Yohana 5
5
1Panyuma pa aga likayili ligono likulungu lya waYehudi; nu Yesu akakweliti ku Yerusalem.
2Leka liyii pa Yerusalem liliwa pa ndyango wa mambelele, ili likemeleka pa kiHebrayo Bethesda, ni liyii ni malufuka mhano. 3Pa aga likagoniti lipuga lya watamu, wakukoyoka miho, wanya filema, wa kuyunda, walindilaga machi kuwila. 4Ndawa malaika aselelaga pa lukumbi lwake ngati mugati mwa liliwa kudimbusa machi: mumu yula akayingili pa kutumbula panyuma pa kudimbusika machi gala akapatiti kusangaluka pa utamu uyi woha akayili nawo. 5Leka akayili mundu nunuyu kuko, wakulegeleka miaka makumi gadatu ni nane. 6Apa akambweni Yesu yombe agoniti, na akamanyiti kukita atemi wila miaka mingi, anjowela, Ulonda kusangaluka? 7Ntamu yula akamhigiti yombe, Bambo, niyilepe ni mundu wa kuniwika mu liliwa apa machi gatimbuka: leka pala niyii mu kuhicha nenga, yungi aselela palongolo pa nenga. 8Yesu anjowela, Wuka, upindaye kitanda kyako, ni ugendagendaye. 9Ni hino apa mundu akakitiki wakusangaluka, na akapinditi kitala kyake ni akagenditi.
10Leka likayili ligono lya sabato pa ligono lila. Mumu waYehudi wakajowiti kwa wakulamasika, Sabato yiyii, ni nukuyitikalika lepa pa wenga kupinda kitala kyako. 11Leka akawahigiti wombe, Yuyu akanikiti wa kulama, yuyu akajowiti kwa nenga, Upindaye kitala kyako, ugendaye. 12Wakankotiti, Nani mundu uyu akajowiti kwa wenga, Upindaye, ni kugendagenda? 13Leka wakulamasika akamanyiti lepa nani ayii: ndawa Yesu akakiyepwisi, ndawa lipuga likayili pandu apa. 14Panyuma pa aga Yesu ankolela mu hekalu, na akajowiti kwa yombe, Lola, ulamasiki: ukotoke kuhoka kawili, nausi kindu kiwifu kulutila kisipata kuya kwako. 15Akawukiti mundu yula, na kuwakokosela waYehudi kukita wa kundamisa ayii Yesu. 16Na kwa ndawa iyi waYehudi wakayili mu kumhyunga Yesu, pakuya akakiti ifi pa sabato. 17Koma Yesu akawahigiti, Dadi wangu ahenga mahengo mpaka hino apa, na nenga nihenga. 18Mumu kwa ndawa iyi waYehudi wakayili mu kulonda nyamhope kunkoma, nakuya ndawa ya kuwopola sabato kwakape, koma kwa ndawa ajowiti kawili kukita Mulungu Dadi mundu mwene, kwilinganisa mwene nu Mulungu.
