Lucas 21
21
Gun kieenu nguul uzeeb
(Mr 12:41-44)
1Jesús ze' ryue' bënni'a de'tzka xhdumi'ke ka tuune tagu'e dumi lu gi'in ki gun ki gdou', 2ble'i'de'nu lekz'ka' tuunu nguul uzeeb nak'nu nguul yechi glu'u'nu chop dumi las'du le ti zaki'i zxhëni. 3Na' gne':
—Le nak'te rea' lbi'ili ki nguul uzeeb ni bnëëdzjr'nu zxhëni ka yugute'ke; 4koma yugute'ke tunëëdzje ki le ruga'an kieke, san nguul ni, lu yëla yechi kieenu, bnëëdzj'nu lazdui le rala ga'wi'nu.
Jesús rgixhjë'e ki ulukin'je gdou'
(Mt 24:1-2; Mr 13:1-2)
5La'ke nakua'ke tui'ke diidza, ka zdan nakgak giaj ki gdou', len ki gun, le run ga gna' nane'i. Jesús gne':
6—Uladxin dza kati dera le lbi'ili ryuuli ni, ti jga'an tu giaj lau'i ye tu giaj. Gdu jgin'j.
Le lunn'be' ki chi za' ga'la dza uudx
(Mt 24:3-28; Mr 13:3-23)
7Na' gulunaab'de le':
—Bënni useed, ¿Batxh gak le ni? ¿Nakxh gak gak'be'i'tu ki chi za' ga'la lakgak le ni?
8Jesús bubi'e diidza:
—Gulun'chi'i kuin'li naar ti gui'li latj nu siye' lbi'ili, koma uladxiine bënni zian luune lsaki'i neda len lanáke: “Chi bdxin dza” len “Neda naka le' Cristo”. Ati lbi'ili ti tziaj'leenk'li'ne. 9Len kati gyëëni'li rak gdil, len nu tudabaaga bënni rnabe' ti gungaadxi kuin'li, le ni de ki lakgak zia'a; san ti rdxiini dza uudx yëdz'lyu.
10Gudxe leke lekz'ka':
—Tu yëdz xhën len ye tu yëdz xhën uladil, len tu yëdz gun gdil len ye tu yëdz. 11Uladëëd utit xhën, len uyu'u yëla rdun, gaaz latzj ka baya' zian, len lu xhba ula'la' le gungaadxi bunach len le xhën'te lului' lau'i.
12»San zia'a'tel gak le ni, bunach ulazëëne lbi'ili len ulusaka'zi'e lbi'ili. Luche'ke lbi'ili len bënni tunabe'ke yu'u useed, lagu'u'ke lbi'ili liidx'gia len nia'a kia' luche'ke lbi'ili lau'ke bënni rnabe'e yëdz xhën len lau'ke bënni rnabe'. 13Ka' gunn gap'li latj gun'li neda xhën. 14Ka' gulgun'te kieeli ti suáli bagi'i bixh gnaali, 15koma neda gunna kieeli diidza nayajni'i ki bënni'a ti tale'i'de lbi'ili dxia'a ti luxikje lbi'ili len ti gun ludabaaga'ke lau'li. 16San xuuz'kz'li, bënni bë'chi'li, bënni dia'dza kieeli len bënni rdzaag'li'ne dxia'a uludëëde lbi'ili lu naa'ke bënni tunabe'ke. Len uludëëd'de lbi'ili la'li', 17len gdu yëdz'lyu lalei'de lbi'ili nia'a kia'; 18san ti nit tu gitza ikj'li. 19Xhki lbi'ili zuaali tzutzu gunn ulaali.
20»Kati gle'i'li Jerusalén chi nagu'u'ke ley li'aj bënni raja'ke gdil, wak'be'i'li ki chi zua ga'la jgin'j yëdz ni. 21Na'ar bënni nakua'ke Judea rala laxhunj'ke gia'a, len bënni nakua'ke Jerusalén rala larooje lu yëdz ni, len bënni nakua'ke lau'gixi ti rala luwëëde Jerusalén. 22Koma ulakgak dza ki yëla rsaka'zi', naar gak ka'teez nayoj lu Diidza La'ay. 23¡Kati gdxin dza ni bayechi lak'knu nguul'a zek'nu zi'i len nguul'a tugaadxi'nu'bi bi kiek'nu! Koma tzu'u yëla rtzaag lu yëdz'a len yëla rsaka'zi' xhën'te giid len bunach yëdz ni. 24La'ke ludëëd'de leke len gia'tuchi, len ye la'ke luche'ke leke ladzuune gdu'te yëdz'lyu, len bënni yëdz yubl ululiaj'luliibe Jerusalén na' gza'ar dza rala gdxin kieke bënni yëdz yubl ni.
Dza kati wëëde Xi'ine Bënni
(Mt 24:29-35,42-44; Mr 13:24-37)
25»Len ulayu'u le lului' lau'i lu gbiidz, lu beu' len lu bëëlj; len lu yëdz'lyu ni yëdz xhën ulak'chi'xi ikj'lau'i len ulaadxi'gak nia'a ki ruzbë' ki nis xhën len ka rbixh'rtul nis ni. 26Bunach ulachul'de tzka'ti'ga laadx'de kati lale'i'de le gak ki yëdz'lyu ni; koma lekz'ka' yugute' bë' xëwi le tunabe' yewayuba ulaxhiiz. 27Na'ar gle'i'li'ne Xi'ine Bënni wëëde lu buaj len yëla wak xhën'te len yëla ba. 28Kati sulau lak yugute' le ni, gulutip'laadxi'li len guluchis ikj'li, koma chi zua gdxin yëla ruslá kieeli.
29Lekz'ka' beene lsaki'i ki:
—Guluyu' yaag higuera, u biti'il yaag. 30Kati rle'i'li ki chi tula' xhlaagi'i, rak'be'i'li ki chi zua gdxin beu' ba. 31Lekz'ka' nak, kati gle'i'li ki chi tak yugute' le ni, gnëëzi'li ki yëla rnabe' kie' Dios chi zua gdxin.
32»Le nak'te rea' lbi'ili ki ti tëëdi dia'dza ni xhki ti lak yugute' le ni. 33Xhba len yëdz'lyu uladëëdi, san xhtiidza'a ti tëëdi.
34»Gulun'chi'i kuin'li len ti gui'li latj ki laadxi'dau'li lak tzutzu nia'a ki le ku nak, len yëla rzuudxi len yëla ru'ubi'rugi'i ki yëdz'lyu ni, ka gna ti gak'be'i'li kati gdxin dza ni sën lbi'ili 35ka rak ki brëëdu. Koma udxin kieke yugute'ke bunach rë'ke yëdz'lyu. 36Gulzua'tekz si'na, gliidz'tekz'li'ne Dios yugu dza, naar ku gde'li'i lbi'ili yugute' le ni le rala lak, len naar saki'li suáli lau'e le' Xi'ine Bënni.»
37Jesús rseed'de te'dza lu gdou' len chi'dzë'ël rga'ane lu Gia'a ki Olivos. 38Len yugute'ke bunach raja'ke bayën gdou' razenaag'ke le'.
Избрани в момента:
Lucas 21: PZD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Sociedad Biblica de México AC