UBWANDILO 42
42
Abamyabo ba Yosefu bikubuka kukula ifyakulya nkisu kya Egiputi
1Bo Yakobu apilike ukuti filimo ifyakulya nkisu kya Egiputi, popapo alinkubalalusya abanake alinkuti, “Ngimba nongwa yafiki mukuketana itolo? 2#Imbo 7.12Une mbilike ukuti ifyakulya filimo nkisu kya Egiputi, amusulukege, mubuke mukatulileko ifyakulya ko kuti tupone, tuleke ukufwa.” 3Bunobuno abamyabo ba Yosefu bala balinkubuka kukula ifyakulya nkisu kya Egiputi. 4Loli Yakobu alinkusita nukuntuma Benjamini unnuguna gwa Yosefu palikimo na bamyabo papo apasyaga ukuti pamo yope imbibi simo sise singwile. 5Bunobuno abana ba Israeli pamopene na bandu abangi balinkwisa kukula ifyakulya, papo injala yagwile nkisu kya Kanani.
6Pa kabalilo aka Yosefu ali ndindililakisu mulamula nkisu kya Egiputi, kangi yo uyu abulikisyaga ifyakulya abandu bosa aba nkisu kila. 7Abamyabo ba Yosefu balinkwisa, balinkufugama pasi nukundambila. Yosefu alinkubabona abamyabo alinkubamanya, loli alinkufwana akabamanya napanandi. Alinkuyoba kumyabo amasyu amakali; alinkubalalusya alinkuti, “Ngimba mufumile kugu?” Abene balinkwamula balinkuti, “Tufumile nkisu kya Kanani, twisile pakula ifyakulya.” 8Bunobuno Yosefu alinkubamanya abamyabo, loli abene balinkusita nukummanya umwene. 9#Bwa 37.5-10Alinkukumbuka injosi sila agogilwe isi syabayobaga abamyabo. Alinkubabula alinkuti, “Umwe muli batendesi, mwisile pakukiketa ikisu kyitu muno kiyilile amaka gake.” 10Abene balinkumwamula balinkuti, “Mma, tukaya batendesi gwe malafyale gwitu, twe babombi bako twisile nkula ifyakulya fyene. 11Twesa tuli bana ba mundu yumoywene twe babombi bako. Tuli bandu abasubiligwa, tukaya batendesi mma.” 12Umwene Yosefu alinkuti, “Mma, loli mubingilile pakutendela ubonywa bwa kisu kyitu mumo kiyilile.” 13Abene balinkuyoba balinkuti, “Twe babombi bako tuli kalongo na babili (12) patata, tuli bana ba mundu yumoywene nkisu kya Kanani, unnuguna gwitu unnandi kuli twesa yo asyele na tata, loli ugwamyitu yumo yo akayako ku bumi.” 14Yosefu alinkubabula alinkuti, “Mo muno njobile ukuti umwe muli batendesi. 15Lilino nikuya pakubagela mu njila iyi, Nikufingila mu ngamu ya Farao nikuti, Mutisakusokamo mbuyo ubu, ukwisakufika apa ikwisilaga unnuguna gwinu unnandi kuli mwesa. 16Muntume yumo umwininu abuke akamwege, akisege nagwe kuno unnuguna gwinu yuyuyu, loli mwe bangi mwesa mukulindililigwaga tasi nnyumba ya bannyololo, ko kuti ngete linga amasyu ginu gabonike ukuya ga bwanaloli, pamo mma, linga bukayamo ubwanaloli nikufingila mu ngamu ya Farao ukuti naloli umwe muli batendesi.” 17Popapo alinkubigalila bosa nnyumba ya bannyololo amasiku matatu.
