Yoane 1
1
Ottu nya Nekyana Rahan Atulo
1Litteri hirre owon nya Nekyana bwo fe Nekyana awatta jyo Hollum, bwo fe Nekyana ara a Hollum. 2Litteri hirre owon nya inyi jyo Hollum. 3Oyyeu nya Hollum nerre daŋ tenyi, bwo obeŋ Hollum oyyeu omuk erre ’tuŋ hobeŋ inyi. 4Itwa honyi owon nya nesu, bwo nesu inyi nafaŋan wati, 5bwo fe nafaŋan ette faŋan lihiji idumele, ati obeŋ nedumele agalik inyi.
6Owon nya obo atulo efahata olo Hollum, afure honyi Yoane. 7Ottu nya inyi itamijaniere nafaŋan jo oŋida aati daŋ iruhi ta nettiyenio honyi. 8Obeŋ inyi ara afaŋan ania, ati ottu nya inyi itamijaniere nafaŋan.
9Ottu nya afaŋan ahode itafaŋyere aati daŋ hul isiuni lifau. 10Owon nya inyi lifau, bwo fe oyyeuni nafau ta adwaran honyi, ati obeŋi nya aati omijani inyi. 11Ottu nya inyi lihiji wati honyi bwo isi ette ilak ifwotuna inyi. 12Ati jyo hulya daŋ hul ifwotuni’to inyi, ojo hul iruhi jyo nafure honyi, isyo inyi narahan olonyirok Hollum. 13Obeŋi nya bu isi isiuni to nooto kuyya ta nawahan hwan, kuyya bu ta nawahan tulo, ati isiu Hollum isi ta adwaran honyi.
14Ottu nya fe nekyana rahan atulo, ette manya lihiji hohoi attati hohoi iŋiŋyala etahwo honyi, an ara’to etahwo on osiru jyo Lonyi abotye olo Hollum Monye. Ifut amehino iko nelahode jihonyi. 15Ara Yoane etamijanani honyi ette ikyana on okwat ojo, Inyi alya linya ajo ni jo, Ottu adi obo ihalu hoŋ ol obolo agalik ani, nyo owon nya inyi habeŋ ni. 16Ta namehino honyi en efut omehita inyi jihohoi daŋ gagaga. 17Nyo isyori nya efahita to Mose ati namehino iko nelahode ofwonni to Yesu Kristo. 18Hobeŋ tulo igonyu Hollum ’tuŋ. Lonyi honyi ol obotye al awatta’to jyo Monyonyi inyi al itahutak’to Hollum.
Etamijani ono Yoane Batista
Mt 3:1-12; Mk 1:7-8; Lk 3:15-17
19Ara etamijani ono Yoane ihwa ana. Ifahini laati Yudea omuk ehumak iko Levitahyen to Yerusalem ifiyere inyi ojori, ?Ŋai iye? 20Itarraŋ inyi bwo obeŋ odwa, ati ojo inyi, Ahode, obyaŋara ani Kristo. 21Ifiye isi inyi ojori, ?Ŋai ati iye? ?Iye Elija? Ojo inyi, Obeŋ. ?Iye eyani sayyo alya? Ette inyi itarraŋ ojo, Obeŋ. 22Attati isi jaran jihonyi jojo, ?Ŋai ati iye oŋida hohoi efwo itarraŋyere jyo hyodwo ifahuni’to hohoi? ?Ijo ati iye, iye ŋai? 23Ette inyi jaran jojo, “Ani ellilloŋoni otto mur ojo, Itabisana nekoi Hobu ’tor”, ihwa ninya ikyanari eyani sayyo Isaya.
24Hyodwo lefahat isi hutteluluŋ Farisei. 25Bwo ifiye isi inyi ojori, ?Kuyya obyaŋara iye Kristo, kuyya bu Elija iko eyani sayyo alya, ati iye ibatisyo nyo? 26Itarraŋ Yoane jihosi ojo, Ebatisyo ni ta aari, ati owon lobo ihiji hatai al itimoti tai. 27Inyi olo hottu adi ’tehalu hoŋ, ol owon nya habeŋ ni, ati abeŋ ni asiru houna amuha honyi. 28Ihanie nya hodwo hirre huna imiji Betania, lifohor Yordano tole imaji an isyatari Yoane batisimo.
