Yohanes 11
11
At Lazarus waraga wene
1Ap mesik onuk Lazarus, orokhwi Maria ot Marta eʼbirek emin onowi o Betania mesikmu aʼge welegesa. 2Hwe Maria ai ebe re, pobuk aʼbosu eʼben op aʼge nonue ʼgain Onuk Logo aʼge Yesus oyuk pam weregeitik asu pam horegei aʼge ano yo. Asogo onowi pam oruakma agauwa mesik erlige re, at Lazarus ou ebam agama re, 3is hwami enebe ʼbiren ot ebap eʼbirek enerei ebam ou en e, Yesus moʼgulesi louwagoluk, aphwami enebam wene wusogo perakpogulat e, disogo egesa,
“Nue. Lazarus hede hwedik aʼge ano ou ebam agarik oruak o,” oluk wene wusogo peragonobogwiam e, 4at Yesus moʼgulesi legesema, esaʼgo hwelegeitik e, disogo moʼgulentesi,
“Ou ai en, at ebe modok warema puk. We, an en tagoam, aphwami en Allah ebe erliktugulat, omlogo an erliknobugulat, tuagoluk, ou asogo ebam agama oruak o,” oluk moʼgulentesi. 5At Yesus en, hwe Marta ebap eʼbirek emin, Lazarus emin, ede hwedik welaga aʼgeat de,
6“At Lazarus ebam ou oruak o,” oluk moʼgulegisema, esaʼgo hwelegei aʼgeat de, epenen en o welagama ebano mo egeitik, agauwa ʼbiren welaga. 7Asogo welagarik en, at osi iak wogu legesa aʼge ebano moʼgulentasulat e,
“Nis togolik o Yudea ʼbuok o,” oluk moʼgulentesi. 8Asogo moʼgulentesimu, is en e, disogo moʼgulegisa,
“Nue. Ap ʼgaindek Yahudi aʼge en yogodak yayat helep pam wathobuogoluk tugukhwe orlu egen ano aʼgeat de, hat pobuk togolik o ebayat ʼbiogoluk taga legen?” oluk egesema, 9at Yesus en e, disogo moʼgulentesi,
“O agauwa mesik erlige dakha osoam e, hubet jam 6 hwerli en ʼbekhit hopmu akhit jam 6 agoam laʼbulogo 12 jam eneʼgik wenarogwi ano erlak? Ap sa en o mo aphwami ʼgwiangma dakharak enebasu aʼge ai il hasulat, ebe dakharakma lasu holuk, oyuk aʼgul dungsogo ʼbalua modok erlak o. 10Aʼgeat de, ap sa en o hubaʼgo lasu holuk e, at ogola dakharak aʼge erlakma no oluk e, oyuk aʼgul ʼbalua o,” oluk moʼgulentesirik, 11pobuk mesik moʼgulentasulat e, disogo moʼgulentesi,
“Nis nenare Lazarus ano arat nogogei aʼgeat de, an en at nogosoma elalugap ti laik o,” oluk moʼgulentesi. 12Asogo moʼgulentesimu re, is at osi iak wogu legesa aʼge ebano en e, disogo moʼgulegisa,
“Nue. At ai we nogoso holuk e, ebe op ema o,” oluk moʼgulegisa ai, ebe re, 13at Yesus en Lazarus ebe waragama en egei aʼgeat de, is onogola en e,
“Demat nogoso oluk egei,” oluk onogola epegesa. 14Asogo onogola epegesa ai en e, at Yesus en wene ʼbaksogo disogo moʼgulentesi,
“Lazarus ebe arat waragama o. 15Asogo waraga aʼgeat de, his henede nebam heʼberik pagup oluk, an eba ʼbilo erlakma en mo egi ai, his henebagerat nogola nagai hasu legi o. Holuk e, yogodak nis Lazarus eʼbek ʼbuogoluk manis o,” oluk moʼgulentesi. 16Asogo moʼgulentesimu, at ap onuk Tomas ogulat, Holubaʼge ogulat, ogwi aʼge ai en e, arilak Yesus osi pema ebano disogo moʼgulentesi,
“Yesus eminat waromogoluk, ʼbuok en manis o.” oluk moʼgulentesi.
