यहून्ना 19
19
ईसु कै सतानो
1तब पीलातुस नै ईसु कै पकड़बाकै कोड़ा लगबाऐ। 2और सिपाईऔं नै काँटौ को मुकट बनाकै बाके खोपड़ी मै रक्खो और बाकै बैंगनी रंग के लत्ता पैहराए#19:2 बैंगनी रंग के लत्ता राजा लोग पैहरे करै हे।, 3और बे ईसु के धौंरे आकै कैललगे, “हे यहूदिऔं के राजा, परनाम!” और बाकै चाँट मारल लगे। 4और पीलातुस फिर बाहार आओ और बानै कैई, “देखौ, मैं बाकै बाहार तुमरे धौंरे ला रओ हौं, जिस्सै कै तुम जानलो कै मैं बामै कोई दोस ना पावौं हौं।” 5तब ईसु कै काँटौ को मुकट और बैंगनी रंग के लत्ता पैहराकै बाहार लाओ गओ और पीलातुस नै लोगौ सै कैई, “देखौ, जौ आदमी।”
6जब मुक्ख पुजारिऔं और मन्दर के सिपाईऔं नै बौ देखो, तौ जौ कैह कै चिल्लाए, “बाकै कुरूस मै चढ़ाऔ, कुरूस मै।”
पीलातुस नै उनसै कैई, “तुमई बाकै ले जाऔ और कुरूस मै चढ़ाऔ, कैसेकै मैं बामै कोई दोस ना पावौं हौं।”
7यहूदिऔं नै बाकै जबाब दओ, “हमरो बी एक नियम है और बा नियम के अनुसार जाकै मौत की सजा मिलनी चँईऐ, कैसेकै जौ अपने आपकै परमेसर को लौंड़ा बताबै है।”
8जब पीलातुस नै जौ बात सुनी तौ बौ और बी डर गओ, 9तब बानै फिर महल के भीतर जाकै ईसु सै कैई, “तू कहाँ को है?” पर ईसु नै बाकै कोई जबाब ना दओ। 10तब पीलातुस नै बासै कैई, “का तू मैंसै ना बोलैगो? का तू ना जानै है कै मैंकै तेकै छोड़ दैनै को अधकार है और तेकै कुरूस मै चढ़ानै को बी अधकार है?”
11ईसु नै जबाब दओ, “अगर तेकै परमेसर की ओर सै ना देओ जातो तौ तेरो मेरे ऊपर कोई अधकार ना होतो, इसताँई जिस आदमी नै मैंकै तेरे हात मै दओ है, बाको पाप जादा है।”
12जौ सुनकै पीलातुस बाकै छोड़नै के ताँई कोसिस करल लगो। मगर यहूदी लोग चिल्लाए “अगर तू जाकै छोड़ै है, तौ तू रोमी समराट कैसर को दोस्त ना है, कोई बी जो अपने आपकै राजा होनै को दाबो करै है, तौ बौ कैसर को बिरोदी है।” 13जब पीलातुस नै जे बात सुनी तौ बौ ईसु कै बाहार बा जघै मै ले गओ और “पत्थर को चबूतरा” नाम की नियाय की गद्दी मै बैठो। जाकै इबरानी भासा मै “गब्बता” कैओ गओ है। 14जौ फसै के तौहार की तईयारी को दिन हो, और कम सै कम दुफैर के बारैह बज रए हे। तब बानै यहूदिऔं सै कैई, “देखौ, तुमरो राजा।”
15बे फिर चिल्लाए, “जाकै मार दो! जाकै मार दो! जाकै कुरूस मै चढ़ाओ!”
पीलातुस नै उनसै कैई, “का मैं तुमरे राजा कै कुरूस मै चढ़ाऔ?”
मुक्ख पुजारिऔं नै जबाब दओ, “रोमी समराट कैसर कै छोड़कै हमरो कोई दूसरो राजा ना है।”
16तब पीलातुस नै कुरूस मै चढ़ानै के ताँई ईसु कै उनकै दे दओ।
ईसु कै कुरूस मै चढ़ाओ जानो
(मत्ती 27:32–44; मरकुस 15:21–32; लूका 23:26–43)
इसताँई बे ईसु कै ले गए, 17और बौ अपनो कुरूस उठाते भए बा जघै तक गओ जो “खोपड़ी#19:17 जौ जघै खोपड़ी के कंकाल जैसी दिखाई देवै ही की जघै” कैलाबै ही और जिनकै इबरानी मै “गुलगोता” कैबै हैं। 18बहाँ उनौनै ईसु और बाके संग दो और आदमी कुरूस मै चढ़ाऐ एक कै इस ओर और दूसरे कै उस ओर और बीच मै ईसु कै।
19पीलातुस नै एक तक्ती मै लिखकै कुरूस मै टांग दई। और बामै जौ लिखो भओ हो, “नासरत को ईसु, यहूदिऔं को राजा।” 20इसताँई तक्ती भौत से यहूदिऔं नै पढ़ी, कैसेकै जिस जघै मै ईसु कुरूस मै चढ़ाओ गओ हो बौ ऐरूसलेम सैहर के धौंरे हो, और जौ इबरानी, लातीनी और यूनानी भासा मै लिखो हो।
21इसताँई यहूदिऔं के मुक्ख पुजारिऔं नै पीलातुस सै कैई, “‘यहूदिऔं को राजा’ मत लिख, पर बौ लिख जो बानै कैई ही, ‘मैं यहूदिऔं को राजा हौं।’”
22पीलातुस नै जबाब दओ, “जो मैंनै लिख दओ तौ लिख दओ।”
