Matiu 4
4
Na Toketokena i Jisu
(Maka 1.12-13; Luke 4.1-13)
1Ego pa liguna aza za toka zaeni pa qega na Ongu Tabuna i Jisu ko mi toketokea na bangaradi na tomete za gua. 2Ko za tabutabu ganigani ka madengavuluputa ranena beto madengavuluputa bongina aza, ko za burana. 3Ko totonai za kamu za na bangara toketoke, ko ari za guni vei aza, <<Vei muna na Tuna na Tamaza ao, za mu parangaria na patu ari ko mari peluku bereti,>> za gua aza.
4Ba za oea i Jisu aza, ari za gua vei, <<Za paranga za na Kutikuti Tabuna,
<Nake bereti gu makana
za toani za na tinoni,
goto doru paranga tu
za parangadi na Tamaza!>#Vavanau 8.3. za gua,>>
za gua i Jisu.
5Ego beto za toka laoni na bangaradi na tomete pa guguzu tabuna pa Jerusalema i Jisu, ko za vaturua pa are babanana na kakabarena na zelepade, beto ari za guni vei, 6<<Vei muna na Tuna na Tamaza ao, za mu soqolo gore! Ura ari za gua vei za na Kutikuti Tabuna,
<Aza mina garununigo
ria na nana mateana ao,
ko mari kalonigo na limadi,
ko na nenemu minake tupani pa patu,'#Kera Vatarazae 91.11-12.> za gua,>>
za gua na bangaradi na tomete.
7Nari za oea i Jisu za na bangaradi na tomete, ari za guni vei, <<Ari mutu za gua vei za na Kutikuti Tabuna, <Muke podekia na Bangara na mua Tamaza!>#Vavanau 6.16. za gua,>> za gua i Jisu.
8Nari za toka zaeni mule na bangaradi na tomete pa maka kubo ululuna i Jisu, ko za vabatini doru binangara pa kasia guguzu beto na dia neqi lavalavatadi. 9Beto ari za guni vei i Jisu, <<Dorudi ari za ao mana vanigo, vei muna lotu gore ko muna vatarazaeziu ara,>> za gua.
10Nari za oea i Jisu aza, <<Mu keni vazou, Setani! Ura ari tu za gua vei za na Kutikuti Tabuna,
<Na Bangara na mua Tamaza gu
mu vatarazaea,
beto aza gu makana
mu nabuluni!'>#Vavanau 6.13. za gua,>>
za gua i Jisu.
11Nari za taloi keni za na bangaradi na tomete, ko ani ria na mateana qari kamu ko qari tokani i Jisu.
I Jisu za Podalaini na Nana Roiti pa Qalili
(Maka 1.14-15; Luke 4.14-15)
12Ego totonai za nongoroni za i Jone za qari tori valugea tu pa ruma varipiu qari gua, nari za taloi keni veinana pa Qalili i Jisu. 13Ko za iolo loia za pa Nazareti ko za gore suvere vei pa Kepaniami pa keketai ovuku pa Qalili, pa pikata ia pa Zabuloni beto pa Naputalai. 14Ko za gore votu za na paranga za pojai i Aisea na tinoni korokorotai, ari za gua vei,
15<<Na pezo Zabuloni beto na pezo Naputalai,
na zona vei pa ovuku,
pa karovona pa pie Jodani,
pa Qalili tadiria na tinoni karovodi.
16Ria na tinoni qari suvere pa rodomo
qari batia maka kabere lavatana.
Ria qari suveria na ia
za angovia na ongongu uke
za goreria na kabere,>>#Aisea 9.1-2.
za gua i Aisea.
17Podalai na totozo aza za podalai tarae i Jisu, ari za gua vei, <<Mu gabala gamu! Ura mi togagita gu za gua za na binangara pa noka!>> za gua aza.
I Jisu za Kukuria ari ka Made Tinoni Abu
(Maka 1.16-20; Luke 5.1-11)
18Tonai za korapa popoananana pa ovuku Qalili i Jisu, nari za batiria ari kori tamatazi ari Saimone aza za tavaizongo i Pita beto i Aduru na taina. Qari korapa vaqaradia pa ovuku, ura na tinoni abu ari kori. 19Ko ari za gudi vei i Jisu ari kori, <<Mae, lame! Tutiziu, ko ma roitidigamu na tinoni abu tinoni,>> za gudi. 20Na totozo tugu aza qari loi paledi ketakoi ari kori za na dia vaqara, ko qari lao tutiadia i Jisu.
21Ego ko za jola lao nari za batiria gu mule i Jisu ari kori goto tamatazi, ari Jekopi beto i Jone, kori tuna marene i Jebeti. Qari korapa tugu zae tavitia pa koaka za na tamadi i Jebeti, ko qari korapa oke tuvakaria na dia vaqara, nari za kukuria i Jisu ari kori tamatazi ria. 22Na totozo tugu aza za qari loi paledi ari kori za na dia koaka beto na tamadi, ko qari lao tutiadia i Jisu.
I Jisu za Varivagigalai, za Tarae, beto za Varisalana
(Luke 6.17-19)
23Ego ko za lekoria i Jisu za doru ia pa Qalili, ko za kole varivagigalai pa dia ruma varivarikamudi, za taraeni na nongoro leana na binangara tana Tamaza beto za salana paledi aza ria doru mo beto na vagauru qari koleria na tinoni. 24Ko na nongorona i Jisu za lekoia na doru ia pa Siria. Ko qari toka kamudi tana ria doru za koleria na okokoto mo vagauru, ria qari gozororia na vitigi lavalavata, ria za lugeria na tomete ikikeredi, ria qari kirekirenge, beto ria za uke kale na kobukobu tinidi. Ko za salana betoria i Jisu ria doru. 25Ko qari tutia i Jisu za ria na minete lavata koko veidi pa Qalili, pa Manogaguguzu, pa Jerusalema, pa Jiudia, beto ria pa maka karovona Jodani.
Избрани в момента:
Matiu 4: GHN
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2024, Islands Bible Ministries. All rights reserved.