UBWANDILO 44
44
Ikinwelo iki kyayongile
1Popapo Yosefu alinkumbula undindilili unkulumba ugwa nnyumba yake alinkuti, “Gwisusyemo mmifuko gya bandu aba ifyakulya fi fingi itolo ukufwana na maka gabo, indalama sya mundu gwesa usibike kangi mu mfuko gwa uyu na uyu. 2Loli ikinwelo kyangu kya siliva kyo gwingisye mu mfuko gwa uyu yo nkeke kuli bosa, palikimo nindalama isi atwele isya kula ifyakulya fyake.” Umwene undindilili unkulumba yula alinkusibomba bo mumo Yosefu alimbulile. 3Lelo bo bukile, nulubunjubunju fiyo, balinkwakubasindikila nimbunda syabo. 4Abene bo bendilepo akatambo kapimba itolo ukufuma nkaya, Yosefu alinkumbula undindililigwake unkulumba alinkuti, “Sumuka ubakonge abandu bala; lelo linga uyile kubaga ukabalalusye ukati, ‘Ngimba nongwa yafiki mukupyanikisyapo imbibi panunu? 5Nongwa yafiki muniyile ikinwelo iki umalafyale gwangu ikunwelamo, iki umwene ikulagukisyamo isya nkyeni? Isi mubombile mbibi fiyo!’ ” 6Umwene undindilili unkulumba nnyumba ya Yosefu yula alinkwakubaga abandu bala, alinkubalalusya bo mumo Yosefu alimbulile. 7Abene balinkundalusya balinkuti, “Ngimba ikusanusya fiki umalafyale gwitu apa ikuyoba bo bunobuno? Isi syo siyege kubutali kuli twe babombi bako, kali syo twati tusibombege bo sisisi? 8Buno indalama sila twasyagile mmifuko gyitu twagomwike nasyo, ukufuma ku kisu kya Kanani. Po twati tuhiyege bulebule kangi nnyumba ya malafyale gwitu ikyuma kya siliva pamopene ni kya golide? 9Linga ukyagile ikinwelo kyako na yumo nkati mmyitu uswe twe babombi bake, kununu ukuti ise agogigwege itolo, kangi na yuyuswe itolo twise tuyege batumwa ba malafyale gwitu.” 10Umwene undindilili unkulumba nnyumba ya Yosefu yula alinkubabula alinkuti, “Ena, bo siyege bunobuno ukufwana na mumo muyobile, uyu linga nisile kumwaga nakyo ikinwelo, yo ise ayege ntumwa gwangu, abangi bo bisakuyaga babuke itolo.” 11Nakalinga itolo umundu yula alinkulonda ikinwelo kila mmifuko gyabo bosa, 12alinkutala umfuko gwa uyu ali nkulu gwabo bosa alinkwakumalikisya ku mfuko gwa uyu ali nnandi kuli bosa, lelo ikinwelo kila balinkukyaga mu mfuko gwa Benjamini. 13Popapo balinkunyafula imyenda gyabo, ukunangisya ubusulumanie umundu gwesa alinkufyusya umfuko gwake pa mbunda yake, balinkugomokela nkaya kala.
14Yosefu akali alimo nnyumba apa Yuda afikaga pamopene na bamyabo; popapo abene balinkufugama pasi balinkundambila Yosefu. 15Umwene Yosefu alinkubalalusya alinkuti, “Fyo findu fiki ifi mumbombile? Ngimba syo mukasyagania ukuti umundu uyu ali bo yuyune abagile ukusyagania simo isya umwe pakubombela mbulagusi?” 16Umwene Yuda alinkwamula alinkuti, “Kali po tuyobege siliku kumyako gwe malafyale gwangu? Kali po tukulongaga ukuti tukaya ninongwa kumyako? Kali po tukwinokesyaga bulebule? Yo yu Kyala uyu afumbwile ubutulanongwa bwa twe babombi bako. Keta, uswe kangi na uyu umwagile nikinwelo kyako twitendekisye itolo na kukuya batumwa bako gwe malafyale gwangu.” 17Yosefu alinkuti, “Syo siyege kubutali nanine sisisi. Ngabagila nukusibomba napanandi. Mwene uyu numwagile nikinwelo yo ikuyaga ntumwa gwangu, loli mwesa mwe binake mukugomokaga ku gwisemwe mbununu itolo, mwe basita kuti umundu ababombele simo imbibi.”