Imijyete, Onyo Ker Hollum
29Nya motye igonyu Yoane Yesu ol ottu ajihonyi ette jaran, Imijyete, Lonyo ker Hollum olo al iya’to addi eyyata hutta fau. 30Inyi alya inya ajo ni jo, Ottu adi obo ihalu hoŋ al ara’to jihoŋ eleittok nyo owon nya inyi habeŋ ni. 31Ani ta ahwan hoŋ abeŋ nya ni amijak ŋai inyi, dwadi bu attu ni ibatisyere ta aari itahutaniere inyi jyo Israele. 32Ara ana etamijani inya iramak Yoane ojo, Egonyu nya ni Oloyiri ol Olibo orrijo ihwa awolo an isuru t’edou ette wotya ihou honyi. 33Abeŋ nya ni amijak inyi ati lya al ifahu’to ani isyoryere batisimo ta aari, iramak inyi ani ojo, Atulo ol ottu’to ibatisyo to Oloyiri ol Olibo inyi adi alya al isuru Oloyiri t’edou ette rasa jihonyi. 34Ihwania egonyu ni inyi ette ni iramana etamijani jo, inyi alya Lonyo Hollum.
Leyiyanak Etterita Hulo Yesu
35Nya motye hetoŋoi Yoane dia iko leyiyanak honyi arrihai, 36ikikorik inyi jyo Yesu ta aleten honyi ette jaran, Imijyete, Lonyo ker Hollum lya. 37Itaniŋuni leyiyanak arrihai nekyana honyi ette jifaru Yesu. 38Tania ofyala Yesu ette igonyuna isi ijifunie inyi ette ifiyo isi ojo, ?Anyo iwahata tai jihoŋ? Ojori isi jihonyi, Rabbi, on ojo, Hettiyanani, ?aja imanya iye? 39Ojo inyi jihosi, Ifwanna, ifwatta adi igonyuna. Tania ofwoi isi ette igonyuna amaji an itoŋori inyi ette itoŋo ikonyi many otuhori oloŋ nya, ara nya saa aŋwan. 40Abotye olo leyiyanak hulya arrihai ara inyi Andrea illa Simone Petro. 41Orumak inyi ahosyere illanyi Simone ette jaran jihonyi, Erumak dwo hohoi Kristo (on ojo onyimot olo Hollum). 42Ette Andrea iyaro inyi jyo Yesu. Ette Yesu mijo jihonyi ette jaran, Ira iye Simone lonyo Yoane, ifurani adi iye Kefa (on ojo Petro, amorwo).
Eloŋuna Filipo Iko Natanaele
43Nya motye igigilo Yesu ilari Galilea bwo orumak inyi Filipo ette jaran, Ijifunie ani. 44Ara nya Filipo olo Beteseda, amiji ba Andrea iko Petro. 45Ette Filipo rumana Natanaele bwo iramak inyi ojo, Erumak hohoi lya linya igyorok Mose ifahita bwo fe eyak sayyo igyoroni, inyi Yesu olo Nasaret lonyo Yosefo. 46Ifiyo Natanaele inyi, ?Oremik obo ariŋ on oyyu’to ’tuna to Nasaret? Ojo Filipo jihonyi, Waŋ, ilo adi igonyuna. 47Igonyu Yesu Natanaele ottu ajihonyi, bwo ojo, Imijye Aserelitanani ahode ol obeŋ ara ahenyabani. 48Ifiyo Natanaele inyi ojo, ?Aŋai imijak iye ani? Itarraŋ Yesu jihonyi, Egonyu dwo ni iye towoyo ŋaboli, hobeŋ iye Filipo iloŋu. 49Itarraŋ Natanaele ojo, Hettiyanani, iye Lonyi Hollum, bwo fe ahobu Israele. 50Itarraŋ Yesu jihonyi ojo, ?Iruk iye ta ajaran hoŋ jo, egonyu dwo ni iye towoyo ŋaboli? Igonyu adi iye erre hun obolori’to agalihini huna. 51Ojo Yesu jihonyi, Eramyo ni iye erre ahode, ahode. Igonyu adi iye edou aŋa bwo anjelohyen hulo Hollum odohi bwo isuruni ihou Lonyi tulo.
Избрани в момента:
Yoane 1: LOT1969
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
This text was originally published by the British and Foreign Bible Society in 1969.