लुका 4
4
सैतानङा येसुङाना उनिङ्ग्वा कोलुना
(मात्ति ४:१-११; मारकुस १:१२-१३)
1येसु यारदान होङ्लाम्मा नोक्टानाँ सेङ्सेङ्ना हाङ्सा उन्लोक् युङासाना॥ हिट्ना बेला सेङ्सेङ्ना हाङ्साङा उन् साक्चा उयुङ्निना डेन्लेङ् खाट्टुए॥ 2हिट्नि सोरि सैतानङा चालिस लेम्बा सोम्मा वारिक्ङि ठेम्मा येसुङाना उनिङ्ग्वा कोलुए॥ हिट्ना चालिस लेम्बा सोम्मा येसुङा पाक्चा चुवाट्टुन् नुङ् उन्ङाना आड्डिक् टुक्लोक् ओसाॽवासे॥ 3हिट्नापाका सैतानङा येसु लोडुए, “छेम्बा डोक्, खान् माङ्हाङ् छा भोने, ना लिङ्गेॽवा चालेपा उलियाक् नुङ् आग्याँ चोगु॥”
4येसुङा हिट्ना लोडुए, “धारमाछाप्लाङि नाड्डे छेप्टेसे, ‘याप्मि चामा-ठुङ्माङा एरोक् हिङ्निना॥’”#धारमाबिधि ८:३
5हिट्नुङ्ना सैतानङा येसु झोन्झोबा उठुइ खाट्टुङ् छोम्मोङा डोक् ना नाराङिगा ख्वाप्पा मुलुक्चि निमेट्सा लोडुए, 6“आङा खान्लोङ्सा नागा ख्वाप्पा देसङिगा हाङ्बा हिट्नुङ् नागा सोब्बे माक्फेन्सुबेन्ङाना डाङ्बा चोक्नाँ॥ पोङ्भोने नागा ख्वाप्पा आमुक्ङि डोक् उयुङ्ग्वा हिट्नुङ् आनिङ्ग्वा ओटासुगा याप्मि पिमा हिडुङ्टुङ्॥ 7आङा स्या याङ्मेट्टा हिट्नुङ् नागा ख्वाप्पा थोक्चि खान्नागा उलियुक्॥”
8येसुङा हिट्ना लोडुए, “धारमाछाप्लाङि नाड्डे छेप्टेसे–
‘खान्ङा कामाङ्हाङ् डाङ्बा एडोक् स्या चोगु हिट्नुङ् उन्ङाना एरोक् सेवा चोगु॥’”#धारमाबिधि ६:१३
9हिट्नुङ् सैतानङा येसु यरुसलेम खालाङ्गाङि खाट्टुए हिट्नुङ् माङ्ठाना ओछोम्बोङि खाट्टुङ् युङ्सुए हिट्नुङ् उन् लोडुए, “खान् माङ्हाङ् छा भोने लु नाहिलाम्मा यो आम्सा, 10पोङ्भोने धारमाछाप्लाङि नाड्डे छेप्टेसे–
‘खान् पुमाउङ्सा माङ्हाङ्ङा आप्पे माङ्हाङ् रिङ् काउग्बाचि पाङ्सुचिचि॥
11हिट्नुङ् कालाङ् लुङ्गेॽवाङि ओटोक्नि चा नुङ्
हिट्नागाँ खान् उन्चि मुक्ङि माटाक्युक्॥’#छाम्लोमा छाप्ला ९१:११-१२ ”
12येसुङा लोडुए, “धारमाछाप्लाङि नाड्डे चा छेप्टेसे, ‘खान्ङा कामाङ्हाङ् टाङ्बाङाना उनिङ्ग्वा छिक्माना टोॽवा चोगुन्॥’”#धारमाबिधि ६:१६ 13सैतानङा येसु सोब्बे रिङ्ङि उनिङ्ग्वा छिक्माना टोॽवा चोक्मा हिडुङ् फेरि ठिक्काना बेला मिटोक्ङे सोम्मा नाडुढोए॥
गालिल छेट्राङि येसुङाना उटुम्ङिना टोॽवा