At Yesus en, “Enelaluk modok welemagoluk enelalugabenebiso re, anat o,” oluk moʼgulentesi wene
17Asogo moʼgulentesimu at Yesus lak ebano ʼbi legesa ʼgal e, Lazarus ʼgwiangma selak poluk agauwa henagan welegesarik agauwa mesik oruakma ʼbigisa. 18O Betani ai re, o Yerusalem horoksogo eragam oʼgwe ebela lagai hwerli re, 3 kilometer ʼgelaʼge ai en e, 19is aphwami Yahudi aʼge aʼbigat, hwe Maria emin, Marta emin, enerei Lazarus werakma onogola opsogo oluk, eneʼbek wegesarik welegesa. 20Asogo oruakma, aphwami en,
“At Yesus ebe wago yo,” oluk egesema Marta esaʼgo hwelegeitik e, Maria o ogola oruakhwe, Yesus hai laga. 21Lagarik Yesus moʼguleselat e, disogo egei,
“Nue. Hat yema wotluk wellenma re, an nerei waraga ai re, warelep erlak epegi o. 22Asogo warelep erlak aʼgeat de, nue. Yogodak hat en we, noʼgwe aʼge Allah ʼgonu moʼgulomma re, at en wokhema nakma re, an nalugat o,” oluk, moʼgulese lagama, 23at Yesus en e,
“Hat herei togolik elaluk emayat o,” oluk moʼgulesimu, 24at Marta en e, disogo moʼgulesi,
“O ologun pam aphwami waregesa aʼge enelalugabonobua ai erlige re, at Lazarus ai pobuk togolik elaluk ema o, oluk, an nalugat o,” oluk moʼgulese lagama, 25at Yesus en e, disogo moʼgulesi,
“Aphwami enelaluk modok welemagoluk, an enat enelalugabenebiso yo. At ap sa en ede an nebam heʼberik poluk en warema holuk e, at ebe warema aʼgeat de, pobuk elaluk otluk elaluk modok welema o. 26Ye, aphwami enelaluk welat enede an nebam heʼberik pogwi aʼge enebe loʼbok warom erlakma en enelaluk modok welema o. Wene ai demat oluk pobi tigen a?” oluk moʼgulesimu, 27at Marta en e, disogo moʼgulesi,
“Nue, hat hebe Allah omlogo Kristus, Allah en pulogo edikhebesirik perakpouma egesa aʼge ano, harat oluk, pobi hebegis o.” oluk moʼgulesi.
At Yesus nge tegei wene
28Asogo moʼgulotluk, Marta en ebap Maria worlhai lagarik e, disogo moʼgulesi,
“Nonue wene moʼgulnentasu aʼge ano ebe wagarik horok yema welat worlhiasu o,” oluk iak ling-long moʼgulesi. 29Asogo moʼgulesimu, Maria esaʼgo hwelegeitik perleneat siaksogo inagarik e, Yesus eʼbek waga. 30Wagarik e, at Yesus o selimu ʼgwilo erlakma en, we, hwe Marta en Yesus hai lagarik eʼbirek sarlok tigisema eriano oruakma waga. 31Maria ano perlenesogoat siaksogo liplau wagama re, is aphwami Yahudi aʼge Maria ogola opsogo oluk o pam welegesa aʼge ebano enil hegesarik e,
“Maria Lazarus uakma nge ti laga hegi,” oluk eʼberlik wegesa. 32Wagaihwe, hwe Maria ano en Yesus ebe il yetholuk e, eʼbek wagarik odogorlu pam eragam sakhun egeitik e, disogo moʼgulesi,
“Nue. Hat yema welentik wellenma re, an nerei waraga ai, warelep erlak epegi o,” oluk egeitik nge tagoma, 33is aphwami Yahudi aʼge Maria eʼberlik wegesa aʼge ebano eneminat nge tugumu, at Yesus en il entesirik e, is ebano ede en ede heselegeimu re, enebam hin wasulat e, disogo moʼgulentesi,
34“Lazarus ebe ʼga akhit saligepma oruak,” oluk moʼgulentesimu, is en e,
“Nue. Hil hagun en suk o,” oluk moʼgulegisema re, 35at nge tegei. 36Asogo nge tegeimu, is ap Yahudi aʼge ebano en e,
“Eige! Yethemit! Yesus Lazarus ede hwedik welagama yu, nogorlok o!” oluk erliktigisa. 37Asogo erliktigisa aʼgeat de, is aphwami ebano aʼge pema akhit en e, disogo egesa,
“At en ap mesik il hopnik aʼge obaptegei ai ʼgelaʼge, Lazarus elaluk welemagoluk obaptelipmu re, warelep epegep? Warelep erlagat o,” oluk egesa.
At Yesus en Lazarus elalugaptegei wene
38Asogo egesema, at Yesus ede heselegeimu re, werak ebe owik ebale heleʼgikmu helep dopnosogo pei legesema eba hai laga. 39Hai lagarik e, disogo moʼgulesi,
“Helep ai pelaʼgogo hwikhai lit o,” oluk moʼgulentesimu, ap waraga aʼge ao erei Marta en e, disogo moʼgulesi,
“Nue, at ebe selak pege hwerli en agauwa henaganak aʼge welegerik agaikhen welege ai o. Holuk, arat muk agarik e, eʼben tegei o,” oluk moʼgulesimu, 40at Yesus en e, disogo moʼgulesi,
“An en wene moʼgulheselat e,
Hede an nebam heʼberik pagun holuk e, Allah erliktogwi aʼge ano mesik tugumu hil hagunat ani o, oluk, arat moʼgulhegis erlak no? Moʼgulhegisat o,” oluk moʼgulesimu, 41is en helep ano pelaʼgogo hwikhai legesema re, Yesus il ʼbogorl pam likholuk e, disogo egei,
“Naik Allah o. An niak hesaʼgo hweligen ai en e, hau wathebise legi o. 42An en hat ʼgonu moʼgulhosoam, niak hesaʼgo hwelise legen ano, an nalugat aʼgeat de, is aphwami yema en, hat en an peraknobou wegen ai an nebe pobi nobuagoluk moʼgulhegis o, naik,” oluk egeitik, 43pobuk iak loksogoat Lazarus disogo moʼgulesi,
“Lazarus. Lipla suk o!” oluk moʼgulesimu, 44at Lazarus ebe waraga aʼge ano elaluk agarik, eʼgik oyuk hettagat, orogole sum en hettagat, liplau waga. Asogo liplau wagama, at Yesus en is aphwami eba welegesa aʼge ebano moʼgulentasulat e,
“Ebelaʼgwe louwagoluk, ebam sum hettak aʼge eba hebelik pemit o,” oluk moʼgulentesi.
