लूका 15
15
हरानो भओ भेंणाको कहानी
(मत्ती. 18:12-14)
1बहुत जनै कर उठान बारे और पापी आदमी येशूके ठिन बचन सुननके ताहीं आए करत रहएं। 2जा आदमी त पापीके ग्रहण करत हए, और बिनके सँग खानपिन करत हए कहिके फरिसीनको समुह और मोशाको नियम कानुन सिखान बारे गनगन करन लागे। 3तओ येशू बिनके जा कहानी कही: 4“अगर तुम मैसे कोइके ठिन सओ भेंणा हएं। अगर बे मैसे एक हराएजाए, तओ तुम नेहात्तओ बे उनानसय भेंणाके जंगली इलाकामे छोड देबैगो, और जब तक बो हरानो भओ भेंणाके नाए पएहओ तबतक बो एक हरानो भेंणाके ढुणैगो। 5और जब मिल जात हए, तओ बो खुसीसे भेंणाके अपनो कँधा उपर उठाएलेत हए। 6और अपन घर आएके सँगीनके और परोसीनके इकट्ठा करके कहात हए, ‘मिर सँग आनन्द करओ, काहेकी मिर हरानो भओ भेंणा मिलीगओ हए।’ 7मए तुमसे कहात हओं; जहे रितिसे पाप करन छोडके परमेश्वर घेन घुमन बारे, उनानसय धर्मीसे फिर अपनो पाप मानके पछुतो करन बारो एक पापीके ताहीं स्वर्गमे बहुत आनन्द होबैगो।”
हरानो भओ सिक्काको कहानी
8फिर येशू एक औ कहानी कहिके बताइ, “अगर कोइ बैयारके ठिन दश चाँदीके सिक्का हएं और बो मैसे एक सिक्का हराएजाए, तओ बो दिया पजारैगी, और घरमे बढारैगी और तबतक ध्यानसे ढुणैगी जब तक बोके पबैगीनाए। 9और जब बो हरानो सिक्का मिल जात हए, तओ बो अपन सँगी परोसीनके इकट्ठा करके कहात हए, ‘मिर सँग आनन्द करओ, काहेकी मिर हरानो भओ चाँदीको सिक्का मिलिगओ हए।’ 10मए तुमसे कहात हओं, जहे रितिसे एक पाप करन छोडके परमेश्वर घेन घुमन बारे पापीके ताहीं परमेश्वरको स्वर्गदूत अग्गु आनन्द होबैगो।”
हरानो भओ लौंणाको कहानी
11फिर येशू एक औ कहानी कही, “एक आदमीको दुई लौंणा रहएं। 12बो मैसे छोटो लौंणा अपन दौवासे कही, ‘ए दौवा, धनसम्पति मैसे जो हिस्सा मिर हए, बो मोके हबए दइदे।’ तओ दौवा दोनए लौंणनके अपनी सम्पति अंशबन्डा करदइ।
13और कुछ दिन पिच्छु छोटो लौंणा सब कुछ इकट्ठा करके एक दुर देशमे चलो गओ, और हुवाँ बो मोज-मजामे अपन सब सम्पति उणाए डारी। 14जब बो सब सम्पति खर्च करडारी, तओ बो देशमे बडो अनिकाल पणो, और बोके ठिन खानके ताहीं कुछ नाए रहीगओ। 15और बो एक आदमीके ठिन काम करनके ताहीं गओ, जौन बो देशको नागरिक रहए, बो बोके अपन खेतमे सोरा चुगानके ताहीं पठाइ। 16और बो इतनो भुँखो रहए, कि बो सोराको खान बारो चरहासे खानके ताहीं फिर खुसी रहए। काहेकी बोके कोइ कुछु नाए देत रहए। 17जब बोके अपन अवस्थाके बारेमे पता चलो, तओ बो सोँचन लागो, ‘मिर दौवाके कमैयान्के ताहीं पेट भरके खाएके फिर, उबरके औरेनके देनके फिर हुइजात हए, पर मए हियाँ भुखो मरन डटो हओं। 18मए अब उठके अपन दौवाके ठिन जएहओं और कएहओं, कि दौवा, मए परमेश्वरके बिरुद्धमे और तिर नजरमे पाप करो हओं। 19अब मए तिर लौंणा काहनको लायक नाए हओं। मोके तए काम करन बारे कमैया मैसे एक बिनही कता बनाएले।’”
हरानो भओ लौंणाको लौटो
20“तओ बो देशके छोडके, बो अपन दौवाके ठिन जानके ताहीं चलपणो। बो हबए दुरए रहए, बोको दौवा बोके देखके दयासे भरीगओ, और लौंणा घेन दौडके बोके गलबैयाँ डारी, और बहुत चुम्मन करी।
21लौंणा बोसे कही, ‘दौवा, मए परमेश्वरके बिरुद्धमे और तिर नजरमे पाप करो हओं; और अब मए फिरसे तिर लौंणा कहान लायकको नाएरहो हओं।’ 22पर दौवा अपन कमैयासे कही, ‘जल्दी अच्छेसे-अच्छे लत्ता निकारके बोके पैँधाएदेओ, और बोको उँगरीमे, औँठी, टाँगमे जुता लागए देओ, 23और बडो भोज खबानके ताहीं अच्छो जानबर तयार करओ, ताकी हम खामएं और आनन्द मनामएं। 24काहेकी जा मिर लौंणा मरो कता रहए, पर फिर जिन्दा भओ हए, हरानो रहए अब मिलिगओ हए।’ तओ बे आनन्द मनानलागे।”
बडो लौंणाको गुनासो
25“जब जा सब होत रहए, तओ बोको बडो लौंणा खेतमे काम करत रहए। और जब बो खेतसे, घरके ढिँगै पहुँचो, तओ बो नाचगानको अबाज सुनी। 26और बो एक कमैयाके बुलाएके पुँछी, ‘जा का हुइ रहो हए?’ 27कमैया बोसे कही, ‘तुमर भइया घरमे लौटके आओ हए, और तुमर दौवा जानबर काटके बडो भोज तयार करबाइ हए। काहेकी बो सुरक्षित और स्वस्थ घर लौटो हए।’ 28जा सुनके बो गुस्सासे भरीगओ और घरमे भितर जानके नाए मानी: जहेमारे बोको दौवा बाहिर आओ और घर भितर आनके ताहीं बडो लौंणासे बिन्ती करन लागो। 29बो अपन दौवाके जबाफ दइ, ‘देख; मए इतनो साल तिर सेवा कररहो हओं, और कभी फिर तिर आज्ञा उल्लङ्घन नाए करो, तहुँफिर तए मोके एक जानबरको बच्चा फिर नाए दओ, कि मए अपन सँगीके सँग आनन्द मनाए पामओं। 30जब तिर जा लौंणा, जौन तेरो धनसम्पति वेश्याके सँग उणाएके आओ हए, और तए बोके ताहीं जानबर काटके बडो भोज खानके तयार करबाओ हए।’ 31दौवा अपन लौंणासे कही, ‘मेरो लौंणा, तए त मिर सँग सदिमान हए; और जो कुछ मिर हए बो सब तेरी हए। 32पर अब आनन्द करन और खुसी होनचाहो काहेकी जो तेरो भइया मरो जैसो रहए, बो जिन्दा भओ हए, हरानो रहए पर अब मिलिगओ हए।’”
Избрани в момента:
लूका 15: THRNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.