23सिपाईऔं नै जब ईसु कुरूस मै चढ़ा दओ तौ उनौनै बाके लत्ता उतारे और उनके चार हिस्सा करे, हर एक सिपाई के ताँई एक-एक हिस्सा, ऐंसेई चोला बी लेओ, पर चोला बिना सीमन को ऊपर सै नीचे तक बिनो भओ हो। 24इसताँई उनौनै एक दूसरे सै कैई, “हम जाकै ना फाड़ै, पर जाके ताँई, परची डारै हैं कै जौ किसको होगो,” जिस्सै कै पबित्तर सास्तर की बात पूरी हो “उनौनै मेरे लत्ता आपस मै बाँट लए, और मेरे लत्ता के ताँई परची डारीं” और सिपाईऔं नै ऐंसोई करो।
25पर ईसु के कुरूस के धौंरे बाकी अईया, और बाकी अईया की बहन, कलोपास की बईयर मरियम, और मरियम मगदलनी खड़ी हीं। 26तौ जब ईसु नै अपनी अईया, और बा चेला कै जिस्सै बौ पियार करै हो, धौंरे खड़े भए देखे, तौ अपनी अईया सै कैई, “हे नारी! देख, जौ तेरो लौंड़ा।” 27तब बानै बा चेला सै कैई, “देख जौ तेरी अईया है।” और बाई टैम सै बौ चेला बाकै अपने घर ले गओ।
ईसु को मरनो
(मत्ती 27:45–56; मरकुस 15:33–41; लूका 23:44–49)
28जाके बाद ईसु नै जौ जानकै कै सब कुछ पूरो हो गओ है, तौ बानै पबित्तर सास्तर की बात पूरी होनै के ताँई कैई, “मैं पियासो हौं।” 29बहाँ अंगूर को सिरका सै भरो भओ एक बरतन रखो भओ हो, और उनौनै सिरका मै सोक्ता भिजा कै डन्डा मै रखो और बाके मौह मै लगाओ। 30जब ईसु नै बौ सिरका लेओ तौ कैई, “पूरो भओ” और बानै खोपड़ी झुकाई और अपनी आत्मा सौंप दई। 31इसताँई कै बौ फसै के तौहार की तईयारी को दिन हो, इसताँई यहूदिऔं नै पीलातुस सै बिनती करी कै तू जौ हुकम देकै उनकी टांग तोड़ दई जाऐ जिस्सै उनकी लाहस बहाँ सै उतारी जाय कै आराम कन्नै बारे दिन लाहस कुरूस मै ना रैहए, कैसेकै आनै बारो आराम कन्नै को बौ दिन भौत खास हो। 32तब सिपाईऔं नै आकै पैले की और फिर दूसरे की बी जो ईसु के संग कुरूस मै चढ़ाए गए हे, टांग तोड़ी, 33पर जब उनौनै ईसु कै धौंरे से आकै देखो कै बौ मर चुको है, तौ बाकी टांग ना तोड़ी, 34पर सिपाईऔं मै सै एक नै बाकी पसरी मै भालो बारो, और तुरन्त बामै सै खून और पानी लिकरल लगो। 35जिसनै जौ देखो है बानै जाकी गभाई दई है, और बाकी गभाई सच्ची है, और बौ जानै है कै बौ सच कैरओ है, जिस्सै कै तुम बी बिसवास कर सकौ। 36जे बात इसताँई भंई कै पबित्तर सास्तर को जौ बचन पूरो हो, “बाकी एक बी हड्डी तोड़ी ना जागी।” 37#परका 1:7और पबित्तर सास्तर मै एक और जघै जौ बी लिखो है, “जिसकै उनौनै भालो बारो हो, बे बाकी ओर देखंगे।”
ईसु कै दफनाओ जानो
(मत्ती 27:57–61; मरकुस 15:42–47; लूका 23:50–56)
38इसके बाद अरमतिआ के यूसप नै, जो यहूदिऔं के डर सै गुप्त रूप सै ईसु को चेला हो, बानै पीलातुस सै ईसु की लाहस कै लेजानै की बिनती करी और पीलातुस नै आगियाँ दे दई। तब बौ आकै ईसु की लाहस कै ले गओ। 39#यहून 3:1,2और नीकुदेमुस बी, जो पैले ईसु के धौंरे रात मै आओ हो, बौ कम सै कम तीस किलो गन्धरस और एलोब मिलाए भए खसबोईदार मसाले लेकै आओ। 40तब उनौनै ईसु की लाहस लेई और यहूदिऔं के दफनानै की रीति के अनुसार बौ खसबोई बारी चीज के संग कफन मै लपेटो। 41बा जघै मै जहाँ बौ कुरूस मै चढ़ाओ गओ हो बहाँ एक बगीचा हो, और बगीचा मै एक नई कबर#19:41कबर जौ कबर चट्टान मै खोदी भई एक गुफा के जैसे ही ही जिसमै अबी तक कोई बी ना रखो गओ हो। 42और यहूदिऔं के आराम कन्नै की तईयारी के दिन के कारन, और इसताँई कै बौ कबर धौंरेई ही, उनौनै ईसु कै बामै रख दओ।
Избрани в момента:
यहून्ना 19: TKB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
New Life Compute Institute [NLCI] - CC BY-NC-ND 4.0