UBWANDILO 39
39
Yosefu nu nkasi gwa Potifari
1Bo babukile nagwe Yosefu nkisu kya Egiputi, popapo alinkumbula Potifari umw'Egiputi, uyu ali yo yumo nkati mbalongosi ba Farao. Yo alinkulumba gwa balindilili ba Farao; alinkumula Yosefu ku banya Ishimaeli aba balisile nagwe. 2#Imbo 7.9Umwene Kyala yo alinkunsaya Yosefu, kangi imbombo syake syosa silinkwenda bununu itolo. Yosefu alinkwitugala nnyumba ya malafyale gwake Potifari umw'Egiputi yula. 3Yope malafyale gwake alinkusyagania ukuti Kyala ansayile Yosefu nukuti asipelaga ukuya nnunu syosa isi Yosefu asibombaga. 4Bunobuno Potifari alinkuhoboka nagwe Yosefu muno abombelaga. Alinkumwimika ukuya nkulumba gwa pa nyumba yake yosa, na pa fyosa ifi ali nafyo. 5Ukwanda pa kabalilo kalakala Potifari amwimikilege Yosefu ukuya nkulumba gwa pa nyumba yake, nukuya pamwanya pali fyosa fifyo ali nafyo, Kyala alinkuyisaya inyumba ya mundu yula umw'Egiputi panongwa ya Yosefu. 6Pakuya nu mundu uyu Yosefu, Potifari alinkusita nukwinogonelako nakandu kamo, loli fyene fi findu ifi alyaga.
Yosefu ali mmogi fiyo, gope nu mbili gwake gwayengigwe bununu. 7Lelo bo gakindilepo amasiku manandi, popapo unkasi gwa malafyale gwake alinkunketa Yosefu popapo alinkwenda nukunnyonywa. Alinkumbula alinkuti, “Isaga kuno tubombe isya bulogwe.” 8Loli Yosefu alinkukana alinkumbula unkasi gwa malafyale gwake alinkuti, 9“Keta, ukuya nanine pa nyumba yake umalafyale gwangu, kakayako nakamo aka ikwiyaya nako. Fyosa ifi ali nafyo fyo afibikile mmaboko gangu, akakalekapo nakamo akandu aka nnyumba yake, loli yuyugwe gwimwene, papo uli nkasi gwake. Loli po nati mbombege bulebule isya buniongafu ubukulumba bo bububu nukutula inongwa kwa Kyala?” 10Palema unkikulu yula andalusyaga Yosefu isiku ni siku ukuti atule nagwe inongwa, loli Yosefu alinkukana. 11Ilisiku limo apa Yosefu ingilaga nnyumba ukwakubomba imbombo yake, bo akayamo nayumo uyungi umbombi gwa nnyumba; 12popapo unkikulu yula alinkukola umwenda gwa Yosefu alinkumbula alinkuti, “Oko, tubombe isya bulogwe.” Loli Yosefu alinkundekela unkikulu yula umwenda ugu afwele, alinkubopa, alinkusoka nnyumba. 13Lelo bo unkikulu yula agile ukuti Yosefu andekile umwenda gwake, abopile panja, 14alinkubakolela ababombi ba nnyumba yake alinkubabula alinkuti, “Amukete mwesa, undume gwangu atutwalile unHiburi uyu ukuti ise atunyasyege itolo. Undumyana uyu alingile muno alondaga ukuti abombe nanine isya bulogwe, po lelo nendile nukukuta inguto ingulumba fiyo. 15Bo agile ukuti ngukuta, po endile nukubopela panja, andekile numwenda gwake.” 16Popapo unkikulu yula alinkugubika umwenda gwa Yosefu, lelo bo undume agomwike, 17alinkumbula inongwa sisisi alinkuti, “Umbombi unHiburi uyu ututwalile, alingile nnyumba ukuti anyasye une, 18loli bo ngutile fiyo popapo alinkwenda nukubopela panja, alinkundekela umwenda gwake.” 19Potifari umalafyale gwa Yosefu alinkukalala fiyo bo apilike amasyu aga unkasi alimbulile, agakuti, “Umbombi gwako ambombile isyakuti nisyakuti.” 20Popapo Potifari alinkumwega Yosefu, alinkumbika nnyumba ya bannyololo muno babikigwaga abapinyigwa ba ndagili gwa kisu. Yosefu alinkuya mulamula. 21#Imbo 7.9Loli Untwa alinkuya nagwe Yosefu alinkunnangisya ikisa kyake ikikulumba, bunobuno Yosefu alinkukaba ubukundwe nkyeni mu ndindilili gwa bapinyigwa. 22Popapo undindilili gwa nyumba ya bapinyigwa alinkubabika bosa abapinyigwa mmaboko ga Yosefu, 23alinkumpa amaka pali syosa isi syabombigwaga nkati mbapinyigwa. Undindilili gwa bapinyigwa alinkusita nukwinogonelako nasimo muli fyosa ifi fyali pasi pa Yosefu, namanga Kyala ali nagwe. Untwa yo yuyo asipelelaga syosa ukwendela mbununu isi Yosefu abombaga.
Избрани в момента:
UBWANDILO 39: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.