(मात्ति ४:१२-१७; मारकुस १:१४-१५)
14सेङ्सेङ्ना हाङ्सालाम्मा साक्ति टुबुङ् येसु गालिल छेट्राङि नोक्टे॥ उन्ङाना रिङ् सोब्बेलेङ् याप्मिचिङा ओमाट्टुए॥ 15उन्ङा याहुदि छुम्मापाङ्ङि याप्मिचि हिसिक्मा ठालाँ चोगुचे हिट्नुङ् ख्वाप्पाङा उनिङ् ओचोन्डुए॥
नासारातङि येसु याप्मिचिङा बिस्वास ओचोग्वाट्टुन्
(मात्ति १३:५३-५८; मारकुस ६:१-६)
16येसु उन् आप्पे पोयाना नासारात ओलोडुना खालाङ्गाङि होन्डाडाए॥ साडे गाड्डे डोक् येसु युङ्माना लेम्बा#४:१६ युङ्माना लेम्बाम्बाक् याहुदिचिगा युङ्माना लेम्बा नुङ् ठाहा लियुक्॥ याहुदि छुम्मापाङ्ङि खाडे हिट्नुङ् माङ्हाङ्ङाना रिङ् पोढाँ चोक्ङा येबे॥ 17उन् माङ्काटा यासैयाङा छेप्टुना छाप्ला उपिडुए हिट्नुङ् छाप्ला ओङ्सुङ् नाड्डे छेप्बालाक् होट्टुङ् पोढाँ चोगुए–
18“माङ्हाङ् डाङ्बाङा ओहाङ्सा आठुङ्ङि याङ्ठेन्डाबिडैसे,
पोङ्भोने पाक्चा ओवानिगा लोङ्सा ओचेट्नुना खाबोर खेम्मेप्मा आङा याङ्सेगाउङ् याङ्पाङ्साइसे॥
खाम्बाङ्ङि ओठायागा याप्मिचि छुट्काराङाना रिङ् लोसिङा, याङ्कानिनिबाचिङा उनिसुलोक् चोक्माना रिङ् लोसिङा,
निम्छारो उलिसागा छुट्कारा पिमा,
19हिट्नुङ् ओयाप्मिचि लोङ्सा काहिङ्मेप्बा डाङ्बाङाना बेला टाइसे पिक्सा लोसिङा आङा याङ्पाङ्साइसे॥”#यासैया ६१:१-२
20हिट्नुङ्ना येसुङा छाप्ला छुप्टुङ् ठिबाङ् सेवाक् लोङ्सा नोक्टुबिडुचे हिट्नुङ् उन् युङे॥ हिट्नि ओवासेट्टागा ख्वाप्पा याप्मिचिङा उन् उपुयुयाक्टुए॥ 21येसुङा हिट्नागा लोडुचे, “धारमाछाप्लाङिना ना रिङ् हाट्ले खानिङा आखेम्सुम्गेट्टुम्लोक् नाहि सोब्बे युदैसे॥”
22सोब्बे याप्मिचिङा उनिङ् ओचोन्डुए हिट्नुङ् येसुङा माट्टुना ओचेट्नुना रिङ् ओखेम्सुनाँ डोङ् ओठोङ्डे॥ हिट्नागा याप्मिचिङा उमाट्टुए, नाम्टे योसेफङा उइछा गोटे॥
23हिट्नुङ् येसुङा लोडुचे, “छेम्बा डोक्, खानिङा आङा ना रिङ् आलोडिटिङा, ‘हाउ सिडापाङ्डा काचोक्बा, खान् पाइले आप्पे नुमानिङ् लिसा॥’ हिट्नुङ् ‘काफारनाहुम्ङि खान्ङा आचोगु गाड्डे डोक् ना कायुक्ताम्ङि चा निङ्ग्वा मुन्निना टोॽवा चोगु॥’” 24टरो येसुङा लोडुचे, “छेम्बा डोक्, आङा खानि लोनाँनि, खोना चा माङ्काटाचि आप्पे उन्चि युक्ताम्ङि याप्मिचिङा नुलोक् चाट्ला ओमेट्टुन्चिन्गा॥ 