जानौ हौं। अगर मैं कैंऔ कै मैं बाकै ना जानौ हौं, तौ मैं तुमरे जैसो झूँटो कैलांगो, पर मैं बाकै जानौ हौं और बाके बचनौ मै चलौ हौं। 56तुमरो अब्बा इब्राहिम मेरो दिन देखनै की आस मै भौत खुस भओ, और बानै देखो बी और खुस भओ।”
57फिर यहूदी नेताऔं नै ईसु सै कैई, “तू अबी पचास बरस को बी ना है, और फिर बी तैनै इब्राहिम देखो है?”
58ईसु नै उनसै कैई, “मैं तुमसै सच-सच कैबौ हौं, इब्राहिम सै पैले, मैं हौं।”
59तब उनौनै बाकै मारनै कै ताँई पत्थर उठाए पर ईसु लुक्कै मन्दर सै बाहार लिकर गओ।
Избрани в момента:
यहून्ना 8: TKB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
New Life Compute Institute [NLCI] - CC BY-NC-ND 4.0