19Mumu Yesu akahigiti ni kuwajowela wombe,
Chakaka, chakaka, niwajowela, Mwana ahotola lepa kukita kindu kuhumila mwene wakape, leka kila akiwona Dadi mundu akita: pakukita kiyi kyoha akita yuyulayula, fifilafila kawili nu Mwana akita wiwi. 20Pakuya Dadi angana Mwana, ni andasa fyoha ifi akita mwene: ni yandase yombe mahengo makulungu kulutila ifi, nausi mukangache. 21Pakuya ngati umu Dadi asyusila wakufwa ni kuwalamisa, wilawila Mwana kawili awalamisa awa alonda. 22Pakuya haka Dadi kupaula nakupaula lepa mundu, koma ampili kupaula kwoha Mwana; 23nausi woha wanginike Mwana, ngati umu wanginikila Dadi. Uyu alema kunginika Mwana anginika lepa Dadi yula akampeliki. 24Chakaka, chakaka, niwajowela, Uyu aliyufwana lilowe lyangu, ni kunkela uyu akanipeliki, ayii nako kulama kwa miaka, ni ayingila lepa pa kupaula, koma ahamiti pa kufwa kiyingalile pa kulama. 25Chakaka, chakaka, niwajowela, Saa yiyii mu kuyicha, na hino yiyii, apa wakufwa yawayufwane lilowe lya Mwana wa Mulungu; na wala wayufwanila yawalame. 26Pakuya ngati umu Dadi ayii ni kulama mugati mwake, wiwi akampili Mwana kawili kuya ni kulama mugati mwake: 27ni akampili yombe chengo kupaula, pakukita Mwana wa adam ayii. 28Musikangacha pa iki: pakuya saa yiyii mu kuyicha, pala woha awa wayii pa manyinja yawayufwanile lilowe lyake, 29na yawapite kuhumila kula; wala wakiteye finofu, kwa kusyuka kwa kulama; na wala wakiteye fiwifu, kwa kusyuka kwa kupaula.
30Nihotola lepa nenga kukita kindu pa nakape: umu niyufwanila, nipaula: ni kupaula kwangu kuyii kwa malinga; ndawa nilondalonda lepa kilondo kyangu, koma kila kya uyu akanipeliki. 31Wona nilasa ulungamakiso wa namwene, ulungamakiso wangu uyilepe wa chakaka. 32Yungi ayili wakulasa ulungamakiso wa nenga; ni nimanya kukita ulungamakiso wula alasa wa nenga uyii wa chakaka. 33Mwenga mwatumiti kwa Yohana, nuyombe alasiti ulungamakiso wa fya chakaka. 34Leka nenga niyupa lepa ulungamakiso wa kuhumila pa mundu: koma nijowa aga, nausi muyokoleke. 35Yuyulayula akayili nyali ya kupamba ni kulangala: nu mwenga mukalonditi kusangaluka mu lulangalila lwake kwa lukumbi. 36Leka ulungamakiso uwu niyii nawo nenga uyii ukulungu kulutila wa Yohana: pakuya mahengo gala anipili Dadi nausi nigamalakise, mahengo gagalagala aga nigakita, galasa ulungamakiso wa nenga, kukita Dadi anitumiti nenga. 37Nu Dadi yuanipelekili, yuyula alasiti ulungamakiso wa nenga. Magono goha mukayufwini lepa lilowe lyake, haka kuwoneka kwake mukuweni lepa. 38Na lilowe lyake muyii nalo lepa kuhwela mugati mwinu: ndawa uyu yuyulayula akantumiti, mwenga munkela lepa. 39Mulondaye‐londaye pa malembo, ndawa muhola kukita mugati mwawe muyii nako kulama kwa miaka; na gagalagala gayii gakulasa ulungamakiso wa nenga; 40ni mulonda lepa kunichila, nausi muye ni kulama. 41Niyupa lepa kukwisika kwa wandu. 42Koma niwamanya mwenga, kukita muyilepe ni kiganano kyake Mulungu mugati mwinu. 43Nenga nichiti pa lihina lya Dadi wangu, ni muniyupa lepa: wona yungi ahicha pa lihina lya yombe wakape, yuyulayula yamunjupe. 44Muhotola wuli mwenga kukela, wa kuyupana kukwisika yungi nu njini, ni kukwisika kula kuhumila pa Mulungu yula wakape mukulonda lepa? 45Musihola kukita nenga yaniwasimakile mwenga kwa Dadi; ayili wa kuwasimakila mwenga, Musa, pa uyu mukamhuwalili kihuwalile. 46Pakuya wona mukankeliti Musa, ngamunikeliti nenga; pakuya yuyulayula akalembiti fya nenga. 47Leka wona mwenga mukela lepa malembo gake, yumukele wuli malowe gangu?
Избрани в момента:
Yohana 5: MGS1937
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
First published by the British and Foreign Bible Society in 1937.