Mateo 13
13
Diidza run lsaki'i kie' bënni raaze
(Mr 4:1-9; Lc 8:4-8)
1Larakz dza'a Jesús brooje yu'u ati yajchë'e ra nis xhën. 2Ati bunach zian guluduub'tzka na', lena'a Jesús greene lu barku ati grë'e, tzal'za bunach'a gulaga'an ra nis'a. 3Gzulau'e rui'leene leke diidza len diidza le run lsaki'i.
Gudxe leke: «Tue' bënni gyiije guuz, 4len tzal raaze, lati xhsei ni glëxhj la nëëz len guladxima bua' tazuuba len glaag'ba ley. 5Ye lati glëxhj ladj giaj ga ti rë' zxhëni yu; xhsei ni bë'u'te koma yu ni ti nak yu ga're'; 6san kati broj gbiidz, bzeegi ley ati gbiidx koma ti rë' lui. 7Ye lati xhsei ni glëxhj ladj yëtzi, yëtzi ni gxhën len blu'li'i ley. 8Ati ye lati glëxhj lu yu dxia'a len gbia'tzka; la' deu gbia tu'gayua' xhsei tu dxigu, ye la' gbia tson'lalj xhsei tu dxigu ati ye la' gbia chi'urua' xhsei tu dxigu. 9Tzka'li zua naag'li guluzenaag.»
Bixhkia' ruune lsaki'i diidza
(Mr 4:10-12; Lc 8:9-10)
10Bënni useed kie' Jesús gulabiige'e ga zue' len gulunaab'de Le' bixhkia' rseed'de bunach len diidza run lsaki'i. 11Le' bubi'e diidza: «Dios blui'de lbi'ili le naga'chi' ki yëla rnabe' ki yewayuba, san ti blui'e ley kieke leke. 12Koma bënni'a de kie', uzi're zxhëni; ati bënni'a ti de kie', zala lati'du'z le de kie' ulaguáke. 13Lena'a rui'leen'ka'ne diidza len diidza run lsaki'i; koma leke tuyu'ke san ti tale'i'de; tayëën'de san ti tuzenaage len ti tayajni'i'de. 14Len leke rajtzaag diidza be'e Isaías bënni be'e diidza ulaaz kie' Dios:
“Gakati luzenaage, ti layajni'i'de,
len gakati luyue' ti lale'i'de.
15Koma nayeyj ikj'lau'ke bënni yëdz ni,
nayeyj naag'ke
len gulusiaj'ke lau'ke
naar ti lale'i'de len ti layëën'de,
naar ti layajni'i'de len ti lubi'i'laadxi'ke,
naar neda ti un'ka'ne.”
16»San bixhgaba'li lbi'ili, koma zua' lau'li rle'i'li len zua naag'li ryëëni'li. 17Blikz'da rea' lbi'ili ki zian'ke bënni glui'ke diidza ulaaz kie' Dios len lekz'ka' bënni dxia'a gle'en'de lale'i'de le lbi'ili rle'i'li san ti gulale'i'de, gle'en'de layëën'de le lbi'ili ryëëni'li san ti gulayëën'de.
Jesús ruseedx'la'a'ne diidza run lsaki'i kie' bënni raaze
(Mr 4:13-20; Lc 8:11-15)
18»Guluzenaag xhki, le re'e'ni gna' diidza run lsaki'i kie' bënni raaze: 19Bënni tayëën'de diidza ki yëla rnabe' ki yewayuba len ti tayajni'i'de ley, nak'ke ka xhsei lea glëxhj la nëëz; riide bënni xëwi len rgue' diidza le chi naduuz lu laadxi'dau'ke. 20Xhsei lea glëxhj ladj giaj run lsaki'i bënni'a tayëën'de xhtiidze'e Dios len tazi'ke ley gdu laadxi'ke, 21san ti takua'ke tzutzu koma ti nun zxhëni lui, lena'a kati nia'a ki xhtiidze'e Dios tusaka'dë'ke leke u tulaag'ke leke, tabixe. 22Ati xhsei le naduuz ladj yëtzi run lsaki'i bënni'a tayëën'de xhtiidze'e Dios, san yëla ruzi'xhbei ki yëdz'lyu ni rzua'tzka leke bagi'i len yëla nadxi'i dumi rzi'ye'i leke, yugute' le ni rlu'li'i xhtiidze'e Dios ati ti rnëëdzj latj ga lului'ke nu nak'ke. 23San xhsei le naduuz lu yu dxia'a run lsaki'i bënni'a tayëën'de xhtiidze'e Dios len tayajni'i'de ley len tak'ke ka dxigu le gbia tu'gayua' xhsei, tson'lalj xhsei u le gbia chi'urua' xhsei tu dxigu.»
Diidza run lsaki'i ki gixi le ku nak len xhua'xhtiil
24Lekz'ka' blaabe kieke diidza run lsaki'i ni': «Yëla rnabe' ki yewayuba rak ki ka guk kie' tue' bënni guuze xhsei dxia'a lu xhyue'; 25san kati yugute'ke chi tas'ke, bdxiine bënni ti rdzaage le' dxia'a, len guuze gixi ku nak ladj xhua'xhtiil ati buze'e. 26Kati xhua'xhtiil gxhën len pkan deu, lekz'ka' blui'lau'i gixi'a ku nak. 27Na' bënni wendxin yajëëdx'ke bënni xaani layeel'a: “Xan, xhki xhsei lea guuzu lu layeel kiu' nak dxia'a, ¿gaxhkz broj gixi'a ku nak?” 28Bënni xaani layeel'a gudxe leke: “Bënni ti rdzaage neda dxia'a beene le ni.” Na' bënni wendxin kie' gulunaab'de le': “¿Re'en'du tzajëlj'tu gixi'a ku nak?” 29San le' bubi'e diidza: “Ti gak, ka gna kati galj'li gixi'a ku nak galj'li lekz'ka' xhua'xhtiil'a. 30Wak'r dxia'a gui'ru latj laxhën tuuz nakati gdxin'r dza uzi'ru ley; na' ksë'la'ka'ne bënni zia'a gixi'a ku nak lalj'ke len luuge'e ley tu xunnj ueaj naar luzeegie, ati lun'chi'ke xhua'xhtiil'a lu liidxi yëëz kia'.”»
Diidza run lsaki'i ki xhsei mostaza
(Mr 4:30-32; Lc 13:18-19)
31Lekz'ka' blaabe kieke diidza run lsaki'i ni': «Yëla rnabe' ki yewayuba nak lsaki'i len tu xhsei mostaza, le tue' bënni raaze lu xhyue'. 32Xhsei ni nak'r le we'en'du'tit ka ye la' xhsei, san kati rxhën, rxhën'r ka ye la' gixi le naduuz'k lu li'aj, len rak'te ka yaag xhën, len lu xhuuzi'i tuma liidx'kba bginn.»
Diidza run lsaki'i ki le rzaaxh
(Lc 13:20-21)
33Lekz'ka' blaabe kieke diidza run lsaki'i ni': «Yëla rnabe' ki yewayuba nak lsaki'i len tu le rzaaxh le tuunu nguul rlaadxi'nu len tson gi'in yëëzj naar gzaaxh dera xhkuaanu'a.»
Rak ka' rna Diidza La'ay
(Mr 4:33-34)
34Yugute' diidza ni blaabe Jesús kiegak bunach len diidza run lsaki'i, ati len diidza'z run'z lsaki'i pseed'de leke. 35Ka guk naar yajtzaag len diidza be'e bënni be'e diidza ulaaz kie' Dios:
«Len diidza run lsaki'i gui'a diidza;
kixhjë'a yugu le naga'chi'k
ka gu'ta'grë'z yëdz'lyu.»
Jesús ruseedx'la'a'ne diidza run lsaki'i ki gixi'a ku nak
36Jesús buse'e bunach'a ati gyaazie nu'yu'u, na' bënni useed kie' gulabiige'e ga ze' len gulunaab'de Le' useedx'la'a'ne bixh re'e'ni gna' diidza run lsaki'i ki gixi'a ku nak lu layeel. 37Jesús bubi'e diidza: «Le' Xi'ine Bënni nake bënni'a raaze xhsei dxia'a, 38len layeel'a nak yëdz'lyu ni. Xhsei dxia'a run lsaki'i bënni'a nak'ke ki yëla rnabe' kie' Dios, ati gixi ku nak run lsaki'i bënni'a nak'ke kie' bënni xëwi, 39ati bënni ti rdzaage le' dxia'a len guuze gixi'a ku nak nake bënni xëwi. Dza kati lalape run lsaki'i dza tzu'u lu'uudx ki yëdz'lyu, len nu lalap nak'ke gbaaz la'ay kie' Dios. 40Ka rak kati tutuube gixi len tuzal'ke ley lgi' naar tzeegi, lekz'ka' gak dza tzu'u lu'uudx ki yëdz'lyu. 41Le' Xi'ine Bënni ksë'le'e gbaaz la'ay kie' lubiije lu yëla rnabe' kie' bënni tuune le ku nak len bënni tuune ga bënni yubl labixe lu dula. 42Luzal'ke leke lgi'gabil, na' lazulau'ke labëëdx'ke len lutil la'ya'ke. 43Na' bënni tuune le nak dxia'a layep'ke'yës'lni ka gbiidz lu yëla rnabe' kie' Xuuz'ru. Tzka'li zua naag'li guluzenaag.
Diidza run lsaki'i ki lea zaki'i'tzki len naga'chi'
44»Yëla rnabe' ki yewayuba nak ka tu le zaki'i'tzki len naga'chi' lu tu layeel. Tue' bënni rudzëël'de ley len larakz na' ruka'che'e; ati rudziiji'tzki'de rajeti'e yugute' le de kie' ati ra'awe layeel'a.
Diidza run lsaki'i ki giaj le zaki'i'tzki
45»Lekz'ka' yëla rnabe' ki yewayuba rak ki ka rak kie' tue' bënni ruti'e len ra'awe ati rde' rgiilje giaj le zaki'i'tzki; 46kati budzëël'de tu le zaki'i'tzki, gyiije len beti'e yugute' le de kie' len gu'uwe giaj ni.
Diidza run lsaki'i ki yëxhj le tazëën'de'ba bël
47»Yëla rnabe' ki yewayuba rak ki ka rak ki yëxhj le tazëën'de'ba bël, le tuzal'ke lu nis xhën ati rzën lek'ba bël gza'a. 48Kati yëxhj le tazëën'de'ba bël'a chi bdza', bënni tazëëne'ba bël tubiije ley ra nis xhën, ga tabë'ke tubë'ke'ba, tagu'u'ke'ba lu bdë'ë bël dxia'a ati bua' ti nak'kba dxia'a taru'u'ne'ba. 49Lekz'ka' ka gak dza kati tzu'u lu'uudx ki yëdz'lyu: gbaaz la'ay kie' Dios larooje len lubiije kiizi bënni tuune le ku nak kieke bënni tuune le dxia'a, 50ati bënni'a tuune le ku nak luzal'ke leke lgi'. Na' lazulau'ke labëëdx'ke len lutil la'ya'ke.»
Le guul len le kub
51Jesús bnaabe:
—¿Ba rajni'i'li yugute' le ni?
—Ja' rajni'i'tu—Gulanake leke.
52Na' Jesús gudxe leke:
—Kati tue' bënni useed xhba kie' Dios rseede le nak ki yëla rnabe' ki yewayuba, nake lsaki'i ka tue' bënni xaani yu'u, bënni rbiije ki le de kie' le nak le kub len lekz'ka' le nak le guul.
Jesús ki Nazaret
(Mr 6:1-6; Lc 4:16-30)
53Kati Jesús buudx blaabe yugute' diidza run lsaki'i ni, buze'e na' 54len budxiine laadze, ga gzulau'e rseed'de lu yu'u useed. Bunach tubaani'tzki'de tanáke:
—¿Gaxhkz pseede yugute' le nëëz'de? ¿Nakxh'kz ruune ruune yëla wak xhën? 55¿Naru keg bënni xi'ine bënni'a rbagu'e yaag, ati xhne'e leenu María? ¿Naru keg bënni bë'che'e Santiago, José, Simón len Judas, 56ati naru keg nguul zaane'a nguul'a nakua'leen'nu ro'u ni? ¿Gaxhkz gza' yugute' le ni?
57Ati ti tayajle'ke Le', lena'a Jesús gudxe leke:
Bënni rue'e diidza ulaaz kie' Dios ti tui'ke le' bala'an laadze u liidxe, san ga yubl tui'ke le bala'an.
58Ati ti beene zian yëla wak xhën ni', koma bunach'a ti tayajle'ke Le'.
Избрани в момента:
Mateo 13: PZD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Sociedad Biblica de México AC