UBWANDILO 32
32
Yakobu ikwitendekesya ukwaganila na Esau
1Umwene Yakobu alinkusumuka injila yake, popapo abandumi ba Kyala balinkwaganila nagwe. 2Bo ababwene alinkuyoba alinkuti, “Iki kyo ki kilundilo kya bwite bwa Ntwa! Ubuyo bula alinkubupa ingamu ya Mahanaimu.”#32.2 Mahanaimu: ko kuti ifilundilo fya bwite fibili.
3Umwene Yakobu alinkubatuma nkyeni abandu bake ukubuka kwa Esau unkulu gwake mfyamba fya Seyiri, nkisu kya Edomu. 4Alinkubabula alinkuti, “Mukambule Esau unkulu gwangu ukuti, ‘Une ne mbombi gwako Yakobu nikukubula ukuti, nitugalaga na Labani, ngonileko fiyo Ukwisa kufika na ku lilino kuno. 5Ngabile ing'ombe, nimbunda, ning'osi, na bambombo ba bingi abanyambala na bakikulu: ngutuma amasyu aga kumyako, ngusuma ukuti uyege nipyana kumyangu.’ ”
6Indumi sila silinkwakugomosania, silinkumbula Yakobu silinkuti, “Tuyile kufika ku nkulugo Esau, tumbulile isi gwatutumile ukwakumbula, lilino ali mu njila ikwisa kukwaganila nanugwe, ali na bandu aba mia bana (400).” 7Umwene Yakobu bo apilike sisisi alinkutetema fiyo nukunyololoka mu ndumbula, alinkubatapulania abandu aba bali nagwe, ning'osi, ning'ombe, kangi ningamila ukuya filundilo fibili. 8Alinkwinogona alinkuti, “Linga Esau ikwisa nu bwite pa kilundilo kya kwanda ikilundilo kya bubili kisakuponaga.”
9Popapo Yakobu alinkwiputa alinkuti, “Gwe Kyala gwa batata, Kyala gwa Abrahamu na Isaka, Gwe Ntwa gwangu, gwe gwalimbulile une ukuti, ‘Gomokela ku kisu kyako, na ku bandu ba kikolo kyako, po nisakukubombelaga inunu.’ 10Ipyana lyako kangi nubusubiligwa bwako ifi umbombile une fyo ngabagila nukwambilila nalinga ko kanandi fiyo. Papo lula mbukege ngali nako nakamo bo nguloboka ulusoko lwa Yordani, loli yi ngili yangu yene. Lilino apa ngugomoka nipelile ukuya filundilo fibili. 11Nikukusuma ukuti, Umboke ku nkulu gwangu Esau, namanga nikutila ukuti bo ikwisa isakututwalila ubwite, po ende nukutugoga twesa na bakikulu palikimo na bana. 12#Bwa 22.17Yougwe gwayobile gwatile, ‘Nisakukubombelaga inunu kangi nisakubolosyaga aba nduyungu lwako, bisakuyaga bo gu nsanga gwa mu nyanja ugu nabandu bakabagila ukugubala.’ ”
13Bunobuno Yakobu alinkugona palapala ikilo kila. Popapo ifi ali nafyo alinkupagulapo ifyakumpa unkulu gwake Esau: 14Imbene aba mia babili (200), inyambala amalongo mabili (20) ing'osi aba mia babili (200), ing'osi inyambala amalongo mabili (20), 15ingamila isi syongesyaga abana amalongo matatu (30) pamopene nabana, ing'ombe amalongo mana (40), ningambako kalongo (10). 16Alinkusibika mmaboko ga babombi bake untimo ugu na ugu pasima, popapo alinkubabula ababombi bake alinkuti, “Pakati pa ntimo ugu na ugu payengepo untambo.” 17Alinkundingania umbombi gwake untasi alinkuti, “Linga unkulu gwangu Esau ikwaganila nanugwe ikulalusya ikuti, ‘Ngimba uli mbombi gwani ugwe? Kubuka kugu? Imitimo igi gilongwile nkyeni mmyako gyani?’ 18Po ugwe ukambulege ukatigi, ‘Gya Yakobu umundu gwako, fyo fyabupe ifi akutumile ugwe gwe malafyale gwitu, yope ikutukonga ikwisa kunyuma.’ ” 19Amasyu bo gagaga alinkundingania nugwa bubili nu gwa butatu kangi na bosa aba bakongaga ni mitimo alinkuti, “Syo mukayobege sisisi kwa Esau, linga mukwaganila nagwe mukatigi, ‘Yope na yu mundu gwako Yakobu ikwisa lululu ali kunyuma uko.’ ” 20Namanga Yakobu inogonaga ukuti, “Pamo nisakubuhobolaga ubukalale bwake nifyabupe ifi filongwile nkyeni, lelo linga nikwaganila nagwe pamo isakuhobokela.” 21Ifyabupe fila filinkutala nkyeni mmyake; umwene alinkugona mmisasa ikilo kikyo.
Yakobu ikusindana nu mundu pa kiloboko
22Yakobu alinkusumuka pakilo, alinkubega abakasi bake bo babili, na bakikulu abatumwa babili bala, pamopene na banake kalongo na yumo (11) alinkubalobosya pa kiloboko kya lusoko lwa Yaboko. 23Bo abalobwisye pa lusoko pamopene na fyosa ifi ali nafyo, alinkusyala mwene itolo palapala. 24#Hos 12.3-4Popapo umundu alinkusindana nagwe ulusindano ikilo kyosa ukwisakufika mbukye. 25Lelo bo umundu yula agile ukuti atikuntola Yakobu, alinkunkoma munsana, muno ikyima kimelile, popapo ikilundi kilinkwenda nukufigiyuka mbumelelo bo bikusindana nagwe. 26Umwene umundu yula alinkumbula Yakobu alinkuti, “Ndekesya mbukege, keta bukile.” Umwene Yakobu alinkukana alinkuti, “Ndisakukulekesya ukuti ubukege, loli unsaye tasi.” 27Popapo umundu yula alinkundalusya Yakobu alinkuti, “Yougwe ani ingamu yako?” Alinkwamula alinkuti, “Yo une Yakobu ingamu.” 28#Bwa 35.10Popapo umundu yula alinkumbula Yakobu alinkuti, “Lilino utikubilikiligwaga kangi ingamu ya Yakobu, loli kuyaga gwe Israeli,#32.28 Israeli: ko kuti ukusindana na Kyala. papo ubigene na Kyala, kangi na bandu, loli gwendile nukuya ntoli.” 29#Balo 13.17-18Popapo Yakobu alinkundalusya umundu yula alinkuti, “Ngusuma ukuti umbule ingamu yako.” Umwene alinkwamula alinkuti, “Fiki apa kulalusya ingamu yangu?” Popapo umundu yula alinkwenda nukunsaya Yakobu. 30Umwene Yakobu alinkuyoba alinkuti, “Ngiketile ikyeni kya Kyala, loli ngali ndi mumi!” Popapo alinkubupa ubuyo bula ingamu ya Penueli.#32.30 Penueli: ko kuti ikyeni kya Kyala. 31Ilisuba lilinkunsokela palapala pa buyo bwa Penueli, alinkumyonyo itolo ukwenda, panongwa ya kufigiyuka ikilundi. 32Bunobuno ukufika na ku lilino kuno abanya Israeli batikulya unkole ugu guli mbumelelo bwa kyima, papo mo mu nkyima muno ugwandumi gwa Kyala alinkomile Yakobu.
Избрани в момента:
UBWANDILO 32: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.