यूहन्ना 13
13
प्रभु भोज
1फसह कर तिवहार ले आगू, जे घनी यीशु हर जाएन लेहिस कि मोर वो घरी आए पहुचिस, कि संसार ला छोएड़ के दाऊ कर लिघे जाहू, त अपन लोग मन ले जेमन मन संसार मे रहिन, प्रेम रखत रहिस, आखरी घरी मे भी ओहिच कस प्रेम रखिस। 2जे घनी शैतान हर शमौन कर बेटा यहूदा इस्कारियोती कर दिल मे ये डाएल दारे रहिस, कि ओला पकड़वाही त भात खाए के घरी मे 3यीशु हर एला जाएन के कि दाऊ हर सबेच ला मोर हाथ मे कईर देहिस है, अउ मैहर परमेश्वर जग ले आए हो, अउ परमेश्वर जग फिर जात हो। 4भात खाए के अपन कमीज ला उताएर देहिस, अउ साफी ला ले के अपन कनिहा मे बांधीस।
यीशु कर चेला मन के गोड़ धोवई
5त छीपा मे पानी भईर के चेला मन कर गोड़ ला धोईस। अउ जे साफी ले ओकर कनिहा मे बांधे रहिस ओकर से पोछे लागिस। 6जे घनी ओहर शमौन पतरस कर लिघे मे अईस, त पतरस हर ओकर ले कहिस, हे प्रभु, का तय मोर गोड़ ला धोबे। 7यीशु हर ओला उत्तर देहिस, जेला मैहर करथो तय ओला अझे नी जानथस, लेकिन एकर पाछू समझिहा। 8पतरस हर ओला कहिस, तय हर मोर गोड़ ला कभो धोए बर नी पाबे, एला सुईन के यीशु हर ओकर ले कहिस, अगर मैहर तोर गोड़ ला नी धोहू, त मोर संग तोर कुछ भी साझा नी रही। 9शमौन पतरस हर ओकर ले कहिस, हे प्रभु, त मोर गोड़ ही ला नही, पर हाथ अउ मूड़ ला भी धोए दे। 10यीशु हर ओकर ले कहिस, “जेहर स्नान कईर लेहिस है ओला गोड़ कर सिवाए अउ कुछ धोए कर जरूरत नी है, लेकिन ओहर एकदमेच साफ है; लेकिन सबेच कर सबेच नी है।” 11ओहर त अपन पकड़वाए बाला ला जानत रहिस, एकरे बर ओहर कहिस, तुमन सबेच के सबेच झन मन साफ नी हा।
गोड़ धोए कर मतलब
12जे घनी ओहर ओकर गोड़ ला धोए लेहिस, अउ अपन कपरा ला पहिन के फिर बईठ गईस, त ओकर ले कहे लागिन, का तुमन मन समझे हा कि मैहर तुमन मन कर संग मे का करे? 13तुमन मन मोला गुरू अउ प्रभु कहथा, अउ सहिच कहथा, काबर कि मैहर प्रभु यीशु मसीह ही हो। 14अगर मैहर प्रभु अउ गुरू होए के तुमन मन कर गोड़ ला धोए, त तुमन ला भी एक-दूसरे कर गोड़ ला धोए बर चाही। 15काबर कि मैहर तुमन मन ला कईर के दिखाए देहे, कि जेकस मैहर तुमन मन कर संग करे, ओहिच कस तुमन मन भी करा। 16मैहर तुमन मन ले सहिच-सहिच कहथो, कमिया हर अपन स्वामी ले बड़खा नी है, अउ नही भेजल ले, अपन भेजे बाला मन ले। 17तुमन त ये गोएठ मन ला जानथा, अउ अगर ओमे रेंगिहा त धन्य होईहा।
(मत्ती 26:20-25; मरकुस 14:17-21; लूका 22:21-23)
18मैहर तुमन सबेच झन कर बारे मे नी कहथो; जेमन मन ला मैहर चुईन लेहे हो, ओला मैहर जानथो; लेकिन एहर एकरे बर है कि पवित्रशास्त्र कर ये बचन हर पूरा होए, जेहर मोर रोटी ला खाथे, ओहर मोर पर लात उठईस। 19अझे मैहर ओकर होए ले आगू तुमन मन ला चेताए देहथो, कि जे घनी एहर होए जाही त तुमन मन बिश्वास करिहा, कि मैहर ही प्रभु यीशु हो। 20मैहर तुमन मन ले सहिच-सहिच कहथो, कि जेहर मोर भेजे बाला ला गरहन करथे, ओहर ओला गरहन करथे। अउ जेहर मोला गरहन करथे, ओहर मोर भेजे बाला ला गरहन करथे।