25आरको ठिक् रिङ् आङा खानि लोनाँनि, माङ्काटा एलियाङाना टालाङि सुम्बोक् ओफारा बारखा टेप्मा व्हेट् टानेयाट्नि हिट्नुङ् ख्वाप्पा देसङि आनिकाल लाहाब् लिसे॥ हिट्नापाका इस्राएलङि जोम् लाङ्मेप्माचि ओवासेट्टागा॥ 26हिट्नुङ् सिदोन देसङाना साराफेतङि वासाना लाङ्मेप्माङि एडोक् माङ्हाङ्ङा एलिया पाङ्सुए, टरो इस्राएलङि ओवासेट्टागा लाङ्मेप्माचिङि भोने पाङ्स्वाट्टुन्॥ 27हिट्नाड्डे डोक् माङ्काटा एलिसाङाना टालाङि इस्राएलङि जोम् कोर रोग लाहाब् उलिसागा याप्मिचि उयुङासागा॥ हिट्नागा माड्डेङि साक्चा नुमानिङ् उलिनेयाट्नि, टरो सिरिया देसङिना नामान ओलोडुना याप्मि एडोक् नुये॥”#२ हाङ् ५:१-१४
28ना रिङ् ओखेम्सुङ् याहुदि छुम्मापाङ्ङिगा ख्वाप्पा याप्मिचिगा आड्डिक् उन्चि याग्लेडे॥ 29हिट्नागा ओकोबाउङ् येसु डोरोरो साट्सा साट्सा खालाङ्गालाम्मा भारा ओहोट्टुए॥ हिट्ना खालाङ्गाउम्बाक् झोन्झोबाङि डाना॥ हिट्नुङ् हिट्नागाँ येसु याक्ठेरेक् ओछोम्बोलाम्मा लेप्माढामा लोङ्सा ओखाट्टुए॥ 30टरो उन् जोम् उछुमागा याप्मिचिगा माझालाम्मा लिगाउङ् हिट्नालाम्मा ओलाम्बो खाडे॥
ओचाफेन्ना रिमेट् लाहाब् लिसाना याप्मि नुयाना
(मारकुस १:२१-२८)
31हिट्नुङ्ना येसु गालिल छेट्राङि काफारनाहुम ओलोडुना खालाङ्गाङि आबे॥ जाइले चा युङ्माना लेम्बा याप्मिचि उन्ङा हिसिक्टुचिगा डागा॥ 32उन्ङा हिसिक्टुचिगा रिङ् हिट्नागाँ ओखेम्सुङ् डोङ् ओठोङ्डे, पोङ्भोने उन्ङा हिसिक्टुचिगा रिङ् आधिकारलोक् डाना॥#मात्ति ७:२८-२९; मारकुस १:२२
33याहुदि छुम्मापाङ्ङि ओचाफेन्ना रिमेट्ङा खोट्टुना ठिबाङ् याप्मि डाना॥ हिट्ना याप्मि टाराङ्-टाराङ् राट्सा पिगे, 34“हाउ नासारातङिना येसु, आन्याँ पाक् याप्मि आचोगालाबेना? पाक् खान् आन्याँ फ्याङ् मेग्माउङ्सा आटाइसेनि? खान् माङ्हाङ्ङा मापाङ्साना सेङ्सेङ्ना याप्मि नुङ् आङा मिसेन् निनाँ॥”
35ना रिङ् खेम्सुङ् येसुङा हिट्ना टोंडेबा खेमा लाप्टुङ् लोडुए, “चेक्नेन्, हिट्नुङ् ना याप्मिलाम्मा होन्डाउङ् खाडालेट्टा॥” हिट्ना याप्मि ओचाफेन्ना रिमेट्ङा सोब्बे याप्मिचि टोकानाइ ठाम्सुङ् पोक्टुढोए, हिट्ना याप्मिउम्बाक् याम्बा-नायाम्बा ठाम्सुचा खोनाइ चा खेसिक् लिनेट्नि॥