Yuda ikumpyelekekesya Benjamini
18Popapo Yuda alinkusegelela kwa Yosefu alinkuyoba nagwe alinkuti, “Gwe malafyale gwangu, nikukusuma ne mbombi gwako nikuti, unyitikisye ne mundu gwako ukuti njobepo isyu limolyene itolo bo kupilika, ungangalalilaga ne mbombi gwako; namanga ugwe ufwene itolo na yu Farao yuyo. 19Ugwe gwe malafyale gwangu, gwatulalwisye twe bandu bako gwatile, ‘Ngimba muli nagwe ugwisemwe, pamo ugwamyinu?’ 20Po uswe tulinkukwamula tuli nkuti, ‘Ena, gwe malafyale gwitu, tuli nagwe utata uyu akangele, kangi nu gwamyitu unnandi, umwanake ugwambukangale bwake. Unkulu gwake yo afwile, lilino yo yuyuyu mwene itolo uyu asyele mu nna; ugwise anganile fiyo.’ 21Po lelo gwatubulile twe bandu bako ukuti, ‘Mukisege nagwe kuno, ko kuti nise nunkete na maso gangu.’ 22Tulinkukubula gwe malafyale gwangu tulinkuti, ‘Undumyana yuyuyu atikulekanapo nu gwise, linga alekene nu gwise po ugwise isakufwa.’ 23Po lelo ugwe ulinkutubula twe bandu bako ulinkuti, ‘Linga mutikwakwisa nu nnuguna gwinu, mutisakuketana nanine napanandi.’ 24Lelo bo tugomokile kwa tata umbombi gwako twalimpangile amasyu gako gwe malafyale gwangu.
25“Lelo bo tata atubulile atile, amubukege kangi mukatulileko ifyakulya finandi itolo, 26uswe twakanile twatile, ‘Tukabagila ukugomokelako, pene papo linga gwitike ukuti tubukege nu nnuguna gwitu po tukusumuka ukubuka, tukamanya ukwakuketana nu mundu yula linga tundekile umwanike.’ 27Popapo tata umbombi gwako alinkuti, ‘Nanumwe musimenye itolo ukuti, Unkasi gwangu alimbapile abana babili, yumo yo ayongile itolo, ndinkuti, 28ndeke, pamo akoligwe nikinyamana, keta ngambona ukwisakufika na ku lilino kuno. 29Lelo linga yope na yuyuyu mukunsosyapo kumyangu, linga imbibi simo sikwakungwila kulakula, nisakubalililaga yuyumwe nimbuha syangu isi ukwakufika na mu mwipumba.’ 30Lilino linga njile kufika kwa tata, lelo agile ukuti tukaya nagwe umwanike, po asumwike pakufwa, namanga gwe malafyale gwangu, ubumi bwake bosa buli mu ndumyana yuyuyu. 31Po bunobuno twe bandu bako twisakubukuyisya ubufwe bwake, nkabalilo kake aka mbukangale aka, panongwa ya kitima. 32Panongwa yiyiyi nafingile kwa tata panongwa ya ndumyana uyu ukuti, ‘Linga ndikugomoka nagwe kumyako gwe tata pokununu nise njege ninongwa mbumi bwangu bosa.’ 33Une ne njege ntumwa gwako mbuyo bwa ndumyana uyu; undeke undumyana abukege na binake. 34Buno ngamanya ukugomokela kwa tata bo ngaya nagwe undumyana uyu? Ndi nulutende ukuti ngasiketege imbibi isi sikwakungwilaga tata.”
Избрани в момента:
UBWANDILO 44: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.