बिश्वासघात कती इसारा
21ये गोएठ ला कह के यीशु हर आत्मा मे ब्याकुल होईस, अउ ये गवाही देहिस, “मैहर तुमन मन ले सहिच-सहिच कहथो कि तुमन मन ले एक झन हर मोला पकड़वाही।” 22चेला मन संशा संदेह करिन, कि ओहर काकर बारे मे कहथे, एक-दूसर मन कती देखे लागिन। 23ओकर चेला मन ले एक झन हर जेकर ले यीशु हर प्रेम रखत रहिस, यीशु कर छाती कती झुकिस अउ बईठे रहिस। 24तब शमौन पतरस हर ओकर कती इसारा कईर के पुछिस, “बताए दे ओहर काकर बिषय मे कहत रहिस?” 25त ओहर ओहिच कस यीशु कर छाती कती झुईक के ओकर ले पुछिस, “हे प्रभु ओहर कोन है?” यीशु हर उत्तर देहिस, “जेला मैहर ये रोटी कर टुड़का ला डुबाए के देहू, ओहिच हर है।” 26अउ यीशु हर टुड़का ला डुबाए के शमौन कर बेटा यहूदा इस्कारियोती ला देहिस। 27अउ टुड़का लेहत ही शैतान हर ओकर उपर मे समाए गईस; तब यीशु हर ओकर ले कहिस, जेला तय करथस, ओला तुरतेच कर। 28लेकिन बईठे बाला मन मे ले कोनोच मन हर नी जानिन कि ओकर ले ये गोएठ ला काबर कहिस। 29यहूदा जग झोला रहत रहिस, एकरे बर कोनो-कोनो हर समझिन कि यीशु हर ओकर ले कहत रहिस कि जे कुछ हमन मन ला जरूरत होही ओला बेसाए लेबे, या ये कि गरीब मन ला कुछ देही। 30तले ओहर टुड़का ला ले के तुरतेच बाहरी कती चईल देहिस, अउ एहर राएत कर घरी रहिस।
एक नावा हुकूम
(मत्ती 26:31-35; मरकुस 14:27-31; लूका 22:31-34)
31जे घनी ओहर बाहरी कती रेंग देहिस, त यीशु हर कहिस, “अब मैनसे कर बेटा कर अउ परमेश्वर कर महिमा ओकर मे होईस; 32अउ परमेश्वर हर भी अपन मे ओकर महिमा करही, बरन तुरतेच करही। 33हे लईका मन, मैहर अउ तनिक समय बर तुमन मन जग रहू: फिर तुमन मन मोला खोजिहा, अउ जेकस मैहर यहूदी मन ला कहे रहे, ‘जहा मैहर जात हो, हुवा तुमन मन नी आए सकथा’ ओहिच कस मैहर अझे तुमन मन ला भी कहथो। 34मैहर तोला एक नावा हुकूम देहथो कि एक-दूसर ले प्रेम रखिहा, जेकस मैहर तुमन मन ले प्रेम रखे हो, ओहिच कस ही तुमन मन भी एक दूसर ले प्रेम रखिहा। 35अगर अपन मे प्रेम रखिहा, त एहिच ले सबेच झन मन जानही कि तुमन मोर चेला हवा।”
पतरस के इनकार करे कर भविष्यवानी
36शमौन पतरस हर ओकर ले कहिस, “हे प्रभु, तय हर कहा जाथस?” यीशु हर उत्तर देहिस, “जे ठन मैहर जाथो, हुवा तुमन मन अझे मोर पीछू मे नी आए सकथस।” 37पतरस हर ओकर ले कहिस, “हे प्रभु, अझे मैहर तोर पीछू काबर नी आए सकथो? मैहर त तोर बर अपन प्रान ला भी दे देहू।” 38यीशु हर उत्तर देहिस, का तय हर मोर बर अपन प्रान ला देबे? मैहर तोर ले सहिच-सहिच कहथो कि मुरगा हर बांग नी देहे रही, तब ले तय हर तीन बार मोला इनकार करबे।
Избрани в момента:
यूहन्ना 13: SGJNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.