Jenesis 6
6
Ema nia hahalok aat
1Iha tempu nee, ema amenta barak ona. I sira moris namkari lemo rai iha mundu nee. Sira mos hetan oan feto sira. 2Nai Maromak nia oan mane sira#6:2:‘Nai Maromak nia oan mane sira nee, la klaru. Matenek nain Biblia nian balu hanoin katak sira nee liurai nia oan. Balu hanoin katak sira nee Sete nia oan. Iha balu tan dehan anju sira. Maibee la iha ema ida hatene loloos. haree ema nia oan feto sira nee oin mesak bonita-bonita deit. Nunee sira baa kaben ho feto raan sira nebee sira hakarak. 3NAI Maromak hatete, “Hau nia Espiritu nebee foo moris ba sira nee lakohi hela taan iha sira ona, tanba sira nee ema deit, sira tenki mate.#6:3:Lian Ebreu iha nee laduun klaru. Nunee, komesa agora, sira so bele moris too deit tinan 120.”
4Iha tempu nee, iha ona ema rasa boot iha mundu.#6:4:Lian Ebreu dehan ‘ema Nefil’. Maibee ‘Nefil’ nia signifikadu laduun klaru. Bainhira Maromak nia oan mane sira kaben ho ema nia oan feto sira, sira hetan oan, nebee sai asuwain iha istoria uluk nian.
5Iha tempu nee, NAI Maromak haree ema iha mundu nia hahalok aat demais ona. Sira nia laran hanoin deit mak buat aat. 6NAI Maromak mos arepende halo ona ema hodi hela iha mundu. Nee halo Nia laran susar teb-tebes. 7Nee mak Maromak hatete, “Hau sei halo rahun tiha ema nebee Hau halo ona iha mundu. Manu fuik ho animal sira mos, Hau sei halo rahun tiha hotu. Tanba Hau arepende halo tiha ona sira.” 8So Noé deit mak hetan grasa hosi NAI Maromak.
Noé nia istoria
9-10Noé nia istoria nunee. Nia iha oan mane nain tolu. Sira nia naran mak : Sem, Jafé ho Kam. Noé nee moris loos, i la halo buat aat. Iha tempu nee, nia mesak deit mak ema diak. Nia moris hamtauk ba NAI Maromak.
11-12Maibee Nai Maromak haree ema sira seluk mesak ema aat hotu. Iha fatin-fatin sira halo mak violensia. Nai Maromak haree ema iha mundu, so halo buat aat deit. 13I Nai Maromak foo hatene ba Noé dehan, “Iha fatin-fatin Hau so haree ema nia hahalok aat deit. Nunee, Hau desidi ona katak Hau atu halo rahun tiha hotu mundu nee ho buat hotu-hotu iha nia laran. 14Noé! Agora o halo roo boot ida ho ai diak. Nia laran, fahe ba kuartu-kuartu. I roo nia laran ho liur, taka ho alkatraun. 15Halo nia naruk metru 130, nia luan metru 22, ho nia aas metru 13. 16Roo nee halo mos ho nia kakuluk, i halo janela haleu iha kakuluk nia okos. Janela nee nia aas metru sorin balu. Fahe roo nee ba andar tolu. I halo odamatan ida iha roo nia sorin.
17Hanoin didiak! Tanba Hau sei halo rai nabeen para halo mate buat hotu-hotu nebee moris iha mundu, too restu ida mos la iha. 18Maibee Hau sei halo aliansa ho o. Nunee o sei tama iha roo nee nia laran, hamutuk ho o nia kaben, ho o nia oan sira, ho o nia feto foun sira.
19-20Hosi animal sira hotu, o tenki lori par ida-idak, aman ida ho inan ida, hodi baa hatama ba iha roo nee nia laran, para sira bele moris hamutuk ho o. Hanesan animal hakiak ho animal fuik, ho mos manu fuik, para sira hotu bele moris. 21O tenki lori tama ba roo nee, hahaan oi-oin ba imi, ho mos ba animal sira.”
22I Noé halo tuir buat hotu nebee mak Nai Maromak haruka.
Избрани в момента:
Jenesis 6: BTDT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2024 Wycliffe Timor-Leste.