At Yesus woruogoluk yoʼgo lebigenebegesa wene
(Matius 26:1-5; Markus 14:1-2; Lukas 22:1-2)
45Asogo tegeimu, is aphwami Yahudi aʼge enebe aʼbigat Maria lak eneʼbek wegesarik welegesa aʼge ebano, at Yesus en tegei aʼge ebano enil hegesarik e, is pema akhit nin enebe esan en e, Yesus ebam enede heʼberik pegesa. 46Asogo heʼberik pegesa aʼgeat de, is pema akhit ap Farisi aʼge eneʼbek legesarik e, disogo moʼgulentigisa,
“At Yesus en disogo tegei, asogo tegei,” oluk moʼgulentai legesa. 47Asogo moʼgulentai legesema re, is ap Allah eiye aʼge onuelak ʼgaindek emin, ap Farisi aʼge emin en e, is ap wene Allah paget edip ʼbeloʼgogu legesa aʼge worlontogwiam wegesema re, disogo moʼgulentigisa,
“At ap ai ebe pobi tuagoluk elalin aʼge aʼbigat tago ai re, nis en noʼgosogo tul epegep. 48Nis en, at asogo til noʼgukhwe wene yagoum erlakma en ukpul holuk e, aphwami aʼbik enede at ebam heʼberik poluk lagaimu re, ologun pam e, is ap Roma aʼge wemarik e, enebe wolloʼgen dagalnonobogulat e, Allah owi werik moluk tuma o,” oluk moʼgulentigisema, 49ap is aʼge mesik onuk Kayafas, is ap Allah eiye aʼge onue ʼgain tahun ai pam welaga aʼge ano en disogo moʼgulentesi,
“His wene modok heneperlak en ogu legep ai o. 50Nis ʼberlegat wolloʼgen dagalnonobu erlakma en, we, nis nenebaget ap mesigat nak waromma re, op o, oluk pobi togu legep erlak a?” oluk wene asogo egei ai re, 51at ogola en ʼgagalogo egei puk. We, at ebe Allah eiye aʼge onue ʼgain tahun ai pam oruakma, Allah en ogola ʼgagalegeimu re, disogo egei,
“Nis aphwami Yahudi aʼge paget Yesus ebe warema,” ai paget egei ai o. 52Aʼge re, is aphwami Yahudi aʼge enebaget nak egei puk. Aphwami ʼberlegat Allah eiyagai aʼge o di owi yu owi ʼbogulogo legesarik oruak aʼge emin laʼbolik enebaigoluk, Yesus warom aʼge paget egei. 53Asogo moʼgulentesimu, hwerli ai hwerli en e, is ap ʼgaindek Yahudi aʼge en Yesus ebe modok woruagoluk obok lebikpegesa.
54Asogo egesa ai en e, Yesus o Yudea eba ap Yahudi aʼge enilem ebe selak oʼgwe denaga laga erlak. We, hisak-hisak nak denaga lagarik e, o eba ukpoluk, o leimu aphwami erlakma horoksogo eragam o kota onuk Efraim lagarik, at osi iak wogu legesa aʼge ebano enemin ebayat welegesa.
55Welegesa eria hegit e, is aphwami Yahudi aʼge seni onuk Paskah noʼgwi aʼge ano no horok lau wagama re, nouwogoluk owan welat, is peik ʼbalogwi ʼgelaʼge hosogo oluk, Yahudi aʼge en togwi ʼgelaʼge tuogoluk, onowi loʼbok en o Yerusalem odoktugu legesa. 56-57Odoktigisarik oruakhwe, is ap Allah eiye aʼge onuelak ʼgaindek ebano emin, is ap Farisi aʼge emin en, wene disogo egesa,
“Is aphwami pema en Yesus ebe oruak aʼge enaluk welat holuk e, nis en at ebe tenakpouwogoluk moʼgulnentaumak o,” oluk obok woluk yoʼgo lebigenebegesema no oluk e, is aphwami ebano Allah owi werikmu welat, Yesus ebe hera tugulat is-is nak hin wogulat e,
“At e, seni sorugumu ya wema opogu legep a? Erlak a,” oluk ogu legesa.
Избрани в момента:
Yohanes 11: WUL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте