Mateo 11
11
1Kati Jesús buudx gdixhji'de chin'nu'ke bënni useed kie' le rala luune, buze'e ni ziije tzajseed'de len tzajtixhjë'e diidza kub dxia'a yugute' yëdz ki gia'a yeego'a.
VI. YUGU LE BEENE JESÚS
(11:2—12:50)
Bënni gbaaz psë'le'e Juan bënni pkiile nis bunach
(Lc 7:18-35)
2Kati Juan yu'e liidx'gia'a byëën'de diidza ki le ruune Cristo. Na' psë'le'e la'ke bënni da'ke le' 3ki tzajnaab'ke xhki leel nake Le' bënni'a rala giide, u rala labëëze bënni yubl.
4Jesús bubi'e diidza: «Gultziaj len gie'li'ne Juan le rle'i'li len ryëëni'li. 5Gulkixhji'de ki bënni lau'chul chi tale'i'de, bënni'a ti rak laza'ke chi taza'ke, bënni te'i'de baya' nuudzu chi tu'ueake, bënni këëdzu chi tayëën'de, bënni nat tubaane lu yëla gut, len bënni yechi tagixhji'de leke diidza kub dxia'a. 6¡Ati bixhgabe' bënni ti rtupe ni'a kia'!»
7Kati guluza'ke bënni'a psë'le'e Juan, Jesús gzulau'e rui'leene leke diidza kie' Juan, rne': «¿Bixh broj'li yajyu'li lu yu biidx? ¿Tu yëtj le rzeikj'rdxi'i ley bë'? 8¿Bixh broj'li yajyu'li? ¿Tue' bënni nakue' laari lzaka'? Lbi'ili nëëzi'li bënni takue' laari lzaka' nakua'ke liidx'ke bënni tunabe'ke. 9¿Bixh yajyu'li? ¿Tue' bënni rue'e diidza ulaaz kie' Dios? Ka nak, le' nak're blou ka tue' bënni rue'e diidza ulaaz kie' Dios. 10Juan nake bënni'a nayoj kie' lu Diidza La'ay, rna:
»“Neda rsë'la'ne gbaaz kia' nëëre lau'u,
naar kpe'e kiu' nëëz.”
11Le nak'te rea' lbi'ili, ki ladj'ke yugute'ke bënni naalj'ke lu yëdz'lyu ni nutunu nak'r blou ka Juan bënni pkiile nis bunach; san lu yëla rnabe' kie' Dios bënni ti nake zi' blou nak're blou ka le'.
12»Ka bdxin'ze Juan bënni pkiile nis bunach len rdxin'te dza'a zuaaru na', yëla rnabe' ki yewayuba ziaj'tekz rza' gakati bi rak, len bënni tutip'laadxi'ke taza'ki'de takua'ke tzutzu lu yëla rnabe' ni. 13Le nayoj lu xhba kie' Dios len diidza guluzooje bënni glui'ke diidza ulaaz kie' Dios gulagixhjë' le rala gak na' bdxin'te dza biide Juan, 14len tzajle'li u ti tzajle'li, Juan nake Elías bënni'a be'e diidza ulaaz kie' Dios, bënni'a rala giide. 15Tzka'li zua naag'li guluzenaag.
16»¿Nuxh kza'ki'ida bunach nakua' dza zuaaru na'a? Nak'ke ka bi'dau'a tabë'bi lu ye'i tagitj'bi len tuskua' lza'ak'bi: 17“Bkëëdx'tu gy, ati lbi'ili ti bya'a'li, bil'yechi'tu, san lbi'ili ti grëëdx'li.” 18Koma biide Juan, len ti ria'aj'ra'we, ati rnaali ki yu'u le' bë' xëwi. 19Chi nak ka biide le' Xi'ine Bënni ria'aj'ra'we, na' rnaali bënni wa'gu'xë'ë nake len ria'aj'tzke, rdzaage dxia'a bënni'a ze xhtiidza'ke tuune le ku nak len bënni'a tukiixhj'ke laaz'sua'ke ki Roma. San yëla nayajni'i kie' Dios rak'be' kati rlui'lau'i.»
Le lutzag yëdz ku tayajle'
(Lc 10:13-15)
20Na' Jesús gzulau'e rdil'leene bunach ki yugu yëdz ga beene zian'k yëla wak xhën koma ti tubi'i'laadxi'ke len Dios. Gudxe leke: 21«¡Bayechi nak kiu' yëdz Corazín! ¡Bayechi nak kiu' yëdz Betsaida! Nar'la lu yëdz Tiro len yëdz Sidón glakgak yëla wak xhën le glak len lbi'ili, bat'te chi gulubi'i'laadxi'ke len Dios, lakue' ban'guch len labë'ke lu dë. 22San rea' lbi'ili ki kati gdxin dza'a kchuug'be'e Dios, yëla rsaka'zi' kieeli uyali'ir ka kieke bënni Tiro len bënni Sidón. 23Ati li' yëdz Cafarnaúm, ¿Ruuni li' ki chi bdxiinu yewayuba? ¡La zia'a tziaj'teezu lu gi'gabil! Nar'la lu yëdz Sodoma glakgak yëla wak xhën le glak len li', yëdz'a ni nakua' dza'a zuaaru na'. 24San rea' lbi'ili ki dza kati kchuug'be'e Dios, uyali'ir yëla rsaka'zi' le si'u, ka le lazi'ke bënni gia'a yeego ki Sodoma.»
Tuuze Xi'ine nëëz'de nuxh nak Le' Xuuze
(Lc 10:21-22)
25Dza ni', Jesús gne': «Rgu'a li' ba Xuuza, Xaani yëdz'lyu len yewayuba, koma blui'kdu'ne bënni nëxhj'laadxi le pka'chu'u kieke bënni nayajni'i. 26Ka nak Xuuza, koma ka gyaazlaadxu'u li'.
27»Xuuza chi bdëëde lu na'a yugute'. Len nutunu numbe' Le' Xi'ine Dios tuuze Le' Xuuze; len nutunu numbe' Le' Xuuze tuuze Le' Xi'ine Dios ati lekz'ka' bënni'a Le' Xi'ine Dios re'en'de ki lumbe'ke Le'. 28Yugute'li bënni chi rajxaki'li ki xhchin'li len ki yua' zi'i kieeli, guldá ga zua' len neda guuna ga ueak'laadxi'li. 29Guluxua ikj'li yuugu kia' len guluseed gak'li xhën'laadxi len nëxhj'laadxi ka naka neda; naar gunn ueak'laadxi'li. 30Koma yuugu le rxua ikj'li len yua'a runna kieeli dza'z nakgak.»
Избрани в момента:
Mateo 11: PZD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Sociedad Biblica de México AC