Lucas 23
23
Jesús rdxiine lau'e Pilato
(Mt 27:1-2,11-14; Mr 15:1-5; Jn 18:28-38)
1Yugute'ke gulazui'de len guluche'ke Jesús lau'e Pilato. 2Len gulazulau'ke tudxie' le' xhgia', tanáke:
—Bënni ni budzëëli'tu'ne ruune ga bunach ludabaaga'ke yëdz. Rne' ki ti rala kiixhj'tu laaz'sua'tu kie' bënni rnabe', len rne' ki le' nake le' Cristo Bënni Rnabe'.
3Pilato bnaab'de le':
—¿Ati li' naku Bënni Rnabe' kieke bënni Judea?
—Li buudx gnou' —bubi'e diidza Jesús
4Na' Pilato gudxe bënni tunabe'i'de pxuuz len bunach nakua'k ni':
—Tibi xhgia' rudzëël'da nuune bënni ni.
5San leke gulazuaara'ke tanáke:
—Bënni ni rseed'de bunach ga ludabaaga'ke yëdz. Gzulau'e yëdz Galilea, na'a chi ze'e ruune ka' yëdz Judea ni.
Jesús rdxiine lau'e Herodes
6Kati byëën'de le ni Pilato bnaabe xhki Jesús nake bënni yëdz Galilea. 7Kati gnëëz'de ki Jesús nabaabe ga rnabe'e Herodes, psë'le'e le' lau'e, koma Herodes zue' Jerusalén dza'a. 8Kati Herodes ble'i'de Jesús budziiji'tzki'de, koma xhtzei chi guk re'en'de gle'i'de le' tzka diidza le chi byëën'de kie' len ruune lëëz gle'i'de tu yëla wak kie' Jesús. 9Le zian le bnaab'de le', ati Jesús ti bubi'e diidza. 10Nakua'ke ni' lekz'ka' bënni tunabe'i'de pxuuz len bënni useed xhba kie' Dios len gulazuaara'ke tudxie' le' xhgia'. 11Na' Herodes len bënni raja'ke kie' gdil ti gulayazlaadxi'ke le', len tzal gunn lutitj'de le' gulugakue' le' laari lzaka' ka nak le takue' bënni rnabe'. Gdëëd ni Herodes busë'le'e le' yubl lau'e Pilato. 12Dza'a guladzaage dxia'a Pilato len Herodes koma zia'a ti gulale'i dxia'a lza'a'ke.
Tuchuug'be'e ki gatie' Jesús
(Mt 27:15-26; Mr 15:6-15; Jn 18:39—19:16)
13Pilato butzaage bënni tunabe'i'de pxuuz len bënni tunabe'i'de yëdz len gdu yëdz, 14len gudxe leke:
—Lbi'ili dujua'li'ne lau'a bënni ni len rnaali ki le' ruune ga bunach ludabaaga'ke yëdz; san neda chi bnaab'da'ne dxia'a lau'li len tzka xhgia' rdxia'li'ne tibi rudzëël nuune bënni ni. 15Herodes lekz'ka' tibi budzëël'de nuune, lena'a busë'le'e le'. Chi byu'li tibi nuune le nak bach si'e yëla gut. 16Ksaka'zi'ane na' uudx'a ksaana'ne. 17[Lu lni ni Pilato naleeb'de rsaane tue' bënni yu'e liidx'gia naar layaazlaadxi'ke le' bunach.] 18Ati yugute'ke nadzaag'ke ka' gulazulau'e tuskua'ke:
—¡Bdëëd'de bënni ni, len psaane kietu Barrabás!
19Barrabás ni nadzuune liidx'gia le beene ga bunach ludabaaga'ke yëdz len bdëëd'de bunach. 20Pilato bliidze leke le yubl koma re'en'de ksaane Jesús 21san leke guluskua'ke zidzj tanáke:
—¡Bde'e lu yaag kruuz! ¡Bde'e lu yaag kruuz!
22Pilato bliidze leke bunn lzu len gne':
—¿Bixh'le, le ku nak beene? Neda tibi rudzëël'da nuune le nak bach si'e yëla gut. Ksaka'zi'ane na' uudx'a ksaana'ne.
23San leke guluskua're zidzj tunaabe ki Jesús te'e lu yaag kruuz; len tzka'ti'ga guluskua'ke gulade'li'de gak ka te'ende'a. 24Len Pilato beene lea tunaab'de le' 25psaane bënni'a gulunaabe'a, bënni'a yu'e liidx'gia le beene ga bunach ludabaaga'ke yëdz len bdëëd'de bunach, ati bdëëde Jesús lu naa'ke ki luune ka te'en'de.
Tude'e Jesús lu yaag kruuz
(Mt 27:32-44; Mr 15:21-32; Jn 19:17-27)
26Kati nuche'ke Jesús zajda'ke le' lu yaag kruuz, guluzaage'e Simón bënni yëdz Cirene zuze'e dxin gixi len gluune ga gue'e yaag kruuz ni len tziije kuudze'e Jesús.
