Peragenebesi 4
4
Petrus Yohanes emin ap wene edip ʼbeloʼgogumu ebano eneʼbek wogonoboluk legesa wene
1Is Petrus Yohanes emin en wene asogo aphwami ebano owan moʼgulontogwi oruakma erianoat, is ap Allah eiye aʼge emin, Allah owi werik ʼgwelakharok welegesa aʼge onue ʼgain aʼge emin, ap Saduki aʼge emin, eneʼbek wegesa. 2Wegesarik e, is Petrus Yohanes emin en wene aphwami moʼgulontogulat e,
“Yesus waragarik elaluk aga ai, aphwami waragai aʼge enelalugabonobuayat o,” oluk moʼgulontogu legesa ai en, is ap ebano onolot het aga. 3Onolot het agarik e, eneʼgik herle waronobugumu, o arat hik egeimu re, loruk oʼgwe enemdema wouwogoluk, o aphwami herle wusogo onobugumu eba ʼgwelabenebigisarik e, tenentarok nogogisa. 4Asogo aʼgeat de, is Petrus Yohanes emin asogo owan ʼgwelabonobu erlakma en oruakhwe, wene aphwami moʼgulentigisema, is wene enesaʼgo hweligisa aʼge ebano enebe esan en,
“Wene ai demat o,” oluk wegesema re, is naduk aʼge enemin, pobuk aʼge enemin, laʼbuksogo, ap nak e, enebe aʼbigat eneʼgik wenakho 5.000 ʼgelaʼge aga ai o.
5-6Asogo tigisarik, loruk oʼgwe is ap ʼgaindek ebano emin, is ap enarluedek ebano emin, Allah iak pelal wogo eiye aʼge ebano emin, odoksogo re, is Allah eiye aʼge onue ʼgain Hanas o, Kayafas o, Yohanes o, Aleksander o, Allah eiye onue ʼgain aʼge eiyagai logon enemin, o Yerusalem odoktigisa. 7Odoktigisarik e, Petrus Yohanes emin eriano eneʼbek wogonoboluk wegesarik enebe ʼburl edigenebegesarik e, enemdema wegesa. Enemdema wogulat e,
“His en ap oyuk soborak aʼge tigep ai re, no anni pam obaptigep. Ye, sa onuk ʼbalogo tigep,” oluk ogu legesema re, 8at Petrus Allah Arogun ogola ʼbetesogo welaga aʼge ano en wene disogo moʼgulentesi,
“Nuelak ʼgaindek emin, naiklak emin, wa. 9Yogodak his en e,
Ap oyuk soborak aʼge ai noʼgwe anni pam obaptigep no, oluk nenemdema wogu legep ai o. 10Aʼge re, wene ai paget, his ʼberlegat emin, aphwami enaʼgul onuk Israel aʼge ʼberlegat emin, henaluk emagoluk wene edip pobisogo moʼgulhentaik. At Yesus Kristus owi o Nazaret aʼge his en e pam edikpoluk werigepma Allah en elalugap pesi aʼge ano onuk pam ap yu op agarik henilem edik obat oruak yu i o. 11Nadugat Allah iak pam pelal disogo oluk wokho pegesa,
His o helep aʼge worogulat,
Helep yu wiak o, oluk ukpegep aʼgeat de,
waʼgi dalaga yu i o, (Mazmur 118:22)
oluk Yesus pagerat, pelal wokho pegesa ai. 12At Allah en, nis aphwami ʼgwiangma yema aʼge ap mu aʼge onuk pam delnonobuagoluk onuk moʼgulnonto erlak ai en e, ap we aʼge en delnonobu re, mia o. We, at Yesus en delnonobuagoluk, at ematek onuk moʼgulnentesi aiat o,” oluk moʼgulentesi.
