متّی 4
4
شیطان دا اَزماوَݨ اَتے یِسُوع دی فتح
(رَلدا مِلدا حوالہ: مرقس 1:12-13؛ لُوقا 4:1-13)
1اِیندے بعد خُدا دا پاکرُوح یِسُوع کُوں بَربیابان اِچ گھِن ڳیا جو او اِبلیس کنُوں اَزمایا وَنڄے۔ 2اَتے چالِیہہ ݙینہہ تے چالِیہہ راتیں دا روزہ رکھݨ دے بعد یِسُوع کُوں بُکھ لڳی۔ 3اَتے شیطان، یِسُوع کولھ آ کرائیں اَزماوَݨ کیتے آکھیا، ”جے تُوں خُدا دا پُتر ہَئیِں تاں آکھ ݙے جو ایہ پَتھر روٹیاں بݨ وَنڄن۔“ 4پَر اُوں جواب ݙِتا، ”خُدا دے کلام اِچ لکھیا لاتھے،
’زندہ رَہݨ کیتے اِنسان دی لوڑ صرف روٹی ای نَئیِں پَر خُدا دے مُونہہ دا کلام ای ہے۔‘“
5اِیندے بعد اِبلیس اُونکُوں مُقدّس شہر یروشلم اِچ گھِن ڳیا اَتے ہَیکل دی سب کنُوں اُچی جاہ تے کھڑا کیتا۔ 6اَتے آکھیا ”جے تُوں خُدا دا پُتر ہَئیِں تاں اِتھوں تَلے ٹپا مار ݙے کیوں جو لِکھیا لاتھے،
’او تیݙے کیتے اپݨے فرِشتئیِں کُوں حُکم ݙیسی اَتے او تَیکُوں اپݨے ہَتھیں تے چا گھِنسِن تاں جو تیݙے پیریں کُوں پَتھریں کنُوں دَھک نہ لڳے۔‘“
7پَر یِسُوع جواب ݙِتا، ”کلام اِچ ایہ وی لِکھیا لاتھے،
’تُوں خُداوند اپݨے خُدا کُوں نہ اَزماویں۔‘“
8وَلا اِبلیس اُونکُوں ہِک ٻَہُوں اُچے پہاڑ اُتے گھِن ڳیا اَتے سارے جہان دیاں بادشاہیاں اَتے اُنہیں دی سَڄ دَھڄ اُونکُوں ݙِکھائی۔ 9اَتے شیطان آکھیا ”ایہ سب کُجھ مَیں تَیکُوں ݙے ݙیساں جے تُوں جُھک کرائیں مَیکُوں سِجدہ کریں۔“
10پَر یِسُوع اُونکُوں جواب ݙِتا، ”اَے شیطان! میݙے کنُوں بھڄ وَنڄ کیوں جو لِکھیا لاتھے،
’خُداوند اپݨے خُدا کُوں سِجدہ کر اَتے صرف اُوندی عبادت کر۔‘“
11اِیندے بعد اِبلیس لڳا ڳیا اَتے ݙیکھو فرِشتے آ کرائیں یِسُوع دی خدمت کرَݨ لڳے۔
یِسُوع صوبہ گلِیل اِچ پرچار شروع کریندِن
(رَلدا مِلدا حوالہ: مرقس 1:14-15؛ لُوقا 4:1-15)
12جݙّاں یِسُوع سُݨیا جو یُوحنّا کُوں جیل اِچ ڈَھک ݙِتا ڳئے تاں او صوبہ گلِیل دو لڳا ڳیا۔ 13اَتے شہر ناصرت کُوں چھوڑ کرائیں او جھیل دے کنارے ہِک شہر کفرنحوم اِچ رَہوݨ لڳا جیرھا زبُولُون اَتے نفتالی قبیلئیں دا علاقہ ہَئی۔ 14تاں جو یسعیاہ نبی دی آکھی او ڳالھ پوری تِھیوے،
15”زبُولُون دا علاقہ اَتے نفتالی دا علاقہ جھیل دے نال دا رَستہ اَتے یَردن دریا دے پار غیر قومیں دا صوبہ گلِیل،
