Mateo 8
8
Jesús ijwiejiet pa i'nio' jiwatis jitio' po'
(Mc 1.40-45; Lc 5.12-16)
1'Loj papo i'nio' yamk'i ja Jesús, ti 'nesat'ipi ti taj'l ape'e japa tikijnaki. 2'Nesat'ipi pak siupa i'nio' jiwatis jitio' po', yiyi ti t'akosayi kiajwe, ti iyo'ate:
—'Yaka'niona, ka woyi, ts'ajane ti 'najane pi jiwone ka netiajnat 'ni iwit'ia.
3Jesús sekyi'i isiesat'i'yijpe, ti iyo'ate:
—Awoyi. Janitiajnat ak'ioye.
'Yina ti yiyik'i ti kia'iyo, 'yaka jla'm iwo netiajnat t'ipi siupuwa ijiok'i'ni. Ijiate 'es'ne pi i'nio'.
4Jesús kiak iyone'ni 'ate:
—'Ye'en, ká ajwelna'a siukia jiwoyi. Janajataja jla'am ti ja ak, ti ja joyi ni pa'yi, ti jani'wenkine. 'Yina toni siupa jawo 'wajieta' pa Sinia' iyot'iyipi ka tiwoki pa Moisés,#Lev 14.1-32 ja 'nakayeyijna'a ti ja wikie'eyeyi napo i'nio' ti jan'we'en ti netia'n ki iyo ki awet'ia.
Jesús ijwiejiet pa tokis jika anechiyas jikawo
(Lc 7.1-10)
5Ti Jesús yiyet'ijiampe jlajak isi' Capernaum, siupa tokis jika anechiyas Roma jlele ijioyi ja Jesús ti inip'elisine ti iyo'ate:
6—'Yaka'niona, 'yakawo ja je inippijiame, je t'onk'i. Wuj ti yejlat'ni siunie jikie iyoyi.
7Jesús isiujlie ti iyo'ate:
—Jayikna'a, ti jajwiejiet.
8'Yina iyo'ne 'ate pak tokis jika anechiyas:
—'Yaka'niona, wuj ti je ani'nojonit'i ka 'o kiajwe jlaja i'yuk. Kantitie wekie pa a'leja paka ajloyi, 'yina siojo 'yakawo ja 'esie. 9Siuti ya'am kia'awo pet 'yaka anechiyasas po', ti a pet kiajwe, 'yina kia'iyo 'yakawos po' ti yi' isiajwe. Jak je iyoyiji ti awone 'ate ni ijwienjli, “Maj”, je t'o'ni. Siuti awone 'ate, “Jomet”, kia'iyojliyi. Ni'ne ti awone 'ate ni 'yakawo, “Lesane siu'nie”, ilisanayi.
10Jesús kawojlijinipi ti ipi'yayejampe, iyone'ne 'ate siupapo i'nio' yamk'i:
—Ijiatk'i siunie jayo ti jajwi'lase'm, ti je a'we'en paka Israel jleleye ka kia'iwo 'ate siu'nie, ti ijiate ti jitienkiujnieye po'. 11Jajwi'lase'm 'neje ti ja 'lojwa siunapo i'nio' tal 'niji taj'le ni kilie', siu'neje napo tal 'niji ijio'we ni kilie', janam'ni ti jankijwanisi ni Abraham siu'neje ni Isaac, jla'yi ni Jacob ti jan'yekiujni'n, ts'iji yi'i ni jika anechijiayas ni Sinia'. 12Jlampet siunapo i'nio' ti Sinia' iniajnat ti iyotaja ka ine'ne ni jika anechijiayas, napok intatayijinie'e ni ajnatiok ti yi' kisie'e, siunie jane'yi niwa lajlasa ti jawujwa ti ja a'tieja.
13Sekyi'i Jesús iyone'ne 'ate pak tokis jika anechiyas:
—Maj ka api. Je ijiat ka je 'nakaj. Lapakawo ti nak it'imina ni atankiujnieye ti 'es ti jipejlanit'i awa'm.
Pakayi ti Jesús kiak iyo, pak tokis jika anechiyas jikawo 'es'ne.
Jesús ijwiejiet japa Pedro kant'e
(Mc 1.29-31; Lc 4.38-39)
14Jesús ijioyet'ipi ji'wete ja Pedro. Pakayi ti i'winaja jlaja jikant'e ja Pedro ti je inippijiame ti inlayetiok yi'i. 15'Yina jikio' 'nejie'e pa isiets'e, ti 'esiet'ipi, nojwayi ape'e ti kio'yok'i. Iniyet'ipi pijia'm jla'm iyonayi'ni 'ate ti ilisane k'iye pa jantojw ja Jesús.
'Loj papo i'nio' Jesús ijwiejiete'n
(Mc 1.32-34; Lc 4.40-41)
16Jlampa k'iejli kilie' yamat'ipi isia'm, tikiniejat'iyiji'nijpe siupapo jitiej je isis. Etiet'ipi ti tamti'yi papo, sekyi'i yamat'i'nijpe puwa imose'l yijits'i papo i'nio' ti iliaki. Ijwiejiete'n wikie'eyi siupapo i'nio' jiwet'ia po'o. 17Sekyi'i ti jiwekie'aja ti 'yaka siupi iyot'iyipi pa Sinia' jijwejlanik jiwo Isaías ti iyo'ate:
“Jla'am ti ijialts'e niwa ts'ajwes t'a'ti,
siu'neje niwa siliayejes.”#Is 53.4
Siupapo iyo ka nekk'i pa Jesús
(Lc 9.57-62)
18Ti Jesús i'wina ti 'loj papo i'nio' nojweje, sekyi'i iyone'ne 'ate japo t'eyasajnas:
—Naja'ni ja tiuma i'niati 'wechaja.
