Chenesis 4
4
1Mihma Alam ʋt tekchi Ef a̱ ithana tok; mihma yʋmmak ash osh chakali tuk osh Ken a̱ eshi mʋt, Chihowah ʋt ahni‐ho̱ hatak o̱ eshi lishke, achi tok.
2Atuk osh anonti nakfish Abel a̱ eshi tok. Atuk o̱ Abel ak osh chukfʋlhpoa apesʋchi yokma, Ken ak osh osapa toksʋli atok.
3Atuk osh nitak ʋt ont ai ʋlhpiesa yʋt ʋla ma, yakohmi tok, Ken ʋt yakni nana awaya ya̱ nan im issa yo̱ Chihowah ya̱ isht im ona tok.
4Mihma Abel yʋmmak kia nan im ʋlhpoa chipinta chelahpi puta, micha i̱ nia aiena ka̱ isht ona tok. Mihma Chihowah ʋt Abel micha nan im issa aiena ka̱ im aiokpanchi tok:
5Amba Ken, micha nan im issa aiena ka̱ ik im ahnincho tok. Mihma Ken ʋt nukhobela fehna cha, nashuka ʋt ilapissa tok.
6Mihma Chihowah ʋt Ken a̱ Nanta katiohmi ho̱ chi nukhobela cho? micha nanta katiohmi ho̱ chi nashuka ʋt ilapissa cho?
7Ai ʋlhpiesa ho̱ ish yʋmohmikma chim aiokpʋchi kak a hetuk keyu cho? micha aiʋlhpiesa ho̱ ish yʋmhichi keyu hokma nanashʋchi ʋt okhissa yakinli ho̱ itoyula hoke. Mikma Abel nana ahni kʋt chishno ak o̱ chi pi̱hi̱sakma, ish i̱ shahla hi oke, im achi tok.
8Atuk o̱ Ken ʋt itibapishi Abel a̱ im anumpuli tok; atuk o̱ yakohmi tok, yakni haiaka a̱shwa ma, Ken ʋt itibapishi Abel a̱ i̱ sanalit wakaya cha, ʋbi tok.
9Mihma Chihowah ʋt Ken a̱, Chitibapishi Abel mʋto? im achi tok. Mihma, Ak ithano; ʋno ak osh itibapishi li ha̱ apistikeli sia hoh cho? achi tok.
10Mihma, Nanta mak o̱ ish katiohmi tuk oh cho? chitibapishi im issish ʋt anumpulit aka ya̱, auet ai a̱ pa̱ha̱yʋshke.
11Yohmi ka̱ himak a̱ yakni ya̱ yʋmmak okʋt itakha ya̱ wakʋmmi cha, chitibapishi im issish a̱ chibbak a̱ ai ishi tuk ash a kalakshi hosh ish a̱yashke.
12Yakni ya̱ ish a toksʋli hokma, himak pilla ka̱ im i̱ hlampko hosh chi̱ waya he keyu hoke: i̱ yakni kohcha yosh yakni paknaka ya̱ fullokahanchit a̱ya hatak chia ha chi̱ hoke, im achi tok.
13Mihma Ken ʋt Chihowah ya̱, Nan ashʋchi lish nan isht ʋm a palʋmmi ʋt chito kʋt ʋm atampa fehnʋshke.
14Yakeh! himak nitak a̱ yakni paknaka a kohchit is sa chʋffichishke: yohmi na chi nashuka yatukma ai in luma la chi̱shke; micha hatak kʋnia, micha yakni paknaka ya̱ fullokahanchit a̱ya hatak sia ha chi̱ hoke; atukma yakohma chi̱ hoke, kʋna hosh si ahayuchikmʋt, sʋba chi̱ hoke, im achi tok.
15Mihma Chihowah ʋt, Yʋmohmi hoka kʋna hosh Ken a̱ ʋbikma napalʋmmi ʋt mihinlohmi untuklo hosh onʋtola chi̱ hoke, im achi tok. Mihmʋt kʋna hosh ahayuchikmʋt, ik bo ka hi yo̱, Chihowah ʋt Ken a̱ inchu̱wa ka̱ lapalichi tok.
16Mihma Ken ʋt Chihowah itikba yash a kohchʋt ia cha, Eten i̱ hʋshi akochaka Not yakni ak o̱ ont ʋtta tok.
17Micha Ken ʋt tekchi ya̱ ithana tok: atuk o̱ chakali tuk osh Enok a̱ eshi tok; mihma tʋmaha holihta ya̱ ikbi mʋt, tʋmaha holihta yash ushi hohchifo ha̱ a hochifochit Enok hochifo tok.
18Atuk o̱ Enok a̱ Ilat ʋt im ʋtta tok: atuk o̱ Ilat ʋt Mehuchael a̱ tobachi tok: atuk o̱ Mehuchael ʋt Mehlusael a̱ tobachi tok: atuk o̱ Mehlusael ʋt Lamek a̱ tobachi tok.
19Atuk o̱ Lamek ʋt ohoyo tuklo ho̱ ishit itauwaya tok: achʋfa yʋt hohchifo kʋt Atah yokma, achʋfa yʋt hohchifo kʋt Sillah atok.
20Mihma Atah ʋt Chabal a̱ eshi tok: yʋmmak okʋt ʋlhtipo anu̱ka asht a̱ya, micha nan ʋlhpoa im a̱sha chohmi kak o̱ i̱ki atok.
21Mihma itibapishi hohchifo kʋt Chubal atok: yʋmmak okʋt hap, micha ʋhlepa chito olachi chohmi kak o̱ i̱ki atok.
22Atuk o̱ Sillah ʋt yʋmmak kia Tubal‐ken asonak lakna, micha tʋli pilesa puta ithʋnanchi ya̱ eshi tok: mihma Tubal‐ken in tek ʋt Naamah atok.
23Atuk o̱ Lamek ʋt tekchi tuklo Atah, micha Sillah yash, Ʋm anumpa ha̱ ho hakló; anumpuli li ka oh a̱ haponakló Lamek tekchi hʋchia ma: Ʋno ishit sa hotopa chi̱ mak osh hatak a̱, micha ishit sa hotopa chi̱ mak osh hatak himita ya̱ ʋbi li tuk oka.
24Ken a̱ ʋlhtoba kʋt mihinlohmi untukla hetuk okma, Lamek a̱ mihinlohmi pokoli untuklo akucha untukla he ʋlhpesʋshke, im achi tok.
25Atuk o̱ anonti Alam ʋt tekchi ya̱ ithana tok: mihma ʋlla nakni yo̱ eshi cha, hohchifo ha̱ Selh hochifo tok: Ken ʋt ʋbi tuk Ebel ash o̱ ʋlhtomba ho̱ Chitokaka yʋt ʋlla inla ho̱ auet ʋma hoka, achi tok.
26Atuk o̱ Selh yʋmmak kia ushi ʋt im ʋtta tok: mihma hohchifo ha̱ Enos hochifo tok: yohmi ma hatak puta kʋt Chihowah hohchifo ha̱ i̱ pa̱yʋt wakaya tok.
Избрани в момента:
Chenesis 4: CHH
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the American Bible Society 1848-1886, reprinted 1913