16اَتے جیرھے لوک اندھارے اِچ ہَن اُنہیں وَݙّا سوجھلا ݙِٹھا،
اَتے او لوک جیرھے موت دے سائے اِچ ہَن اُنہیں تے سوجھلا تھِیا۔“
17اِیندے بعد کنُوں یِسُوع ایہ اَہدئیں ہوئیں پرچار کرَݨ لڳا، ”اپݨے گناہیں کنُوں توباں کرو کیوں جو اَسمان دی بادشاہی نیڑے آ ڳئی ہے۔“
یِسُوع دے پہلے خاص چار شاگِرد
(رَلدا مِلدا حوالہ: مرقس 1:16-20؛ لُوقا 5:1-11)
18اَتے جݙّاں یِسُوع صوبہ گلِیل دی جھیل دے کنارے ٹُردا ویندا ہا تاں اُوں ݙُو بِھراویں کُوں ݙٹھا، ہِک شمعُون جَینکُوں پطرس اَہدِن اَتے ݙُوجھا اُوندا بِھرا اندریاس، او ݙُوہائیں جھیل اِچ ڄال سٹیندے پئے ہَن کیوں جو او مچھیرے ہَن۔ 19اَتے اُوں اُنہیں کُوں آکھیا، ”میݙے پِچھُوں ٹُر پوؤ اَتے جیویں تُساں مچھیاں کٹھیاں کریندو اِیویں مَیں تُہاکُوں لوکیں کُوں کٹھا کرَݨ آلا بݨیساں تاں جو او میݙے شاگِرد بݨݨ۔“ 20ایہ سُݨدے ای او ڄال کُوں چھوڑ کرائیں اُوندے پِچھُوں ٹُر پئے۔ 21اَتے کُجھ اَڳوں وَنڄ کرائیں یِسُوع ٻئے ݙُو بِھراویں یعقُوب اَتے یُوحنّا کُوں ݙِٹھا جیرھے زبدی دے پُتر ہَن اَتے او ٻیڑی اِچ پیِوُ دے رَلے اپݨے ڄالیں دی مُرمت کریندے پئے ہَن اَتے یِسُوع اُنہیں کُوں سَݙیا۔ 22اَتے او اُوں ویلے ای ٻیڑی اَتے اپݨے پیِوُ کُوں کلھا چھوڑ کرائیں اُوندے پِچھُوں ٹُر پئے۔
اَسمان دی بادشاہی اَتے شِفا بارے تعلیم
(رَلدا مِلدا حوالہ: لُوقا 6:17-19)
23اَتے یِسُوع صوبہ گلِیل دے سارے علاقیئیں اِچ پِھردا اَتے بنی اِسرائیل دی عبادت گاہیں اِچ خُدا دی بادشاہی دی خُوشخبری دا پرچار کریندا اَتے لوکیں کُوں ہر قِسم دی بیمارئیں اَتے کمزورئیں کنُوں شِفا ݙیندا ریہا۔ 24اَتے یِسُوع دی سارے صوبہ سُوریہ اِچ مشہوری تھی ڳئی اَتے لوک اپݨے سارے بیماریں کُوں اُوندے کولھ گھِن آوَݨ لڳے جیرھے طرحاں طرحاں دی بیمارئیں دے شکار ہَن جیویں جو کمزوری، ݙُکھ، بَدرُوح گرفتہ، مِرگی اَتے فالج دا شکار ہَن اُنہیں کُوں یِسُوع شِفا ݙِتی۔ 25اَتے صوبہ گلِیل، دکُپُلس دے علاقیئیں، شہر یروشلم، صوبہ یہُودیہ اَتے یَردن دریا دے پار کنُوں ٻَہُوں وَݙّی بھِیڑ اُوندے پِچھُوں ٹُر پئی۔
Избрани в момента:
متّی 4: سرائیکی
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY