Chenesis 11
11
1Mihma yakni moma kʋt itih, micha anumpa aiena kʋt achʋfa tok.
2Atuk o̱ yakohmi tok, hʋshi akochaka imma ya̱ ashʋt itʋnowʋt mihinti mʋt, yakni patali ʋt Shina yakni ya̱ tala̱ya na, ant ahayuchi tok: mihmʋt yʋmmak o̱ okla aiasha tok.
3Mihmʋt, Inta! lukfi nuna kiloh ikbí, micha achukmalit eho hukmashke, itim achi tok. Mihmʋt tʋli a hetuk a̱ lukfi nuna yokma, anonti isht ʋlhpolosa ya̱ na shinʋshbi yosh okla im aiasha tok.
4Mihmʋt, Inta! hʋpimmi hachi̱ ka̱ tʋmaha holihta micha chuka chaha ai atoni paknaka yʋt shutik a̱ ona ho̱ iloh ikbashke; micha pi hohchifo iloh ikbashke; keyukmʋt ita fimimpʋt yakni paknaka moma ka̱ il itʋnowa yoba ná, okla achi tok.
5Mihma Chihowah ʋt hatak im ʋlla ʋhleha hʋt tʋmaha holihta, micha chuka chaha ai atoni ikbi ka̱ pisa chi̱ hosh akowʋt ʋla tok.
6Micha Chihowah ʋt, Yakeh! okla hʋt achʋfa, micha moma kʋt im anumpa hʋt achʋfʋshke: atuk osh ilʋppa yʋmihchit isht iʋshke: yohmi ka̱ himak a̱ yʋmihcha chi̱ im anukfila tuk a̱ nana hosh im ai ataklʋmma hi ʋt ikshoshke.
7Inta! pit kil akowa cha, im anumpa ha kil im it aiokomi na, ilap bi̱ka yʋt im anumpa ha̱ ik itim akostinincho, kashke, achi tok.
8Yʋmohmi ho̱ Chihowah ʋt yʋmma a kanʋllichit yakni paknaka moma ka̱ ita fimibli tok: mihma tʋmaha holihta ikbi tuk ʋt issa tok.
9Yʋmohmi hatuk o̱ yʋmmʋt Babel hohchifo tok: yʋmmak o̱ Chihowah ʋt yakni moma im anumpa ha̱ ai itim aiokomi tok oka: micha yʋmma Chihowah ʋt akanʋllichit yakni paknaka moma ka̱ ita fimibli tok.
10Ilʋppa puta kak osh Shem isht ai unchololi hoke: Shem ʋt afʋmmi tahlepa achʋfa hosh oka falama ʋt a̱ya ha ya̱ afʋmmi tuklo ma, Afaksat a̱ tobachi tok.
11Atuk osh Shem ʋt Afaksat a̱ tobachi ha yʋt afʋmmi tahlepa tahlapi ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
12Atuk o̱ Afaksat ʋt okcha̱yʋt ahanta tok afʋmmi pokoli tuchina akucha tahlapi hosh Salah ya̱ tobachi tok.
13Atuk osh Afaksat ʋt Salah ya̱ tobachi ha yʋt afʋmmi tahlepa ushta cha tuchina ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
14Atuk o̱ Salah ʋt okcha̱yʋt ahanta tok afʋmmi pokoli tuchina hosh Ebe ya̱ tobachi tok.
15Atuk osh Salah ʋt Ebe ya̱ tobachi ha yʋt afʋmmi tahlepa ushta cha tuchina ho̱ okcha̱yʋt ahanta cha ushi ʋhleha, micha ushetik ʋhleha ha̱ tobachi tok.
16Atuk o̱ Ebe yʋt okcha̱yʋt ahanta tok afʋmmi pokoli tuchina akucha ushta hosh Pelek a̱ tobachi tok.
17Atuk osh Ebe yʋt Pelek a̱ tobachi ha yʋt afʋmmi tahlepa ushta cha, pokoli tuchina ho̱ okcha̱yʋt ahanta cha ushi ʋhleha, micha ushetik ʋhleha ha̱ tobachi tok.
18Atuk o̱ Pelek ʋt okcha̱yʋt ahanta tok afʋmmi pokoli tuchina hosh Leu ya̱ tobachi tok.
19Atuk osh Pelek ʋt Leu ya̱ tobachi ha yʋt afʋmmi tahlepa tuklo cha chakkali ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
20Atuk o̱ Leu ʋt okcha̱yʋt ahanta tok afʋmmi pokoli tuchina akucha tuklo hosh Seluk a̱ tobachi tok.
21Atuk osh Leu ʋt Seluk a̱ tobachi ha yʋt afʋmmi tahlepa tuklo cha, untuklo ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
22Atuk o̱ Seluk ʋt okcha̱yʋt ahanta tok afʋmmi pokoli tuchina hosh Naho ya̱ tobachi tok.
23Atuk osh Seluk ʋt Naho ya̱ tobachi ha yʋt afʋmmi tahlepa tuklo ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
24Atuk o̱ Naho ʋt okcha̱yʋt ahanta tok afʋmmi pokoli tuklo akucha chakkali hosh Telah ya̱ tobachi tok.
25Atuk osh Naho ʋt Telah ya̱ tobachi ha yʋt afʋmmi tahlepa achʋfa cha ahbichakkali ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
26Atuk o̱ Telah ʋt okcha̱yʋt ahanta tok afʋmmi pokoli untuklo ho̱ Eblam, Naho, micha Halan aiena ka̱ tobachi tok.
27Yohmi ka̱ ilʋppa puta kak osh Telah isht aiunchololi hoke: Telah ʋt Eblam, Naho, micha Halan aiena ka̱ tobachi tok: atuk o̱ Halan ʋt Lot a̱ tobachi tok.
28Mihmʋt Halan ʋt i̱ki Telah ya ti̱kba, yakni aiʋtta tok Kaltea talaia Uh ai illi tok.
29Atuk o̱ Eblam, micha Naho ita tuklo kʋt ohoyo itauwayʋt okla tok: Eblam tekchi hohchifo kʋt Salai atok; mikma Naho tekchi hohchifo kʋt Milkah atok, Milkah ya̱ i̱ki, micha Iskah ya̱ i̱ki Halan a̱ ushetik atok.
30Yohmi kia Salai ʋt ushi iksho yatuk osh ʋlla ik im iksho tok.
31Mihma Telah ʋt ushi Eblam, micha Halan ushi Lot, ilap ushi akinli ushi, micha ushi Eblam tekchi ipok Salai aiena ka̱ pehlichi cha Kenan yakni ya̱ ona chi̱ hosh Kaltea yakni talaia Uh ha̱ kohchʋt ia tok: atuk osh Halan a̱ ona cha, yʋmmak o̱ aiasha tok.
32Mihma Telah i̱ nitak puta kʋt afʋmmi tahlepa tuklo cha tahlapi tok; atuk osh Telah ʋt Halan ak o̱ ai illi tok.
Избрани в момента:
Chenesis 11: CHH
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Published by the American Bible Society 1848-1886, reprinted 1913