19Siupapo jiwos pa Moisés jika'neyasajnaye, ijwienjli'ne siupi ijioyi ti iyonat'iyijpe 'ate:
—Inka'neyasajnawo, jajojwi pa jajojwi, 'yina akajli ti jayik ajak'i.
20Jesús isiujlie ti iyo'ate:
—Siuniwa yosis po' niwa jijwa'al, siuniwa ajwejnas jlopis po' jla'am, jlampet ni I'nio' Jlas laj ji'weta' ka ine'yi ka ininop'it ka ima'a.
21Po 'neje siupa jikiecha, ti t'eyasanik jla'am, ti iyone 'ate:
—'Yaka'niona, ejlokiu' janiajnat kiu' ka ip'io'ne ki ika kijil masa.
22Jesús isiujlie ti iyo'ate:
—Ejlowek, naj na'm ijyik'i. Ena'ate pet siunapo 'yajle'n ka imp'onits'i kiapo ijia ti 'yajle'n.
Jesús ilinkine pa jlajwu siu'neje puwa ji'wukijlimpejes
(Mc 4.35-41; Lc 8.22-25)
23Jesús tisiojmayet'ijiampe japa kasejkana. T'eyasajnas yamat'ik'ipe ti yama. 24Pa yit'iyipe jikiowe'e pa i'niat jlajlik'i ti yiyet'iyipi siupa jlajwutiok, ti pejla ijlinik'i. Siuti i'niat itiyejaja'm sekyi'i ijliena'ne ka 'no isia'm japa kasejkana. 'Yina Jesús imia'a pakayi. 25Yamat'i'nijpe papo t'eyasajnas ti 'yujwatis'ni. Iyonat'iyisijpe 'ate:
—¡'Yaka'niona, kas'manit. Janajk'i isia'm!
26Iyo'ne pet 'ate ti isiujlie:
—¿Yot'iyi'ni ti ijnots'inajyits'i? ¡Ijiateje napo yi 'ne 'nakayi jla'am ti laj astankiujnieyeja'!
Sekyi'i ti iniyet'ipi pijia'm, tamtiyet'i'yijpe pa jlajwu siu'neje pa i'niat, sekyi'i ti 'yakamaja t'ipi, 'yakama ti 'yakama. 27Kawojlijinit'iyisipi japoka ti i'winis ti kia'iyo. Iyoyet'iyispe 'ate:
—¿Tent'i 'ni siu'nie i'nio'? ¡'Yina ti jlajwutiok siu'neje na i'niat jlajlik'i je 'yaka'm ape'e ti ijliuye!
Jesús ijwiejiet papo times jitiej je isis yi' Gadáraja
(Mc 3.1-20; Lc 8.26-39)
28Ti Jesús yiyet'iyipi siupi ijioyisi, i'niat ji'wechaja, siojopa ajnat jle' iyo'ate Gadara, times papo i'nio' jitiej je isis ijioyi, ti tajlisi puwa a'no'ol. Wuj ti jwesis papoka. Lajk'i papo ka injweyisi ka inoyisi'ni siupi yi'i. 29Ti yiyet'iyisipi ja Jesús, kiak t'ipa iyoyeyisipi ti tank'i wita'm:
—Sinia' jlas, ¿yot'iyi'ni ti je kasse'nate? ¿Jiwot'iyimi ka poye ta'a paka wonts'e, ti ji'nis 'yina ti je yijliyi'ijyi siojona jlomaye?
30Sek k'iejliyiji siupa yiji puwa ijnisies jitio', ti its'ipk'ijin'ni. 31Siupuwa imose'l yiji papo i'nio' inip'elisinisi'ni ja Jesús, ti iyoyits'i 'ate:
—Ka kassottiena'a kisie'e, kasjloyinie'e niwa ijnisies jitio' ka 'yukiamk'i.
32Jesús iyo'ne 'ate:
—¡Maye'ni!
Tajlayisia'm papo i'nio', 'yuyejamk'i puwa ijnisies jitio'. Je paja wat ti yamat'i'nijpe ti t'osi'ni ti namayisk'i isia'm ti taj'l ape'e japa tikijnaki, sekyi'i tisiojmayesiaja'm japak i'niat. Sekyi'i 'yajlen'ne lapakawo ti yimk'anaja'n.
33Siupapo i'nio' i'yena puwak ijnisies jitio', ti i'winayis ti kia'iyo, wuj ti jnots'ijnits'i. Yamat'i'nijpe ti t'osi'ni, ti yiyet'iyispe isiyi, sekyi'i ijwilajamk'i papo i'nio' siupi iyo pa jiwet'ia puwa ijnisies jitio', siu'neje pi iyo papok jitiej je isis. 34Papok i'nio' 'yakapajlat'iyisipi ja Jesús. Yiyisi ti kiak t'ipa iyonayisipi 'ate:
—K'iuts'e'm, siunie jayona'aja, ¡'esiji ka atajla'm siujlie'e saka ajnat!
Избрани в момента:
Mateo 8: CRT97
Маркирай стих
Споделяне
Копиране
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fbg.png&w=128&q=75)
Искате ли вашите акценти да бъдат запазени на всички ваши устройства? Регистрирайте се или влезте
Nuevo Testamento en Chorote © Sociedades Biblicas Unidas, 1997.