13Is Petrus Yohanes eʼbirek onogorlok erlaksogo welat, wene ʼbaksogo asogo moʼgulontogwiam e, is ap ebano en erligonobugulat e,
“Ap yu seʼgola moʼgolu erlak. We, eneperlak olema aʼgeat de, Yesus emin denaga legesa aʼge ano en hegi,” oluk pobi tigisa. 14Pobi tigisarik, ap oyuk obaptigisa aʼge ano, is Petrus Yohanes enemin edik oruakma, enil entigisarik e, is ap ebano en wene noʼgosogo moʼgulonto ʼgelaʼgeat agama re, moʼgulonto erlakma en mo egesa. 15-16Mo egesarik e, Petrus Yohanes ap ano emin, o wene edip ʼbeloʼgogumu eba en lebigenebegesarik, is-is nak wene ogulat e,
“Ap enebe ʼbiren eria paget noʼgosogo tagonobul epegep. Is en elalin tu puk aʼge ai tigisema re, aphwami o Yerusalem welagai aʼge ʼberlegat enaluk egesa ai paget e, nis en e,
Asogo tu erlak, neneperlak o, oluk elabe tu re, mia aga ai o. 17Asogo aʼgeat de, wene ai saga uarik aphwami ʼberlegat enesaʼgo holuano oluk e,
Yesus onuk ʼbalogo wene pobuk modok moʼgulentagup o, oluk enesaʼgo wusogo wene yagontul o,” oluk egesa. 18Asogo egesarik en, eʼbiregat worlentigisema, togolik ʼgwigisema re, disogo moʼgulentigisa,
“His en e, Yesus onuk ʼbalogo aphwami enemin weneʼgak ogulat, wene moʼgulontogulat, modok togup o,” oluk enesaʼgo wusogo wene yagentigisa. 19-20Asogo moʼgulentigisema re, is Petrus Yohanes emin en e,
“Allah ilem hegitsogo tu re, ʼge epegep. His en,
Disogo tu, oluk egep aʼge ai hologo tu a? At e, Allah en,
Disogo tu, oluk oso aʼge on ai hologo tu a. Henede eberit da. Nis e, nenil hogulat, nenesaʼgo holugulat, tige aʼge ai, aphwami logon moʼgulonto erlakma en mo u re, mia ai en e, moʼgulontogu lomulat o,” oluk moʼgulentigisa. 21Asogo moʼgulentigisema, ap ano elalinat tigisa aʼge ai paget, aphwami ʼberlek Allah erliktogu legesa ai en, wene noʼgosogo enebam po ʼgelaʼgeat agama re, pobuk enesaʼgo nak wusogo lebigenebegesa. 22Ap oyuk soborak aʼge elalin tigisa ai re, ebe dagaga hwerli en umur 40 tahun welagama en, obaptigisa ai o.
At Allah eiyagai en seʼban egesa wene
23Is Petrus Yohanes emin ano, ap ʼgaindek ebano en eneʼgik herle hebilogo lebigenebegesema re, enarilak onorokhwi Allah eiyagai aʼge logon ebano oruakma eneʼbek legesa. Legesarik e, disogo moʼgulentigisa,
“Is ap Allah eiye aʼge onuelak ʼgaindek ebano emin, ap enarluedek ebano emin, is en wene disogo moʼgulnentigisa o,” oluk ʼbeliʼgogo moʼgulentigisa. 24Asogo moʼgulentigisema enesaʼgo hweligisarik e, enemin laʼbulogo enede mesigat welat, Allah yoʼgo pegesa. Yoʼgo pogulat e,
“Nenaik. Nis hat heragam welege aʼge yu. ʼBogorl walhasulat, ʼgwiang walhasulat, ik laut lok yeʼgelak aʼge ogo walhasulat, di aʼge yu aʼge ʼbogorl pam aʼge emin, ʼgwiangma aʼge emin, ik olomu welago aʼge logon emin ʼberlegat walhasulat, tigen ai hat en nak o. 25Nis neneʼba Daud ano hat en, at yoʼgo pegenma re, Harogun ogola welat, wene hat en egen aʼge at en disogo egei,
Di aphwami yu aphwami oʼborl oʼgwe aʼge onolot het agalat e,
eniak uarek-ʼbuareksogo wene ʼbaligisa ai nopaget.