27Zjak'leene le' bunach zian len ziank'nu nguul tabëëdx'nu len tuwi'ini'nu kie'. 28Ati Jesús bueikje ryu'ke'nu len guudx'ke'nu:
—Nguul yëdz Jerusalén, ti këëdx'li kia', gulkëëdx kieeli len kiek'bi bi kieeli. 29Koma udxin dza kati lanáke: “Bixhgaba'knu nguul wëëdx, nguul ti gulakua'bi bi kiek'nu len ti guluskuul'nu'bi bi'dau'” 30Na'ar lazulau'e bunach le'ke gia'a xhën: “¡Guldubaaga netu!” Len gia'a dau' le'ke: “¡Guluka'chi' netu!” 31Koma xhki ki tusake'e yaag ya'a, ¿Bixh'gaar luune ki yaag biidx?
32Lekz'ka' nuche'ke chope' bënni tuune le ku nak, naar ludëëd'de leke tza'xhën len Jesús. 33Kati guladxiine latj ga nazi' lei' Dxit Ikji bunach, gulude'e Jesús lu yaag kruuz lekz'ka' bënni'a ye chope'a, tue' gulude'e le' kuiti le'e yubeel len ye tue' gulude'e le' kuiti le'e yëëgl. 34Jesús gne': «Xuuza, gxhi'xhën'ke koma ti nëëzi'kde bixh tuune.»
Len bënni raja'ke gdil gulukitj'ke le gunn'be' nuxh'lke la'la'ke xhe' Jesús. 35Bunach nakua'ke ni' tuyu'ke le', len lekz'ka' bënni tunabe'ke tutitj'de le' tanáke:
—Bënni yubl busle'; xhki leel nake le' Cristo bënni grëe' Dios, na'a rala usle' kuine.
36Bënni'a raja'ke gdil lekz'ka' tutitj'de Jesús. Tabiiga'ke ga'la len tui'ke le' nup uva zi gi'i'je, 37len te' le':
—¡Xhki li' naku bënni rnabe' kieke bënni Judea, buslá kuinu!
38Len zga ikj'le Jesús nayoj diidza le rna ki: «Le' nake Bënni Rnabe' kieke bënni Judea.»
39Tue' bënni'a ruune le ku nak len de'e lu yaag kruuz rtzaag'yuudxe diidza Jesús rne':
—¡Xhki li' naku le' Cristo, buslá kuinu len buslá netu lekz'ka'!
40San bënni'a ye tue'a gdil'leene bënni lze'e re' le':
—¿Naru ti raadxi'du'ne li' Dios, la lekz'ka' li zu' rdëëdu yëla rsaka'zi' ni? 41Ro'u le rala'z ktzaag'ru rtzaag'ru, koma rgu'u rgixhj'ru le chi ben'ru; san bënni ni tibi nuune.
42Len gudxe Jesús:
—Jesús, tzajnei'gi'du neda kati sulau'u gnabe'u.
43Jesús bubi'e kie' diidza:
—Le nak'te rea' li', na'dza su' len neda yewayuba.
Jesús ratie'
(Mt 27:45-56; Mr 15:33-41; Jn 19:28-30)
44Ka gyu'u wagbiidz len bdxin'te gdu rdëëd xhwë, kchul gdu yëdz'lyu. 45Psan rdia' gbiidz'a, len laari nuga'la'ke lu gdou' chop'di'il brëëza. 46Jesús bisku'e zidzj gne':
—¡Xuuza, lu no'u rka'ana yëla naban kia'!
—Buudx gne' ki, gutie'.
47Kati bënni'a rnabe'i'de bënni raja'ke gdil ble'i'de ka guk'a, glu'e ba Dios, gne':
—Le nak'te bënni ni tibi dula gdape.
48Yugute'ke bënni nakua'ke ni' len gulale'i'de ka guk'a, zawake bayechi'da. 49Yugute'ke bënni'a gulumbe'e Jesús zitu'z gulakua'ke; lekz'ka' nguul'a zak'leen'nu'ne yëdz't Galilea nakua'knu ni' tuyuunu lea guk'a.
Tuka'che'e Jesús
(Mt 27:57-61; Mr 15:42-47; Jn 19:38-42)
50-51Gzue' tue' bënni dxia'a tzawi le' José bënni yëdz Arimatea yu ki Judea, nabaabe lu dxin'lau'i blou kieke bënni Judea. Bënni ni rbëëze yëla rnabe' kie' Dios len ti ben'leene tuuz len lea glun'ke bënni lze'e, 52le' yajyue Pilato len bnaabe latj ue'e Jesús. 53Kati buudx bzëtje le' lu yaag kruuz, ptul'de le' laari len glu'e le' lu ba narë'ën le'e giaj, ga nutunu tagui'i'de. 54Nak dza kati tupa'a'ke kieke ki kie'la' dza tu'ueak'laadxi'ke bënni Judea.
55Nguul'a zak'leen'nu'ne Jesús yëdz't Galilea yajyu'knu ba len guluyuunu nakxh gulagu'e le' ni'. 56Kati guludxin'nu liidx'knu, glun'nu le rla' xhixh len le tagiebik'nu'ne bënni nat.
Jesús rubaane lu yëla gut
(Mt 28:1-10; Mr 16:1-8; Jn 20:1-10)
Nguul'a gulu'ueak'laadxi'knu dza tu'ueak'laadxi'ke bënni Judea, ka rna xhba kie' Dios.
Избрани в момента:
Lucas 23: PZD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Sociedad Biblica de México AC