36हिट्नि सोब्बे याप्मिचि डोङ् ओठोङ्डाउङ् हिट्नागाँ नाड्डे उमाट्टुए, “ना खोड्डे पारिक्ना हिसिक्मा हाउ? आड्डिक् लुम्भोक्ना, उन्ङा ओचाफेन्ना रिमेट्चि खेमा लाप्टुचिनाँ चा ओहोन्युङ् उपिन्गा॥” 37हिट्नुङ् काफारनाहुम खालाङ्गाङाना सोब्बेलेङ् येसुङाना रिङ् छिन्डे॥
येसुलाम्मा जोम् याप्मिचि उनुए
(मात्ति ८:१४-१७; मारकुस १:२९-३४)
38येसु याहुदि छुम्मापाङ्लाम्मा होन्डाउङ् सिमोन ओलोडुना याप्मिङाना ओपाङ्ङि खाडे॥ हिट्नापाका सिमोन ओनाम्माङाना जोरोङा ओयेम् टुगाउङ् इम्साइसाना हिट्नुङ् हिट्नागाँ ना मेन्झेमा लोङ्सा येसुङि बिन्टि ओचोगुए॥ 39येसु सिमोन ओनाम्मा सोरि खाडाउङ् जोरो खेमा लाप्टुए हिट्नुङ् जोरोङा हिट्ना लेडुएट्टुए हिट्नुङ् हिट्ना बेला डोक् हिट्ना मेन्झेमा कोबाउङ् हिट्नागाँगा सेवा चोगुए॥
40हिट्नुङ् नाम् ठायाना बेला याप्मिचिङा पारिक् पारिक्ङागा उटुगागा याप्मिचि येसुङि ओटाडुचे॥ उन्ङा हिट्नागा ठिबाङ् ठिबाङ् याप्मिचि उठुङ्ङि उमुक् युङ्सुए हिट्नुङ् हिट्नागा याप्मिचि सोब्बे नुमानिङ् चोगुचे॥ 41जोम् याप्मिचिलाम्मा ओचाफेन्ना रिमेट्चि चा राट्सा राट्सा नाड्डे पिक्सा ओहोन्डे, “खान्उम्टे माङ्हाङ् छा॥” टरो येसुङा हिट्नागा खेमा लाप्टुचिउङ् चेग्मा डोक् पिडुवाट्टुन्चिन्, पोङ्भोने उन्बाक् खिरिस्ट नुङ् हिट्नागाँ मिसेन् उनिसुएसुना॥
येसुङा आरु डेन्ङि पारचार चोगुना टोॽवाङाना रिङ्
(मारकुस १:३५-३९)
42हिट्नुङ् हान्डेङ् एका भ्यानिक् येसु खुसुना डेन्ङि खाडे॥ जोम् याप्मिचिङा उन् कोन्सा ओखाडे॥ उन् उटुबुङ् “खान् खोनि चा खाट्नेन्, नाहि आन्याँलोक् डोक् युङा” पिक्सा छाक्मा ओकोलुए॥ 43टरो उन्ङा हिट्नागा लोडुचे, “हाट्ले आङा आरु खालाङ्गाङि चा माङ्हाङ् उमुलुक्ङाना ओचेट्नुना खाबोर खेम्मेप्माचि कोन्युक्, पोङ्भोने माङ्हाङ्ङा आङा ना टोॽवा चोग्मा लोङ्सा डोक् याङ्पाङ्साना॥” 44हिट्नुङ् उन्ङा याहुदिया छेट्राङिगा ख्वाप्पा याहुदि छुम्मापाङ्ङि खाडाउङ् पारचार चोगुए॥
Избрани в момента:
लुका 4: APH
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2023, Wycliffe Bible Translators, Inc. and Nepal Bible Society