18Pisiku lya butatu, Yosefu alinkuyoba na bannyololo alinkuti, “Lilino mubombe isi une nikubabula, po mukuyaga ku bumi, papo une ngumbombela Kyala; 19linga muli basubiligwa naloli, po mundeke yumo umwininu asyale nnyumba ya bannyololo, mwe banine mubukege, mubatwalile abannyumba syinu ifyakulya ifi mulile. 20Mukisege nagwe unnuguna gwinu unnandi kuli mwesa, ko kuti nise manye linga amasyu ginu ga bwanaloli, po mutisakugogigwa mma,” abene balinkwitika. 21Popapo balinkuyobesania balinkuti, “Mbwanaloli bosa, inongwa iyi yitugwilile ukufwana na isi twalimbombile ugwamyitu Yosefu, twabubwene ubutolwe bwake bo ikupyelesya kumyitu ukuti tumpoke, loli tulinkusita nukumpilika. Yo nongwa iyi nanuswe twingile mbutolwe bububu.” 22#Bwa 37.21-22Umwene Rubeni alinkubabula alinkuti, “Bule, ngimba ngababulile umwe ukuti muleke ukumbombela imbibi umwanike? Loli mulinkusita nukupilika. Keta, lilino tukumeleligwa panongwa ya bufwe bwake.” 23Bakasimenye ukuti Yosefu ikubapilika, namanga alipo uyu asanusyaga amasyu gabo kwa Yosefu. 24Popapo Yosefu alinkusokamo nkyeni mmyabo alinkwakulila amasosi, alinkugomoka kangi ukuyobesania nabo. Alinkumwega Simeoni, alinkumpinya bo bikuketa namaso.
Abamyabo ba Yosefu bikugomokela ku kisu kya Kanani
25Popapo Yosefu alinkulagila ukuti babisukisye ifyakulya mmifuko gyabo kangi bagomole ni ndalama sya mundu gwesa isi atwele, babike mu mmifuko gyabo kangi babape ni mbayo ya pa njila, abene ababombi bake balinkusibomba syosa sisisi.
26Popapo abamyabo ba Yosefu balinkugifyusya imifuko gya fyakulya pa mbunda syabo, balinkubuka. 27Bo bafikile pabugono, popapo umwinabo yumo alinkwabula umfuko gwake ukuti ayegelemo imbunda yake ifyakulya; alinkusyaga indalama pa ndomo gwa mfuko gwake. 28Alinkubabula abinake alinkuti, “Bagomwisye indalama syangu, keta isi sili pa bwina bwa mfuko gwangu!” Popapo indumbula syabo silinkunyololoka, balinkutetema kangi balinkuyobesania balinkuti, “Ngimba fyo findu fiki ifi Kyala atubombile?”
29Bo bafikile ku gwisabo kwa Yakobu nkisu kya Kanani, balinkumpangila syosa isi syabagwilile. 30Balinkuti, “Undindilila kisu kila alinkuyoba kumyitu na masyu ga makali itolo, atigi tuli batendesi. 31Popapo tulinkumbula tulinkuti, ‘Tuli bandu basubiligwa itolo, tukaya batendesi mma. 32Tuli kalongo na babili patata, tuli bana ba mundu yumoywene; umwinitu yumo yo akayako kubumi, loli unnandi kuli twesa yo asyele na tata nkisu kya Kanani.’ 33Lelo bo tundingenie popapo umwene alinkuti, ‘Mo muno ngubamanyilaga ukuti muli basubiligwa, oko, mundeke kumyangu kuno yumo umwininu, umwe mubukege mubatwalile ifyakulya fya njala aba munyumba syinu. 34Mukisege nagwe unnuguna gwinu unnandi kuli mwesa po msakumanyaga ukuti mukaya batendesi loli muli bandu abasubiligwa itolo, po lelo fyosa ifi linga mukula umwe po mwisakulaga itolo fyosa ifi linga mukula nkisu iki.’ ”
35Lelo bo bikusosyamo ifyakulya mmifuko gyabo, umundu gwesa alinkwaga kalimo mu mfuko gwake akanyambi ka ndalama. Ugwisabo pamopene na banake bo batubwene utunyambi twa ndalama, ulutende lulinkubaga. 36Umwene Yakobu ugwisabo alinkubabula alinkuti, “Mwisakundeka ne nsita mwana nayumo; Yosefu akayako ku bumi, yope na Simeoni atikuboneka, kangi lilino mukulonda ukubuka na Benjamini. Nongwa ya fiki sikungwila une syosa sisisi?” 37Popapo Rubeni alinkumbula ugwise alinkuti, “Gwise ubagoge abanangu bo babili linga ndikwakugomokako nagwe Benjamini. Ndeke ayege mmaboko gangu, une ngwakugomoka nagwe Ukwisa kumyako.” 38Umwene Yakobu alinkuti, “Ukabagila ukubuka nu mwanangu, keta, unkulu gwake afwile, lelo asyele mwene yuyuyu. Lumo isakugogigwa mu njila, po nisakubalilaga yuyumwe nimbuha syangu isi ukwakufika na mwipumba.”
Избрани в момента:
UBWANDILO 42: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.