Ye, is aphwami enaʼgul onuk da ʼge ya ʼge wene ʼburlat ʼbaligisa ai nopaget,
26Is ap ononuk logo ʼgwiangma aʼge yema inotluk,
ʼgaindek logon enemin laʼbulogo odoktak poluk,
nenaik ʼgain Onuk Logo aʼge Allah, is en e,
Ebe nenebit o.
Omlogo Kristus yoʼgo poluk perakpou waga aʼge ai ogo, nenebirat o.
Nenemin weim obuok, oluk ai pagerat heberlogo oruak, (Mazmur 2:1-2)
oluk egenma ebe Daud en egei ai o. 27Asogo egen ʼgelaʼgeat, at Herodes emin, Pontius Pilatus emin, aphwami oʼborl oʼgwe aʼge emin, aphwami Israel aʼge emin, hat huʼgwarek heragam aʼge Yesus nis aphwami delnonobuagoluk edikpegen aʼge ano, woruogoluk demat o yema odoktu egesa ai paget egen ai o. 28Aʼge re, wene ai, hat heʼgik anni oruak aʼge hogola en e,
Asogo tuak, oluk epegen hegitsogoat, asogo tigisa ai o. 29Aʼge re, nenaik. Nis watnonobuogoluk ogwi ai hil yerentemen o. Nis hosi yema wene hat en egen aʼge ai, nonogorlok erlaksogo moʼgulontogu lemagoluk hanni woknentemen o. 30Hat hanni woknentasuam e, huʼgwarek heragam aʼge Yesus onuk pam hat heʼgik pamat aphwami ou obabenebiselat, wene pobi tuagoluk elalin tu puk aʼge tagenebasulat, togun ai, ebe nis en tagonobogu lemagoluk hanni woknentemen o,” oluk Allah yoʼgo pegesa.
31Asogo Allah yoʼgo pogu legesema re, o is odoksogo welegesema ano oborlogouk egei. Oborlogouk eselat e, Allah Arogun enebe ʼberlegat onogola ʼbetesogo ʼgwegeimu, wene Allah en egei aʼge aphwami onogorlok erlaksogoat moʼgulontogu legesa.
Allah eiyagai en enaʼge aʼge enebe ʼberlegat soʼbusogo horlogu legesa wene
32Is wene demat oluk wegesa aʼge ai, enebe esan ebano re, enede mesigat nagat welegesa. Welat e, enaʼge di aʼge yu aʼge ʼberlegat,
“Yu an naʼge o,” oluk u erlakma en e,
“Nenebe ʼberlegat nenaʼge aʼge o,” oluk, ogu legesa. 33Asogo ogulat e, is ap Yesus en enebe yoʼgo onoboluk peragenebesi aʼge ebano en,
“Nonue ʼgain Onuk Logo aʼge Yesus elaluk agama nenil arat hege o,” oluk eniak modok annisogoat moʼgulontogu legesa. Moʼgulontogukhwe re, Allah ebabut op ano en loksogoat lerentasu laga. 34-35Asogo lerentasukhwe re, is onoʼgwiang eiye welegesa aʼge emin, onowi werik eiye welegesa aʼge emin, aphwami mu aʼge enebam oʼgo uang wogu legesa. Wogulat e, uang ai is en woluk ap Yesus en enebe yoʼgo onoboluk peragenebesi aʼge ebano eneʼgikmu pou waga legesa. Pou wagaiam e, is pema enaʼge erlak aʼge enebe loʼbok elitsogoat soʼbusogo horlogu legesa. Asogo togu legesa ai en, is ado enerlagaik agai erlagat welegesa.
36Asogo tugulat e, ap mesik onuk Yusuf. Aʼgul onuk Lewi aʼge. Owi o onuk Siprus aʼge, is ap Yesus en enebe yoʼgo onoboluk peragenebesi aʼge ebano en, nis neniak pam onuk Enedesebeliso oluk u ʼgelaʼge, is eniak pam onuk Barnabas tualigisa. 37Ap ai oʼgwiang oruakma re, is mu aʼge enebam oʼgo uang wesirik e, uang ai woluk, is ap Yesus en enebe yoʼgo onoboluk peragenebesi aʼge ebano eneʼgikmu pou waga.
Избрани в момента:
Peragenebesi 4: WUL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте